TAMACHTILIS 13
Taneltokalismej tein takajkayauaj kichiuaj maj amo kineltokakanok Dios
Komo Dios netasojtalis uan itech taneltokalismej kijtouaj ke kichiuaj tein yejuatsin kineki uan tajtouaj itenkopa Dios, ¿keyej kichiuaj miak taman tein semi amo kuali? Porin nejin taneltokalismej takajkayauaj. Kichiuaj maj miakej amo kineltokakanok Dios ika tein tamachtiaj uan tein kichiuaj, ¿keniuj kichiuanij? ¿Keniuj momachilia Dios keman kiita nejon? ¿Uan toni kichiuas?
1. ¿Keniuj kichiuanij maj miakej amo kineltokakanok Dios ika tein tamachtiaj?
Taneltokalismej tein takajkayauaj kiixpatanij “in melauak Tajtoltsin de Dios ika [...] ten sayo xolopijyot san” (Romanos 1:25). Seki taneltokalismej amo tamachtiaj itokay Dios. Sayoj ke, Biblia kijtoua maj tikuikan itokay (Romanos 10:13, 14). Keman mochiua tein amo kuali, miakej akin taixyekanaj itech taneltokalismej kijtouaj ke Dios ijkon kinekik maj mochiua. Sayoj ke amo yejuatsin itajtakol ta sayoj kitakajkayauiliaj (xikonita Santiago 1:13). Nejin kichiuani maj miakej amo motokikan iuan Dios.
2. ¿Keniuj kichiuanij maj miakej amo kineltokakanok Dios ika tein kichiuaj?
Itech taneltokalismej tein takajkayauaj amo tetasojtaj kemej Jiova kichiua. Biblia kijtoua ke “ixnestok ya miak panti nintajtakoluan [...] hasta [...] eluiyaktsinko” (Apocalipsis 18:5). Miak xiujmejya, taneltokalismej kinpaleuiaj tekiuanij keman mochiua neteuilis uan kuali kiitaj maj semi miakej kinmiktikan. Sekin akin taixyekanaj itech taneltokalismej kinekij kipiaskej miak tomin, yejua ika kintajtaniaj akin pouij itech nejon taneltokalis. Tein kichiuaj kinextia ke nion tepitsin kiixmatij Dios. Yejua ika, amo kinamiki maj kijtokan ke kiueyichiuaj nion maj tamachtikan itokaykopa Dios (xikonita 1 Juan 4:8).
3. ¿Keniuj momachilia Dios keman kiita tein mochiua itech taneltokalismej tein takajkayauaj?
Komo tejuatsin amo tikonuelita tein mochiua itech taneltokalismej ¡Jiova okachiok! Yejuatsin kintasojta nochin, sayoj ke kikualantiaj akin ompa taixyekanaj porin kichiuaj maj miakej amo motokikan iuan uan kintajyouiltiaj akin ompa pouij. Dios kijtoua ke kinixpolos taneltokalismej tein takajkayauaj uan “amo keman ok ixnesikiu[ij]” (Apocalipsis 18:21). Amo uejkaua nochi nejin taneltokalismej ixpoliuiskej (Apocalipsis 18:8).
MAJ OKACHI TIMOMACHTIKAN
Maj okachi tikitakan keniuj Jiova kinita taneltokalismej tein takajkayauaj. Uan no, maj tikitakan tein kichiuanij. No tikitaskej keyej tein kichiuaj amo moneki mitsontsakuilis okachi xikonixmati Jiova.
4. Dios amo kinselia nochi taneltokalismej
Miakej kinemiliaj ke nochi taneltokalismej tapaleuiaj maj timotokikan iuan Dios. Sayoj ke, ¿yekmelauj nejon? Xikitakan Mateo 7:13, 14 uan ika xitajtokan nejin:
Ijkon kemej kijtoua Biblia, ¿katiyejua ojti kichiua maj tinemikan nochipaya?
Xikitakan VIDEO uan ika xitajtokan nejin:
¿Tamachtia Biblia ke Dios kinselia miak taneltokalismej?
