Tamachtilis 8
Se nemilis kemej kalyetouanij tein kiyolpaktia Dios
¿Toni tanauatil kipia takat tein namikej itech ichankauan? (1)
¿Keniuj moneki mouikas takat iuan inamik? (2)
¿Toni moneki kichiuas tepopaj? (3)
¿Toni tanauatil kipia siuat tein namikej itech ichankauan? (4)
¿Toni kichia Dios maj kichiuakan tetatmej uan konemej? (5)
¿Toni kiniluia Biblia namikuanij tein mokakauaj?, ¿tein kitsayanaj amat iminixpan tekiuanij? (6, 7)
1. Biblia kijtoua ika takat tein namikej yejua kinixyekana ichankauan (1 Corintios 11:3). Moneki kipias sayoj se inamik uan kemej namikuanij moneki ijkuiliujtoskej iminixpan tekiuanij (1 Timoteo 3:2; Tito 3:1).
2. Takat moneki kitasojtas inamik ijkon kemej yej motasojta. Moneki moyekuikas iuan, ijkon kemej Jesús moyekuikak imiuan imomachtijkauan (Efesios 5:25, 28, 29). Maj amo keman kiteui niono maj tejika kieliuisui. Ta, moneki kipoujkaitas uan amo kiitas ika amo tej chiujkej (Colosenses 3:19; 1 Pedro 3:7).
3. Tepopaj moneki tekitis ika nochi iyolo uan ijkon kinixpanoltis ichankauan. Moneki kinimakas ichankauan toni kikuaskej, toni motaliliskej uan kani nemiskej. No moneki kinimachtis keniuj okachi kichikauaskej imin takuaujtamatilis itech Dios (1 Timoteo 5:8). Moneki kiniyekanas ichankauan maj momachtikan tein Dios kijtoua uan itanejnekilisuan (Deuteronomio 6:4-9; Efesios 6:4, YM).
4. Siuat tein namikej moneki eski se kuali tapaleuijkej (Génesis 2:18). Moneki kipaleuis inamik maj kinimachti konemej keniuj moojtokaltiskej itech imin nemilis (Proverbios 1:8). Jiova kineki maj siuat kiita ika netasojtalis toni kinpoloua ichankauan (Proverbios 31:10, 15, 26, 27; Tito 2:4, 5). Siuat moneki kitelpoujkaitas inamik (Efesios 5:22, 23, 33).
5. Dios kichia ika konemej maj kintakamatikan imin tatuan (Efesios 6:1-3). No kichia maj tetatmej kinimachtikan uan maj kinimejmelauakan imin koneuan. Tetatmej moneki yetoskej imiuan uan mosenmachtiskej Biblia, ijkon uelis kitaskej tein kipanotoskej konemej uan no kinpaleuiskej maj mochikaua imin takuaujtamatilis itech Dios (Deuteronomio 11:18, 19; Proverbios 22:6, 15). Maj amo keman kinimejmelauakan imin koneuan ika eliuisyot (Colosenses 3:21).
6. Keman namikuanij kipiaj nekuejmololmej uan amo moyekuikaj, okachi kuali maj mochikauakan kichiuaskej tein Biblia teyolmajxitia. Biblia techyolchikaua maj timotasojtakan uan maj timotapojpoluikan (Colosenses 3:12-14). ITajtol Dios kijtoua ika amo kuali yetok maj mokakauakan keman kipiaj tepitsin nekuejmololmej. Sayoj ika siuat uelis kinemilis kikauas inamik komo 1) tel amo kineki kintekipanos ichankauan, 2) kiteleliuisuia uan uelis kokoliskuis oso kipolos inemilis uan 3) iueyitaixnamikilis kitsakuilia maj kiueyichiua Jiova (1 Corintios 7:12, 13).
7. Namikuanij amo uelis mokajkayauaskej. Namikuanij tein auilnemij tajtakouaj iixpan Dios uan iuan inamik (Hebreos 13:4). Biblia kijtoua ika sayoj uelis kitsayanaskej amat iminixpan tekiuanij uan oksepa uelis monamiktiskej, komo semej namikuanij auilnemi (Mateo 19:6-9; Romanos 7:2, 3). Jiova amo nenken kiuelita maj aksa kitsayana amat iminixpan tekiuanij komo amo semej auilnemi uan maj oksepa monamikti iuan okse (Malaquías 2:14-16; 1 Corintios 7:10).
[Tajtolmej itech página 17]
Dios kichia maj tetatmej kinimachtikan uan maj kinimejmelauakan imin koneuan
[Tajtolmej itech página 17]
Tepopaj tetasojtakej kintekipanoua ichankauan uan kinpaleuia maj okachi mochikaua imin takuaujtamatilis itech Dios