Toni kinpaleuis kalyetouanij maj yolpakikan

1, 2. ¿Keniuj kineki Jiova maj nemikan kalyetouanij?

JIOVA kinnamiktij yekinika takat uan yekinika siuat. Biblia kijtoua ke yejuatsin kichijchiuak yekinika siuat uan kiuikilij takat. Adán semi yolpakik uan kijtoj: “Nejin kisak itech noomiyouan uan itech nonakayo” (Génesis 2:22, 23). Nejin kinextia ke Jiova kineki maj yolpakikan akin monamiktiaj.

² Sayoj ke, miakej amo keman yolpakinij kemej kalyetouanij. Sayoj ke Biblia kipia miak tamachtilis uan tayolmajxitilis tein uelis kinpaleuis nochin kalyetouanij maj kuali mouikakan uan maj yolpakikan (Lucas 11:28).

TEIN DIOS KINEKI MAJ KICHIUA TAKAT

3, 4. 1) ¿Toni moneki kichiuas takat akin kipia inamik? 2) ¿Keyej moneki motapojpoluiskej takat uan siuat?

³ Biblia kijtoua ke takat moneki kitasojtas inamik uan kipatiuitas (xikonixtajtolti Efesios 5:25, 28, 29). Takat nochipa moneki kijtos uan kichiuas tein kinextilis inamik ke kitasojta. Moneki kiitas maj amo teyi kipano uan maj amo teyi kipolo. No moneki amo kiyolkokos nion kiteuis.

⁴ ¿Toni moneki kichiuas takat keman inamik kipias se nepolol? Biblia kijtoua: “Xikintasojtatiyakan namosiuauan [...] uan amo xikinyolxokolikan” (Colosenses 3:19). Takamej, xikelnamikikan ke namejuan no nankipiaj nepololmej. Uan no, komo nankinekij maj Dios namechtapojpolui, moneki nankitapojpoluiskej nanmonamik (Mateo 6:12, 14, 15). Komo takat uan siuat motapojpoluiaj, nejon kinpaleuis maj yolpakikan.

5. ¿Keyej takat moneki kipatiuitas inamik?

⁵ Jiova kineki maj takat kipatiuita inamik. Takat moneki kitemos keniuj kipaleuis inamik uan moneki kitekipanos. No moneki kitemos iuan tajtos uan kiajsikamatis keniuj momachilia. Nejin semi moneki, porin komo amo ijkon kichiua, Jiova xa amo kikakis inetataujtiluan (1 Pedro 3:7). Jiova amo okachi kinpatiuita takamej, ta yejuatsin kinpatiuita nochin akin kitasojtaj.

6. ¿Keyej Biblia kijtoua ke takat uan siuat “sayo se”?

⁶ Jesús kijtoj ke keman se takat uan se siuat monamiktiaj, “amo omen ok yeske. Ta, sayo se” (Mateo 19:6). Nejin kijtosneki ke amo kikajkayauaj ininnamik iuan okse. Takat moneki kipias sayoj se inamik uan siuat no moneki kipias sayoj se inamik (Proverbios 5:15-21; Hebreos 13:4). Takat uan siuat moneki motekaskej iuan ininnamik uan kitemoskej kiyolpaktiskej uan amo sayoj yejuan moyolpaktiskej (1 Corintios 7:3-5). Biblia kiniluia takamej “ma kintasojtatinemikan ninsiuauan ika ne tetasojtalis tenika cada se teyokich mopialitinemi uan motasojtatinemi”. Uan no kijtoua ke “amo aken kitauelitstinemi de yejua itakayo san. Ta [...] motasojtatinemi kuak motekipanoa [oso motamaka] uan moyekpia”. Nejin kinextia ke takat moneki kitasojtas inamik uan kichiuas uan kijtos tein kinextilis ke kitasojta. Se siuat okachi kineki maj inamik kualtakat iuan uan maj kinextili ke kitasojta (Efesios 5:28, 29). Dios kineki maj se takat uan se siuat monamiktikan ininixpan tekiuanij achto ke peuaskej sennemiskej (Lucas 2:1, 4, 5).

TEIN DIOS KINEKI MAJ KICHIUA SIUAT

7. ¿Keyej moneki maj moajsi se akin kinixyekanas kalyetouanij?

