Tanauatilmej ika iTekiuajyo Dios tapoual 37

Se tanauatil tein motemaka noyampa taltikpak

¡Itamilis taneltokalis tein amo melauak amo uejka yetok!

▪ ¿Toni moajsikamati keman moijtoua taneltokalis tein amo melauak?

▪ ¿Keniuj ixpoliuis?

▪ ¿Timakisas tejuatsin keman ixpoliuis taneltokalis tein amo melauak?

¿Toni moajsikamati keman moijtoua taneltokalis tein amo melauak?

¿Mitsyolkuejmoloua temiktilis tein mochiua itokaykopa taneltokalis? Tejuatsin tikita neteuilismej, tachiualis ika eliuisyot tein ika kinimojkaakiaj tekiuanij uan tachiualis tein amo kuali ika tomin, ¿mitskualantia tikitas ika nejon kichiuaj taltikpakneminij tein kijtouaj kitekitiliaj Dios, uan amo mouika ika tein tejuatsin timoluia ika melauak? ¿Keyej majya taneltokalis kiualkui miak kuejmolmej? Amo nochin taneltokalismej imin tajtakol, ta sayoj taneltokalis tein amo melauak. Jesucristo, se taneltokakej tein kitelpoujkaitakej, kinextij ika taneltokalis tein amo melauak, yejua tein kitemaka amo kuali takilot, ijkon kemej se “kuouit ten amo kuali, yejua ne kitemaka takilomej ten amo kualtia” (Mateo 7:15-17).a ¿Toni takilot kitemaka taneltokalis tein amo melauak?

Taneltokalis tein amo melauak...

◼ ... MOKALAKIA ITECH NETEUILISMEJ UAN ITECH TEKIUAJYOT. Amaix Asiaweek kijtoua: “Ijkon kemej Asia uan itech okseki altepemej, tayekananij tein kitelnekij kipiaskej se ueyi tanauatil, ika mauiltiaj imin tanemilil ika tein kineltokaj taltikpakneminij, uan ika nejon kichiuaj tein yejuan kinekij”. Uan no kijtoua ika yejua ika “nikan taltikpak sentakuejmoliui”. Se ueyichiujkej tel taneltokakej kayot Estados Unidos kijtoj: “Nemijmiktilis uelis tamis komo se kinimiktia tein kichiuaj eliuisyot tein ika kinimojkaakiaj tekiuanij”. Yej kijtoua ika kuejmol momelauas ijkon: “Maj se kinimikti nochin yejuan itokaykopa Dios”. Sayoj ika Biblia kijtoua: “Komo aksa kijtoa ijkuin: ‘Nejua niktasojta Dios’, uan yejua no kintauelita ok niikniuan taneltokanij, ijkuakon yejua ne sayoj xolopijti san” (1 Juan 4:20). Jesús no kitemakak nejin tanauatil: “Xiktasojtakan naken namechtauelitaskej” (Mateo 5:44). ¿Kanachi taneltokalismej tikelnamiki tejuatsin ika tein ompa pouij kintitanij itech se neteuilis?

◼ ... TAMACHTIA TANEMILILMEJ TEIN AMO MELAUAK. Miakej taneltokalismej tamachtiaj ika tejuan tikpiaj se teisa tein amo moita, uan kisentoka nemi keman timomikiliaj. Ika nejon, miakej taneltokalismej iminka mauiltiaj taneltokanij keman kijtouaj ika kintatataujtiliaj mikemej uan ika kinkixtiliaj tomin. Sayoj ika amo yejua nejon tein Biblia tamachtia, ta kijtoua ika, “tein yoltokej kiyekmattokej ika momikiliskej; sayoj ika tein momikilijkejya, yejuan amo kimatijok nionteyi” (Eclesiastés 9:5, NM). Jesús tamachtij ika mikemej kipiaskej neajokuilis, sayoj ika komo taltikpaknenkej kipiaskia se teisa tein kisentoka nemi, amo monekiskiaok neajokuilis (Juan 11:11-25). ¿Tamachtia motaneltokalis ika tikpiaj se teisa tein amo miki?

