Tamachtilis 1
Keniuj uelis tikmatis tein Dios kichia
¿Toni nemachtilis kipia Biblia tein motelneki? (1)
¿Akoni itanemililuan tein ijkuiliujtok itech Biblia? (2)
¿Keyej moneki timomachtis Biblia? (3)
1. Biblia se inetetayokolil Dios tein kitelpia ipatiuj. Kemej eskia se amat tein se tepopaj tetasojtakej kinijkuilouilia imin konetsitsin. Techiluia kenijkui Dios: akoni yej uan katiyejuan itanauatiluan. Kimelaua keniuj uelis tikixnamikiskej nekuejmololmej uan keniuj uelis tikpiaskej yekmelauj yolpakilis. Sayoj Biblia techiluia toni moneki tikchiuaskej uan ijkon tikyolpaktiskej Dios (Santiago 1:25; Apocalipsis 1:3).
2. Biblia peuak kijkuilouaj kemej 1,500 xiujmej achtopa keman Jesús ualaskia nikan taltikpak. Kijkuilojkej kemej 40 takamej uan uejkaujkej kemej 1,600 xiujmej. Kipia 66 amaixtsitsin. Tajkuilouanij kijkuilojkej tein kiselijkej itenkopa Dios, nejin kijtosneki ika kijkuilojkej yej itanemililuan uan amo tajkuilouanij. Yejika, tein ijkuiliujtok itech Biblia itanemililuan Dios tein yetok iluikak uan amo taltikpaknenkej (2 Timoteo 3:16, 17; 2 Pedro 1:20, 21).
3. Dios kiyekitak maj moyekaijkuilouani Biblia uan maj yetoni nochipa. Okachi miak Biblias mochijchiuakya, amo ijkon okseki amaixtajkuilolmej. Amo nochin yolpakiskej ximomachti Biblia, sayoj ika amo xikaua maj mitstsakuili. Uelis tikpias nemilis nochipaya komo tikixmati Dios uan tikchiua tein kiuelita maski oksekin mitsixnamikiskej (Mateo 5:10-12; Juan 17:3).