Tatitanilmej tamachtijkej ika yolchikaualis

MAJTAKTI tonal satepan ke Jesús yajki iluikak, keman judíos kipiayaj iluit tein motokaytiaya Pentecostés itech xiuit 33, mosentilijkej kemej 120 imomachtijkauan itech se kali ompa Jerusalén. Sepasaj taijkoyokak kemej se chikauak ejekat, uan imomachtijkauan Jesús peuak tajtouaj okseki tajtolmej tein amo kiixmatiaj. ¿Toni mochiujtoya? Dios kinmakak itekitikauan yektikatsin espíritu.

Itech nejon altepet moajsiaj tel miakej tein uejuejka kayomej katkaj tein teuantitoj itech nejon iluit. Nochin kimoujkakakkej keman kiitakej ke imomachtijkauan Jesús ueliaj tajtouayaj imiuan itech imin tajtol. Amo kimatiaj keyej mochiujtoya nejon, yejika Pedro kinelnamiktij ke tanauatijkej Joel kijtojka ke Dios kinmakaskia iespíritu itekitikauan uan ueliskiaj kichiuaskiaj uejueyi taman tein se kimoujkaita (Joel 2:​28, 29). Nejin senkis kinextiaya ke nejon tonal Dios peuak kinselia oloch tokniuan tein kichiuayaj kemej Cristo, uan amook Israel. Yejika nochin akin kinekiskiaj kitekitiliskej Dios, monekia mochiuaskej itatojtokakauan Cristo.

Sayoj ke tein kitauelitayaj Cristo, peuak kintajyouiltiaj imomachtijkauan. Se tonal sekin kintsakkej, sayoj ke nejon youak se ángel kinkixtij uan kiniluij maj kisentokanij tamachtianij. Keman tanesik, kalakkej templo uan peuak ika tamachtiaj Jesús. Kemej tayekananij itech taneltokalis tel kualantoyaj, kintakaualtijkej maj amo tamachtikanok. Sayoj ke tatitanilmej tanankilijkej ika yolchikaualis: “Semi moneki ke maj tiktakamatikan Totajtsin Dios uan maj amo achto tikintakamatikan in tagayot” (Hechos 5:​28, 29).

Kemej kiitayaj ke kisentokayaj tamachtiayaj, peuak okachi kintajyouiltiaj. Esteban, se imomachtijkauj Jesús, kimiktijkej ika tet porin seki judíos kijtouilijkej ke kiuijuikaltij Dios. Semej tein iixpantik uan kiselij maj kimiktikan Esteban, yejua Saulo tein kayot Tarso, se telpoch tein kinteltauelitaya imomachtijkauan Jesús. Satepan, Saulo moojketsteuj Damasco porin kinekia kinkitskitiuj nochin imomachtijkauan ­Jesús tein kinajsiskia. Sayoj ke itech ojti, ne iluikak ualpetanik se tanex uan kiixpojpoloj. Ompa, kikakik ke aksa tajtoj uan kiiluij: “Tejua Saulo, ¿keyej [...] tinechtauelitstinemi?”. Kemej amo kimatia akoni, kitajtanij: “¿Akoni tejuatsin[?]”. Uan yejua kinankilij: “Nejuatsin [...] ni Jesús” (Hechos 9:​3-5).

Eyi tonal satepan, se imomachtijkauj Jesús tein motokaytiaya Ananías, kititanik maj kiixpajtiti Saulo. Nejon takat moauij uan peuak tamachtia ika ueyi tanejnekilis. Satepan, moixmatik kemej tatitanil Pablo, se itatojtokakauj Cristo tein uejuejka tamachtito ika ueyi tanejnekilis.

Yekinika, imomachtijkauan Jesús kinmachtiayaj ika iTekiuajyo Dios sayoj judíos uan samaritanos. Sayoj ke se tonal, se ángel kimonextilij Cornelio se tayekankej soldado romano tein kineltokaya Dios tein melauak, uan kitatitauij tatitanil Pedro. Uan yejua yajki imiuan okseki imomachtijkauan Jesús uan kimachtito nejon tayekankej uan nochin ichankauan. Keman Pedro tajtojtoyaok, nejon kalyetouanij kiselijkej yektikatsin espíritu, uan Pedro tanauatij maj kin­auianij itokaykopa Jesús. Nejon tonal akin yeskia ueliskia kiseliskia nemilis nochipaya uan amo sayoj itech seki altepemej.

​(Motaksaltia itech Hechos 1:1–​11:​21.)