◼ ... KIKAUA MAJ MOCHIUA AUILNEMILIS. Itech miak altepemej, moajsij taneltokalismej tein kinixtaliaj takamej tein auilnemij iuan takamej uan siuamej tein auilnemij iuan siuamej maj taixyekanakan itech nejon taneltokalismej, uan kinchikaujkauiaj tekiuanij maj kinijkuilokan. No onkakej taneltokalismej kampa kijtouaj ika auilnemilis amo kuali, sayoj ika kinitajsaj tayekananij tein kipiaj tajtakol maj iminka mauiltikan konemej. Sayoj ika ¿toni tamachtia Biblia? Ompa kiyekijtoua: “Amo ximopojpolokan. Niono keman se takat uan se siuat mosentekaj uan ayamo namikuanij, niono tein kiniueyichiuaj tiotsitsin, niono namikuanij tein auilnemij, niono takat tein mochiua kemej siuat, niono takat tein moteka iuan itakaikniuj [ . . .] yetoskej itech itekiuajyo Dios” (1 Corintios 6:9, 10, NM). ¿Tikakini tejuatsin maj moajsikan taneltokalismej tein kikauaj maj onka auilnemilis?

¿Toni kinpanoti taneltokalismej tein kionkaltiaj takilot tein amo kualtia? Jesús tanejmachtij: “Uan nochi in kuoujmej ten amo kitemaka takilot ten kualtia, in tekitinij kimayouiskej uan kitamotaskej tech in tit” (Mateo 7:19). Ijkoni yej, taneltokalis tein amo melauak kimayouiskej uan kiixpoloskej. Sayoj ika ¿keniuj uan kemanian mochiuas nejon? Se tajtachialis tein kinextij toni mochiuas satepan, tein ixnesi itech Biblia itech Apocalipsis, iueyi tapoual 17 uan 18, techmaka tanankilil.

¿Keniuj ixpoliuis taneltokalis tein amo melauak?

Ximonemili tein moitak. Se siuaauilnenkej tokotsyetok ipanko se okuilij tel tamouilil, tein kipia chikome tsontekomamej uan majtakti kuaomimej (Apocalipsis 17:1-4). ¿Akoni kiixnextia? Nejon siuat kinixyekana “nochi in tayekananij reyes de nochi in taltikpak”, uan takentok ika morado taken, kikui kopal uan kitelpia tomin. Uan no, ika itachiualisuan ika naualot, ‘kinpojpolojtok nochin taltikpakneminij ika inaualo. Sayoj ika axkan amo teyi chiujkej ok’ (Apocalipsis 17:18; 18:12, 13, 23). Biblia techpaleuia maj tikajsikamatikan, ika nejin siuaauilnenkej kiixnextia se oloch taneltokalismej tein moajsij itech nochi taltikpak. Amo kiixnextia sayoj se taneltokalis, ta nochin taneltokalismej tein kionkaltiaj takilot tein amo kualtia.

Okuilij kiixnextia tekiuajyomej tein okachi chikaujkej itech taltikpak (Apocalipsis 17:10-13).b Ipanko tokotsyetiuj taneltokalis tein amo melauak, mokalakijtok ika tein kineki kichiuas uan no kineki kiixyekanas.

Sayoj ika amo uejkaua mochiuati teisa tein se kitelmoujkaitas: “Tikitak ya ne majtakti kuakuauj tech ne ueyi okuilin, yejuan nojonkes in majtakti tayekananij reyes ten kitauelitaskej ne siuaauilnenkej [ . . . ]. Uan ne majtakti tayekananij iuan ne ueyi okuilin, yejuan nojonkes kiajchiuilijkej nochi ten niaxka de ne siuaauilnenkej para ma mokaua xitatstik. Uan no kijtakouiliskej yejua ninakayo, uan no kitamichichinouiliskej” (Apocalipsis 17:16). Kemej niono momattos uan kemej tel temoujtis, tekiuajyomej tein okachi chikaujkej itech taltikpak, ipan yaskej taneltokalis tein amo melauak uan senkis kiixpoloskej. ¿Keyej ijkon kichiuaskej? Amaix itech Biblia itokay Apocalipsis kijtoua: “Dios kinyoltanemililtij ya ma kichiuakan ijkon kemej Yejuatsin kimonekiltij” (Apocalipsis 17:17). Ijkoni yej, Dios kiixkomakas taneltokalis tein amo melauak ika nochi tachiualismej tein tel amo kuali, tein kichiua itokaykopa Dios uan ika kimouispolouaj. Uan no, Dios tein amo mopoloua keman kitekitiltia imelaujkayo, ijkuak, kinkuis tekiuanij tein siuaauilnenkej imiuan mouikaya, maj yejuansaj kiixpolokan.

