Tamachtilis 4
¿Akoni Amokuali?
¿Kani ualeuj Amokuali Satanás? (1, 2)
¿Keniuj kinkajkayaua taltikpakneminij? (3-7)
¿Keyej moneki tikixnamikis Amokuali? (7)
1. Diablo oso “Amokuali” yejua tayekantok kiteltauelita Dios uan tetakajkayauilijkej ika teisa tein tel amo kuali. “Satanás” kijtosneki tel tetauelitakej uan taixnamikkej. Nejin ome tajtolmej kinamiki tein tayekantok kiteltauelita Dios. Yekinika katka se ángel chipauak tein nemia iluikak iuan Dios, satepan moueyinekik uan kinekik maj kimakakan taueyichiualis tein sayoj Dios kinamiki (Mateo 4:8-10).
2. Nejin ángel, Satanás, tajtoj iuan Eva itenkopa se kouat, uan ika itakajkayaualis kichiuj maj amo kitakamatiok Dios. Ika nochi tein Satanás kichiuj kiteuilij “iueyitayekanalis” Dios, nejin kijtosneki ika kiteuilij kampa yetok kemej Ueyichiujkej. Kemej eskia kijtoj ika Dios amo kuali tekiuajti kemej maj nochin kuali kipanokan. No kijtosnekik ika nochin taltikpakneminij kikauaskiaj Dios. Ika nochi tein kichiuj mokepak se aksa tein kiteltauelita Dios. Yejika motokaytia Amokuali Satanás (Génesis 3:1-5; Job 1:8-11; Apocalipsis 12:9).
3. Satanás kineki maj kiueyichiuakan, yejika kinkajkayaua taltikpakneminij (2 Corintios 11:3, 14). Se taman tein ika ueli kichiua, yejua taneltokalis tein amo melauak. Komo se taneltokalis tamachtia tein amo kijtoua Dios, yekmelauj mochiujtok tein Satanás kineki (Juan 8:44). Taltikpakneminij tein yetokej itech taneltokalis tein amo melauak, acha moluiaj ika yekmelauj kiueyichiujtokej Dios uan tein melauj kitekitilijtokej Satanás, ta yejua “tayekantinemi nikan taltikpak” (2 Corintios 4:4).
4. Naualot okse taman tein Satanás kitekitiltia uan ika kinpia imaixko taltikpakneminij. Sekin acha kiitatij naual maj kinpaleui, maj kininaualuikan oksekin, maj kinilui toni kipanotij itech imin nemilis oso maj kinpajtikan. Nochin nejin tachiualismej mochiuaj ika iuelilis Satanás tein tel amo kuali. Komo tiknekij tikyolpaktiskej Dios, moneki timokixtiliskej nochin tachiualismej tein mochiua ika naualot (Deuteronomio 18:10-12; Hechos 19:18, 19).
5. Satanás no kinkajkayaua taltikpakneminij keman kichiua maj moueyinekikan sayoj porin seko kayomej oso chijchipaujkej uan oksekin amo, oso maj kiniueyichiuakan tekiuanij. Sekin tein seko kayomej oso chijchipaujkej uan oksekin amo, moluiaj ika okachi chiuanimej uan oksekin amo. Nejon tanemililis amo melauj (Hechos 10:34, 35). Oksekin kichiaj maj tekiuanij kimelauakan nekuejmololmej tein kipiaj taltikpakneminij. Ijkon kixtopeuaj iTekiuajyo Dios, tein sayoj yejua kimelauas tonekuejmololuan (Apocalipsis 11:15).
6. Satanás no kinkajkayaua taltikpakneminij keman kintalilia tanejnekilis tein kiniuika itech tajtakol. Nejon tachiualismej techijtakoskej, yejika Jiova techiluia maj amo tikchiuakan (Gálatas 6:7, 8). Acha sekin no kinekiskej ximokui imiuan uan xikchiua tein yejuan kichiuaj. Sayoj xikelnamiki ika yejua Satanás akin kineki xikchiua nejon tachiualismej (1 Corintios 6:9, 10; 15:33).
7. Satanás uelis kichiuas maj aksa mitsixnamiki uan xikaua Jiova. Acha sekin motasojikniuan mitstauelitaskej sayoj porin timomachtijtok Biblia. Oksekin acha mitskejkeloskej. Sayoj, ¿akoni tiktauikilia monemilis? Satanás amo kineki xiksentoka ximomachti tein Jiova kijtoua, yejika kineki mitsmojmoujtis. Amo xikaua maj mitstsakuili (Mateo 10:34-39; 1 Pedro 5:8, 9). Komo tikixnamiki Amokuali, uelis tikyolpaktis Jiova uan ijkon tiknextijtos ika tikpaleuia Iueyitayekanalis (Proverbios 27:11, NM).
[Tajtolmej itech página 9]
Satanás kinkajkayaua taltikpakneminij ika taneltokalis tein amo melauak, naualot uan keman aksa moueyineki sayoj porin moluia ika okachi chiujkej uan oksekin amo
Komo tiksentoka tikixmati Jiova mitspaleuis tikixnamikis Satanás