Dios kichiuak se netenkaualis iuan Abrahán

PANOKAYA kemej 350 xiujmej keman ualaj Tetsaujkakiouit. Abrahán nemia itech altepet Ur tein axkan moixmati kemej Irak kampa motania miak tomin. Yejua semi takuaujtamatia iuan Dios, sayoj ke moyejyekoskia itakuaujtamatilis. Maj tikitakan toni mochiuak.

Jiova kiiluij maj kisani kampa nemia uan maj yani itech tal tein pouia Canaán. Abrahán niman tatakamatik. Kisak iuan inamik tein motokaytij Sara uan isobrino tein motokaytij Lot, uan nochin ichankauan. Keman yetoyajya Canaán, moajchiujtinemiaj uan nemiaj itech kali tachijchiuj ika taken. Jiova motenkauak iuan Abrahán ke nochin kalyetouanij itech taltikpak kiseliskiaj tatiochiualis itechkopa Abrahán. No kiiluij ke tel miakej eskiaj ikoneuan uan imin axka eskia nochi Canaán.

Abrahán uan Lot kinpiayaj miakej ichkamej uan kuakuejmej. Abrahán katka kualtakat, yejika kikauilij isobrino Lot maj kiixpejpenani tal kampa kiuelitaskia. Lot kiixpejpenak tal kampa panouaya ueyiat Jordán, porin ompa okachi taonkaya, uan mochantij achka Sodoma. Sayoj ke tein ompa nemiaj tel auilneminij katkaj uan ueyi tajtakouayaj iixpan Jiova.

Satepan ke Abrahán uan Lot moxelojkej, Jiova motenkauak iuan Abrahán ke ikoneuan tel miakej eskiaj kemej sitalimej ne iluikak. Abrahán takuaujtamatia iuan Jiova, sayoj ke isiuatsin Sara amo uelia kinpiaya konemej. Ompa, keman Abrahán kipiaya 99 xiujmej uan Sara kiajxitijtoyaya 90, Dios kiniluij ke yaya kipiatij se konetsin. Uan ijkon mochiuak. Sara kipiak se konetsin tein kitokaytijkej Isaac. Uan maski Abrahán kinpiak okseki ikoneuan, Temakixtijkej tein Dios motenkauak itech Edén ke kititaniskia, ualeujtoskia itechkopa Isaac.

Lot kisentokaya nemia iuan ichankauan itech altepet Sodoma. Sayoj ke amo keman moojtokaltij kemej nejon auilneminij, ta yejua katka se takat yolkuali. Yejika se tonal keman Jiova kinemilij kiixpolos Sodoma, achto kintitanik seki ángeles maj kinejmachtitij Lot. ­Kiiluijkej maj cholouani iuan ichankauan uan maj amo tachianij taikampa. Ompa, Dios kichiuak maj uetsi tit uan azufre tein ika kinixpoloj akin nemiaj Sodoma, ijkon kemej Gomorra, se altepet tein achka moajsia. Lot uan ome isiuapipiluan mopaleuijkej. Sayoj ke inamik tachiak taikampa xa porin kiyolnotsaya nochi tein kikaujka. Kemej amo tatakamatik, momikilij.

​(Motaksaltia itech Génesis 11:​10–​19:​38.)