¿Toni moneki tikchiuas tejuatsin uan ijkon amo mitspanos tein kipanoti taneltokalis tein amo melauak? Itanauatijkauj Dios techyolchikaua: “Namejuan nannopueblojkauan [ . . . ], namechilia xikisakan” (Apocalipsis 18:4). Axkan moneki tikcholuiskej taneltokalis tein amo melauak. Sayoj ika ¿toni kijtosneki nejin? Amo kijtosneki maj timoluikan ika Dios amo nemi, porin ijkon amo no uelis timakisaskej (2 Tesalonicenses 1:6-9). Sayoj uelis timopaleuiskej itech taneltokalis tein melauak. ¿Keniuj uelis tikmatis katiyejua taneltokalis tein melauak?

[Tajtolmelaualis]

“Namejuan nannopueblojkauan [...], namechilia xikisakan”

Taneltokalis tein amo melauak kinixyekana “nochi in tayekananij reyes de nochi in taltikpak”

Keniuj uelis tikmatis katiyejua taneltokalis tein melauak

¿Toni kuali takilot moneki kionkaltis taneltokalis tein melauak? (Mateo 7:17.)

Taneltokalis tein melauak...

◼ ... KINEXTIA NETASOJTALIS. Tein yekmelauj itekitikauan Dios “amo no poujtinemij nikan taltikpak”, amo kinchikoitaj tein seko kayomej oso maseualmej, uan ‘moyoltasojtatinemij’ (Juan 13:35; 17:16; Hechos 10:34, 35). Yejuan amo momijmiktiaj, ta komo moneki motemakaj mikiskej iminka oksekin (1 Juan 3:16).

◼ ... TAKUAUJTAMATI ITECH ITAJTOL DIOS. Taneltokalis tein melauak amo tamachtia tanemililmej tein motaksaltiaj itech uejkaujtalnamikilismej, niono itech “tamachtilis den takaj san”; ta itamachtilisuan motaksaltiaj itech Biblia (Mateo 15:6-9). ¿Keyej? Porin ‘nochi in Tajkuilolamatsitsin Dios kichiuak ika ichikaualisuan. Ika ya nojon uelis se kuitinemis para ika se tamachtijtinemis uan no para maj kikaujtiyakan nintajtakoluan. Uan no para ika kinyolmelaujtiyas’ (2 Timoteo 3:16).

◼ ... KICHIKAUA NETASOJTALIS KEMEJ KALYETOUANIJ UAN TEYOLCHIKAUA MAJ SE MOOJTOKALTI IKA TANAUATILMEJ TEIN TEPALEUIA MAJ SE CHIPAUJKANEMI. Taneltokalis tein melauak kiniyolchikaua takamej, “maj kintasojtatinemikan ninsiuauan ika ne tetasojtalis tenika kada se teyokich mopialitinemi”, no kipaleuia siuat “maj momouiskauika iuan iyokich” uan kinimachtia konemej maj ‘kintakamatiyakan imin tatuan’ (Efesios 5:28, 33; 6:1). Uan no, tein kipiaj taixyekanalis moneki kikauaskej se kuali neskayot ika chipaujkanemilis (1 Timoteo 3:1-10).

¿Moajsi se taneltokalis tein moojtokaltia ika nejin tanauatilmej? Amaix Holocaust Politics, tachijchiuj itech 2001, kijtoua: “Komo okachi miakej moojtokaltiskiaj ika tein tanojnotsaj uan kichiuaj itaixpantijkauan Jiova, amo mochiuaskia Holocausto [ueyi temiktilis tein kipanokej judíos itech ojpatika neteuilis itech nochi taltikpak] uan niono mochiuaskia okse tachiualis ijkuitik”.

Ijkoni yej, itaixpantijkauan Jiova—tein tekititokej itech 235 uejueyi altepemej—amo sayoj ika tanojnotsaj tanauatilmej itech Biblia tein tepaleuia maj se chipaujkanemi; ta kichiuaj tein kijtouaj. Timitsyoleuaj xikinilui maj mitspaleuikan tikmatis tein Dios kichia maj tikchiuakan tisejsemej, uan ijkon totaueyichiualis uelis kiyolpaktis. Axkan moneki tikchiuas. Amo ximouejkaua. ¡Itamilis taneltokalis tein amo melauak amo uejka yetok! (Sofonías 2:2, 3.)

Komo tikuelitaskia tikmatis okachi ika itajtol Dios tein ika tanojnotsaj itaixpantijkauan Jiova, timitsyoleuaj xikijkuilo tein tatsintaj mitstajtania uan xiktitani.

□ Nikuelitaskia nikselis se amaix tein itokay ¿Toni kichia Dios maj tikchiuakan? uan amo moixtaua.

Xikijkuilo itech toni tajtol tikneki.

□ Nikuelitaskia xinechiluikan keniuj nantamachtiaj ika Biblia itech se ichan uan amo moneki se taxtauas.

[Tajtolmelaualis]