NETAJTANILMEJ TEIN KISAJ ITECH BIBLIA
¿Akoni taixyekantok nikan taltikpak?
Komo Dios taixyekanaskia nikan taltikpak, ¿onkaskia miak tajyouilis?
Miakej taltikpakneminij kinemiliaj ke Dios taixyekantok nikan taltikpak. Sayoj ke komo nejon melauak yeskia, ¿onkaskia miak tajyouilis? (Deuteronomio 32:4, 5.) Tein melauj, Biblia tamachtia ke itech taltikpak taixyekantok se tekiuaj akin tel amo yolkuali. (Xikonixtajtolti 1 Juan 5:19.)
¿Uan keniuj nejon taixyekankej uelik moaxkatilij taixyekanalis nikan taltikpak? Keman peuak ininnemilis taltikpakneminij, se ángel, Satanás, kiixnamikik Dios uan kinolinij yekinika takat uan yekinika siuat maj no ijkon kichiuanij (Génesis 3:1-6). Takat uan siuat kiixpejpenkej kitajtolkakiskej, uan ijkon kikaujkej maj yejua kinixyekanaskia. Sayoj Dios akin nochi ueli kichiua kinamiki kinixyekanas taltikpakneminij, sayoj ke yejuatsin kineki maj yejuan kitakamatikan porin kitasojtaj (Deuteronomio 6:6; 30:16, 19). Tetayokoltij tikijtoskej ke tel miakej taltikpakneminij no ijkon kichiuanij kemej Adán uan Eva. (Xikonixtajtolti Apocalipsis [Revelación] 12:9.)
¿Akoni kiyektalis kuejmolmej tein kipiaj taltikpakneminij?
¿Kikauas Dios maj Satanás nochipaya taixyekana nikan taltikpak? Amo. Ta Dios kichiuas maj Jesucristo kiyektali nochi tein kijtakouani Satanás. (Xikonixtajtolti 1 Juan 3:8.)
Dios kimakani tanauatil Jesús maj kiixpolo Satanás (Romanos 16:20). Ompa, Dios kinixyekanas taltikpakneminij uan kichiuas maj nemikan ika yolpakilis uan yolseuilis kemej ipa kinekia. (Xikonixtajtolti Apocalipsis 21:3-5.)