5. Taneltokalismej tein takajkayauaj amo kinextiaj ke Dios tetasojta
Nejin taneltokalismej kichiuanij maj miakej amo motokikan iuan Dios, se taman keman tapaleuiaj itech neteuilis. Uelis nankiitaskej ke ijkon panoua, xikitakan VIDEO uan ika xitajtokan nejin:
Itech Ojpatika Ueyi Neteuilis, ¿toni kichiujkej seki taneltokalismej?
¿Keniuj tikonita tein kichiujkej?
Xikitakan Juan 13:34, 35 uan 17:16. Uan ika xitajtokan nejin:
¿Keniuj momachilia Jiova keman taneltokalismej tapaleuiaj itech neteuilis?
Taneltokalismej tein takajkayauaj kichiuanij miak taman tein amo kuali uan amo kinextiaj ke Dios techtasojta, ¿toni tein tikonitani ijkon kinextia?
Taneltokalismej tein takajkayauaj amo kinextiaj ke Dios techtasojta.
6. Dios kineki maj nochin kisakan itech taneltokalismej tein takajkayauaj
Xikitakan Apocalipsis 18:4a uan ika xitajtokan nejin:
Dios kineki maj nochin kisakan itech taneltokalismej tein takajkayauaj, ¿keniuj tikonita nejon?
7. Xikonsentoka xikonixmati Dios akin yekmelauj nemi
¿Tikauaskej maj kipatakan kemej tikitaj Dios tein kichiuaj taneltokalismej tein takajkayauaj? Xikonnemili ke se tekoneuj amo kikaki tein kiluia ipopaj, kinkaujteua itatuan uan kichiua tein amo kuali. Tepopaj amo kiuelita tein kichiua ikonetsin. Yejua ika, ¿taixejekol yeskia maj tiktajtakoltikan tepopaj porin ikonetsin amo tatakamati?
¿Taixejekol yeskia maj tiktajtakoltikan Jiova tein kichiuaj taneltokalismej uan maj amo timomachtikanok akoni yejuatsin?
TEIN SEKIN KIJTOUAJ: “Uelis tikueyichiuaskej Dios kemej tejuan tiknekiskej”.
¿Tejuatsin no tikonnemilia nejon?
¿Keyej moneki maj amo kipatakan kemej tikitaj Jiova tein kichiuaj taneltokalismej tein takajkayauaj?
TEIN TIKITAKEJ
Kemej taneltokalismej tein takajkayauaj tamachtiaj uan kichiuaj miak taman tein semi amo kuali, kichiuanij maj amo kineltokakanok Dios. Yejua ika amo uejkaua yejuatsin kinixpolos.
Maj tikelnamikikan
¿Keniuj tikonita tein tamachtiaj uan tein kichiuaj taneltokalismej tein takajkayauaj?
¿Keniuj kinita Jiova taneltokalismej tein takajkayauaj?
¿Toni kinchiuilis Dios taneltokalismej tein takajkayauaj?
NO XIKONITA NEJIN
¿Keyej Dios amo kinselia taneltokalismej tein takajkayauaj? Xikonita ome taman.
“¿Nos acercan a Dios todas las religiones?” (Artículo de jw.org)
¿Keyej Jiova kineki maj tikueyichiuakan iniuan oksekin uan amo toselti?
“¿Es necesario pertenecer a una religión?” (Artículo de jw.org)
Se tiopixkat amo kiyekneltokaya tein motamachtiaya itech itaneltokalis. Sayoj ke nejon amo kitsakuilij maj kiixmatini Dios.
“Un sacerdote abandona la Iglesia” (¡Despertad!, febrero de 2015)
Itech semi miak xiujmejya, taneltokalismej kitakajkayauilianij Dios uan kichiuaj maj kineltokakan ke amo tetasojta uan tetajyouiltia. Xikonita keniuj peuak eyi taman tein ika kitakajkayauiliaj Dios.
“Takajkayaualis tein techuejkatilia iuan Dios” (Tanejmachtijkej, 1 metsti noviembre xiuit 2013)