¿Toni kiniluia Biblia namikuanij tein kitsayanaj amat imin ixpan tekiuanij oso mokakauaj?

Jiova kichia maj namikuanij kichiuakan ijkon kemej motenkauaj keman monamiktiaj. Keman yejuatsin kininamiktij yekinika takat uan yekinika siuat, kijtoj: “Takat [...] mosentilis iuan inamik, uan omen mochiuaskej sayoj se”. Miak xiujmej satepan, Jesucristo no yejua nejon kijtoj, uan kiajxitij: “Ika ya nojon in tagat uan in siuat ten Dios kinsentalis namikuanij ya, [...] maj amo se tagat kinxexelos ok” (Génesis 2:24; Mateo 19:3-6). Kemej tikitaj, Jiova uan Jesús kiitaj ke ijkuak omen monamiktiaj, mosentiliaj itech nochi imin nemilis, uan nejon tami sayoj keman semej momikilia (1 Corintios 7:39). Kemej nejin nenamiktilis kitalij Jiova, maj amo niman tiknemilikan tikuejueloskej. Ta Jiova kintauelita akin kitsayanaj amat imin ixpan tekiuanij uan amo motaksaltiaj itech Biblia (Malaquías 2:15, 16).

¿Itech toni tachiualismej Biblia kinkaua namikuanij maj kitsayanakan amat imin ixpan tekiuanij? Kemej timomachtiaj, Jiova kitauelita auilnemilis (Génesis 39:9; 2 Samuel 11:26, 27; Salmo 51:4). Kemej kiteltauelita, kinkaua maj kitsayanakan amat imin ixpan tekiuanij keman semej auilnemi. (Itech capítulo 9, párrafo 7, kimelaua toni mouika iuan auilnemilis.) Tein melauj, Jiova kikauilia tenamik tein kikajkayaujkej, maj yejua kinemili ox iuan yetos inamik oso kitsayanas amat imin ixpan tekiuanij (Mateo 19:9). Yejika, komo kinemilia kiuejuelos nenamiktilis, amo kichiujtoskia se teisa tein Jiova kitauelita. Sayoj ke nion akin tein moajsi itech nechikol, uelis kiiluis maj kichiua nejon. Yejua tenamik tein kikajkayaujkej —keman kiitas kemej moajsi—, xa kinemilis iuan yetos inamik uan okachiok komo kiita ke yekmelauj moyolnonotsakya. Yejua tenamik tein kikajkayaujkej —akin Biblia kikauilia maj kitsayana amat imin ixpan tekiuanij—, kinemilis ox kichiuas oso amo uan kiselis tein kiualkuilis (Gálatas 6:5).

Uan no, namikuanij uelis kipanoskej seki taman tein tel panouaya ouij, uan akin kichiua kemej Cristo kinemilis kikauas oso hasta kitsayanas amat imin ixpan tekiuanij maski amo auilnemi inamik. Keman mochiuas nejon, Biblia kijtoua ke akin kinemilis yas, “maj amo monamikti iuan okse tagat, oso maj oksepa moyoltali uan maj sen yetinemiti iuan” (1 Corintios 7:11). Kemaj, akin kichiua nejon, amo uelis peuas kiixmatis okse aksa uan kinemilis monamiktis iuan (Mateo 5:32). Maj tikitakan seki taman tein tel panouaya ouij kipanouaj namikuanij tein kiniuika maj mokakauakan.

Nion tepitsin kineki kintekipanos ichankauan. Miakej tetakauan amo kintekipanouaj imin chankauan, amo porin amo uelij ta porin amo kinekij, uan nejon kiniuika maj tajyouikan. ¿Toni kiniluia Biblia? “Aksa taneltokakej ten amo kinixpanoltijtiuj ichankauan [...], yejua ne kisekokauak ya ne takuaujtamatilis [...]. Uan kachi ok yejua kimajpeuaskia in Tajtoltsin de Dios, [...] [ke] nekes ten amo taneltokanij.” (1 Timoteo 5:8.) Komo tetakauj nion tepitsin kineki mopatas, tenamik monekis kinemilis ox monekis maj mokauakan imin ixpan tekiuanij, uan ijkon uelis kinpaleuis maj kuali yetokan ikoneuan uan yejua. Axkan, keman kiteluiliskej tetakauj tein momachtia ke amo kineki tatekipanos, tayekananij kuali kiitaskej nejon kuejmol, ta nejon uelis kiuikas maj kikalankixtikan itech nechikol.

Kitelteuia. Se tenamik tein peua tel tateuia uelis kikokos inamik oso kimiktis. Komo tenamik tein tateuia se itaixpantijkauj Jiova, tayekananij moneki kiitaskej nejon kuejmol. Ta akin tel eliuis kualani uan tateuia, uelis kiuikas maj kikalankixtikan itech nechikol (Gálatas 5:19-21).

Tel ouij kikisa maj kiueyichiua Dios. Moajsij tenamikuan tein kitemouaj keniuj kichiuaskej maj imin namik amo kitekitilikan Jiova, oso kiyejyekouaj kinchikaujkauiskej maj kitapanauilikan itanauatiluan Dios. Keman ijkon panos, tenamik tein kitekitilia Dios moneki kiitas ox monekis maj mokakauakan, uan ijkon uelis ‘kitakamatis Totajtsin Dios uan amo tagayot’ (Hechos 5:29).

Keman se tenamik kipanotok nejon taman tein tel panouaya ouij, motelneki maj tikelnamikikan ke nion akin uelis kiiluis maj mokakauakan oso maj sen yetokan. Maski tayekananij uan oksekin tokniuan chikaujkej espiritualmente uelis kipaleuiskej uan kiyolmajxitiskej ika Biblia, moneki kielnamikiskej ke sayoj Jiova senkis kimati tein panoua itech imin nenamiktilis. Komo se akin kichiua kemej Cristo takat oso siuat kitelpanoltia keman kijtoua ikuejmoluan sayoj porin kineki kikauas inamik, kinextijtoskia ke amo kipoujkaita nenamiktilis niono Dios. Uan no, Jiova kimati komo aksa kitatia iamo kuali tachiualis, maski kuali kinemilis keniuj kichiuas. Kemaj, “nochi ten ongak nestinemi [...] uan amo uelis motaatis iuan Dios. Uan nochi tejuan moneki [...] tikmakatiuej cuenta” (Hebreos 4:13). Axkan, komo se tein kichiua kemej Cristo kipanotok se taman tein tel panouaya ouij, uan amo ueliok kichiua okse taman, uan kinemilia kikauas inamik, amo onkak keyej tikijijtoskej. Ta tikmatij ke “nochi tejuan [...] monekis timotenextilitiuej iixpantsinko Totajtsin Dios” (Romanos 14:10-12).