¿Keyej Dios kikaua maj onka tajyouilis uan tein amo kuali?

1. ¿Keniuj peuak mochiua tein amo kuali?

Tein amo kuali peuak mochiua itech taltikpak keman Satanás kijtoj yekinika takajkayaualis. Yejua achto katka se ángel tein yolkuali, sayoj ke amo kisentokak ‘kitekitiltij tein melauj’ (Juan 8:44). Kinekik maj yejua kiueyichiuakan; nejon se taman tein sayoj kinamiki kiselis Dios. Kikajkayauak Eva, yekinika siuat, uan kichiualtij maj kitakamati yejua uan amo Dios. Adán no amo tatakamatik kemej Eva. Tein kichiuak Adán techualkuilij tajyouilis uan mikilis. Xikonixtajtolti Génesis 3:1-6, 19.

Keman Satanás kiiluij Eva maj amo kitakamati Dios, kipeualtij se taixnamikilis. Amo kinekik kinextis ke Jiova kinamiki maj taixyekana, ke yejuatsin okachi Ueyichiujkej. Kemej tel miakej taltikpakneminij kichiuaj kemej Amokuali, kiixtopeuaj itaixyekanalis Dios, ijkon Satanás mochiuak “tayekanke [...] ten nikan taltikpak takitskijtok ika ne ichikaualis”. Xikonixtajtolti Juan 14:30 uan 1 Juan 5:19.

2. ¿Amo kuali tachijchiuak Dios?

Nochi tein Dios kichiua amo teyi kipoloua. Taltikpakneminij uan ángeles, Dios kinchijchiuak kemej ueliskiaj kitakamatiskiaj nochipa (Deuteronomio 32:4, 5). Yejuatsin techchijchiuak maj tiuelikan tikixpejpenakan tein kuali uan tein amo kuali. Ika nejon ueli tiknextiliaj Dios ke tiktasojtaj. Xikonixtajtolti Santiago 1:13-15 uan 1 Juan 5:3.

3. ¿Keyej Dios kikaujtok maj onka tajyouilis?

Jiova kikaujtok sayoj seki tonalmej maj kiixnamikikan iueyitaixyekanalis. ¿Keyej? Ijkon kinextia ke sayoj itaixyekanalis Dios uelis kinpaleuis taltikpakneminij (Eclesiastés 7:29; 8:9). Axkan ke panokya seis mil xiujmej, amo teyi ika tiomeyolouaj: taixyekananij itech nikan taltikpak amo uelij kijkuaniaj neteuilis, tein amo kuali, tein amo melauak nion kokolismej. Xikonixtajtolti Jeremías 10:23 uan 2 Pedro 3:7-9.

Itaixyekanalis Dios kemaj kinpaleuia akin kiseliaj, amo kemej taixyekanalis tein onkak nikan taltikpak (Isaías 48:17, 18). Amo uejkaua, Jiova kinixpolos nochi tekiuajyomej tein onkak nikan taltikpak. Sayoj akin kinekiskej maj Dios kinixyekana nemiskej itech taltikpak (Isaías 11:9). Xikonixtajtolti Apocalipsis 11:15.

Xikonita video ¿Keyej Dios kikaua maj onka tajyouilis?

4. Kemej Dios ayamo kiixpoloua tein amo kuali, ¿toni ueli tikchiuajok?

Satanás kijtoj ke taltikpakneminij kitekitiliaj Dios sayoj porin kinekij kiseliskej nepaleuil. ¿Uelis tikonnextis ke nejon se takajkayaualis? ¡Kemaj! Kemej Dios ayamo kiixpoloua tein amo kuali, ika tein tikchiuaj itech tonemilis ueli tiknextiaj ox tikpaleuijtokej itaixyekanalis Dios oso inintaixyekanalis taltikpakneminij. Xikonixtajtolti Job 1:8-12 uan Proverbios 27:11.

5. ¿Keniuj tiknextiaj ke tiknekij maj Dios techixyekana?

Yekinika, moneki tikmatiskej keniuj kineki maj tikueyichiuakan uan maj tikchiuakan kemej tamachtia taneltokalis tein melauak, ta ompa motamachtia ika Biblia (Juan 4:23). Uan no, kemej Jesús, maj amo timokalakikan itech nion se taman tekiuajyot nion itech neteuilis, ta ijkon tiknextijtoskej ke tikixtopeuaj itaixyekanalis Satanás. Xikonixtajtolti Juan 17:14.

Satanás kitekitiltia ichikaualis uan ijkon kichiua maj taltikpakneminij kiitakan ke kuali yetok auilnemilis uan okseki taman tein teijtakoua. Keman tikixtopeuaj nejon tachiualismej, seki totasojikniuan oso tochankauan uelis techkejkeloskej oso techtajyouiltiskej (1 Pedro 4:3, 4). Komo ijkon panoua, maj tikintemokan akin kitasojtaj Dios uan maj tiktakamatikan ikuali tanauatiluan toTajtsin. Ijkon, tiknextiskej ke Satanás takajkayauak keman kijtoj ke amo akin kitakamati Dios keman kipia ouijkayomej. Xikonixtajtolti 1 Corintios 6:9, 10 uan 15:33.

Kemej Dios techtasojta nejon kinextia ke yekmelauj Dios kiixpolos tajyouilis uan tein amo kuali. Akin kinextiskej ke takuaujtamatij iuan Dios nemiskej nochipaya nikan taltikpak. Xikonixtajtolti Juan 3:16.