⁷ Nochin kalyetouanij moneki kipiaskej se akin kinixyekanas. Ijkon yejua uelis kichiuas maj nochin mosenpaleuikan. Biblia kijtoua itech 1 Corintios 11:3: “Totajtsin Dios, Yejuatsin kiyekantinemi Cristo. Uan in Cristo Yejuatsin kinyekantinemi itaneltokakauan [takamej]. Uan [...] in taneltokakke [takat], yejua ne kiyekantinemi isiuau”.

8. ¿Keniuj kinextia siuat ke mokaua maj kiixyekana inamik?

⁸ Nochin takamej akin namikyejkej kipiaj nepololmej. Sayoj ke, keman siuat amo kiixnamiki inamik uan kipaleuia ika yolpakilis, nochin kalyetouanij kualtsin nemij (1 Pedro 3:1-6). Biblia kijtoua: “Tesiuau moneki ma momouiskauika iuan iyokich [oso itakauj]” (Efesios 5:33). ¿Uan toni moneki kichiuas siuat komo inamik kipia okse taneltokalis? Maski ijkon, moneki mokauas maj kiixyekana. Biblia no kijtoua: “Nantesiuauan, ximotekauilikan ma namechyekanakan namoyokichuan. Porin takan sekin namoyokichuan amo kitakamatij in Tajtoltsin de Dios, [...] kitaske ke namejuan nanchipaukanemij uan ke nantatakamatinemij, ijkuakon yejuan kineltokaske in Tajtoltsin de Dios” (1 Pedro 3:1, 2). Komo siuat kichiua ijkon kemej tayolmajxitia Biblia, inamik uelis kiajsikamatis keyej kiita ke moneki kichiuas tein momachtia uan amo kiixnamikis.

9. 1) ¿Toni uelis kichiuas siuat keman amo tanemilis kemej inamik itech teisa tein kichiuatij? 2) ¿Toni kinyolmajxitia Tito 2:4, 5 siuamej akin kipiaj ininnamik?

⁹ ¿Toni uelis kichiuas siuat keman amo tanemilis kemej inamik itech teisa tein kichiuatij? Moneki kiluis tein kinemilia, sayoj ke moneki kikuis kuali tajtolmej. Kemej neskayot, Sara kiluij Abrahán se taman tein Abrahán amo kiuelitak. Sayoj ke Jiova kiluij Abrahán: “Xiktajtolkaki” (Génesis 21:9-12). Siuat moneki amo kiixnamikis inamik keman kiixtalis teisa komo amo kitapanauilia tein kijtoua Biblia (Hechos 5:29; Efesios 5:24). Uan no, moneki kiitas maj kuali yetokan ichankauan (xikonixtajtolti Tito 2:4, 5). Keman inamik uan ikoneuan kiitaskej nochi tein ininka kichiua, okachiok kitasojtaskej uan kipatiuitaskej (Proverbios 31:10, 28).

10. ¿Kemanian kijtoua Biblia ke se takat uan se siuat uelis moxeloskej oso kiixpoloskej amat tein kinextia ke monamiktijkej?

¹⁰ Sekin kinemilijtiuetsij mokauaskej oso moxeloskej, uan kemansa hasta ininixpan tekiuanij. Sayoj ke Biblia kijtoua ke “tesiuau ma amo mosekokaua de iyokich” uan ke “teyokich ma amo kisekokaua ne isiuau” (1 Corintios 7:10, 11). Maski onkak seki uejueyi kuejmolmej tein uelis kichiuas maj mokauakan oso moxelokan, takat uan siuat moneki kuali kiixejekoskej porin nejon amo auil.a ¿Uan komo kinekij maj tekiuanij kiixpolokan amat tein kinextia ke monamiktijkej? Biblia tamachtia ke sayoj uelis kichiuaskej nejon komo semej moteka iuan akin amo inamik (Mateo 19:9).

TEIN DIOS KINEKI MAJ KICHIUAKAN TETATMEJ

11. ¿Toni okachi moneki kichiuaskej tetatmej?

¹¹ Tetatmej, xiyetokan iniuan nanmokoneuan nochi tiempo tein nanueliskej. Yejuan kinekij namouan yetoskej. Uan no, okachi moneki nankinpaleuiskej maj kiixmatikan Jiova (Deuteronomio 6:4-9).

12. ¿Keniuj tetatmej moneki kinmatampauiskej ininkoneuan?

