¿Toni techpanoua keman timomikiliaj?

Mikilis tel amo ijkuitik kemej nemilis. Mikilis kemej eskia se aksa kuali kochtok (Juan 11:11-14). Mikemej amo uelij takakij, niono tachiaj, amo uelij tajtouaj niono uelij kinemiliajok teisa (Eclesiastés 9:5, 10).Taneltokalis tein amo melauak kijtoua ika mikemej youij nemitij kanajika imiuan imiuejkaujtatuan. Sayoj ika Biblia amo yejua nejon tamachtia.

Taltikpakneminij tein momikilijkejya amo uelij techpaleuiaj niono uelij techijtakouaj. Kampa yeski, miakej taltikpakneminij kipiaj imin uejkaujtalnamikilis uan kintakachiuaj mikemej, yejuan moluiyaj ika nejin kiniyolpaktia mikemej. Sayoj ika nochi nejin amo kiyolpaktia Dios, porin ualeujtok itech semej itakajkayaualis Satanás. Niono ueli kiniyolpaktia taltikpakneminij tein momikilijkejya, porin amo kipiajok nemilis. Maj amo tikinimouilikan mikemej niono maj tikiniueyichiuakan. Sayoj moneki maj tikueyichiuakan Dios (Mateo 4:10).

Mikemej oksepa nemiskej. Amo uejkaua, Jiova kinijxitis mikemej uan kichiuas maj nemikan itech se xochital nikan Taltikpak (Juan 5:28, 29; Hechos 24:15). Dios ueli kinijxitia taltikpakneminij tein momikilijkejya, ijkon kemej tej ueli tikijxitia aksa tein kuali kochtok (Marcos 5:22, 23, 41, 42).

Tanemilil ika amo timikij se xolopijyot uan Amokuali Satanás kichiua maj miakej taltikpakneminij kineltokakan. Satanás uan iamokuali ejekauan kichiuaj maj taltikpakneminij moluikan ika imin espíritus mikemej yoltokej, kinkokoliskuiltiaj uan kintakuejmolchiuiliaj. Satanás kinkajkayaua taltikpakneminij, iksa ika takochitalis oso kinitaltia teisa. Yejika Jiova amo nenken kiniuelitilia tein kiyejyekouaj tajtoskej imiuan mikemej (Deuteronomio 18:10-12).