¹² Axkan okachi mochiujtok tein amo kuali. Sekin kinekij kinchiuiliskej tein amo kuali tokoneuan. Hasta uelis kinkijkitskiskej oso kinuilanaskej. Seki tetatmej ouij kinkisa kiniluiskej nejin ininkoneuan, sayoj ke moneki kinnejmachtiskej uan kinmachtiskej keniuj mopaleuiskej. Tetatmej, moneki nankinmatampauiskej nanmokoneuan (1 Pedro 5:8).b

13. ¿Keniuj tetatmej moneki kinmachtiskej ininkoneuan?

¹³ Tetatmej moneki kinmachtiskej ininkoneuan maj kichiuakan tein kuali. ¿Keniuj uelis tikonchiuas? Moneki tikonixyekanas uan tikonmachtis mokoneuan, sayoj ke amo keman xikontajyouilti keman tikontakaualtis oso tikontakakiltis (Jeremías 30:11). Yejua ika, amo keman xikontakaualti keman tionkualantos. Ijkon amo tikoniluis tajtolmej tein uelis kinyolkokos kemej yeskia tikonteuiskia oso tikonmaaskia ika se espada. ¿Melauj ke amo tikonneki tikonchiuas nejon? (Proverbios 12:18.) Xikonpaleui maj kiajsikamatikan keyej moneki tatakamatiskej (Efesios 6:4; Hebreos 12:9-11). (Xikonita tajtolmelaualis 29.)

TEIN DIOS KINEKI MAJ KICHIUAKAN KONEMEJ

14, 15. ¿Keyej konemej moneki kintakamatiskej inintatuan?

¹⁴ Jesús nochipa kitakamatik iPopaj, hasta keman ouij katka (Lucas 22:42; Juan 8:28, 29). Jiova kineki maj konemej kintakamatikan inintatuan (Efesios 6:1-3).

¹⁵ Konemej, xa ouij namechkisas nankintakamatiskej nanmotatuan. Sayoj ke xikelnamikikan: keman nantatakamatij, Jiova uan nanmotatuan semi yolpakij (Proverbios 1:8; 6:20; 23:22-25).c

16. 1) ¿Keniuj kitemoua Satanás maj telpochmej uan ichpochmej kichiuakan tein amo kuali? 2) ¿Keyej moneki maj kitasojtakan Jiova akin iniuan kuali timouikaj?

¹⁶ Satanás kitemos xikchiua tein amo kuali, uan uelis kichiuas inintechkopa akin iniuan kuali timouika uan okseki telpochmej. Yejua kimati ke ouij mitskisas amo tikchiuas tein mitsiluiskej. Maj tikitakan tein kipanok Dina, se iichpoch Jacob. Dina kuali mouikaya iniuan akin amo kitasojtayaj Jiova, uan nejon kichiuak maj kipanouani ouijkayomej yejua uan no ichankauan (Génesis 34:1, 2). Komo akin iniuan timouika amo kitasojtaj Jiova, xa mitsiluiskej xikchiua teisa tein yejuatsin amo kiuelita. Komo tikchiua nejon, mitsualkuilis tajyouilis uan tikinyolkokos mochankauan uan Jiova (Proverbios 17:21, 25). Yejua ika moneki maj akin iniuan kuali timouika kitasojtakan Jiova (1 Corintios 15:33).

TONI KINPALEUIS KALYETOUANIJ MAJ YOLPAKIKAN

17. ¿Toni moneki kichiuaskej nochin kalyetouanij?

¹⁷ Keman nochin kalyetouanij kitakamatij tein Dios tayolmajxitia, amo semi kipiaj kuejmolmej. Yejua ika, takat, xikontasojta monamik uan xikonnextili ika tein tikonchiuas uan tikonijtos. Siuat, xionmokaua maj mitsonixyekana monamik, amo xikonixnamiki uan xikonchiua kemej siuat akin ika motajtoua itech Proverbios 31:10-31. Komo nankinpiaj konemej, xikinmachtikan maj kitasojtakan Dios (Proverbios 22:6). Takat, kuali xikonixyekana mochankauan (1 Timoteo 3:4, 5; 5:8). Uan konemej, xikintakamatikan nanmotatuan (Colosenses 3:20). Maj tikelnamikikan ke tinochin tikpiaj nepololmej, yejua ika moneki amo timoueyimatiskej uan titajtaniskej maj techtapojpoluikan. Kemej tikitakej, itech Biblia tikajsij tein Jiova kinyolmajxitia takamej, siuamej, tetatmej uan konemej.