Techyolpaktia tikmatiskej se taman tein amo momatia

¿Kemansa mitstapouianij teisa tein amo akin kimatia?...a Biblia ika tajtoua miak taman tein amo akin kimatia tein moixmati kemej tamachtilis tein Dios amo kitematiltijtoya. Yejua ika amo akin kiixmatia. Hasta ángeles no kinekiaj kiixmatiskej. ¿Tikuelitaskia tikmatis toni ika titajtouaj?...

Tel miak xiujmejya, Dios kichijchiuak yekinika takat uan yekinika siuat. ¿Keniuj motokaytiayaj?... Takat Adán uan siuat Eva. Dios kintalij maj nemikan itech se kualtsin xochital kampa motatokaytiaya Edén. Dios kinekia maj yejuan uan ininkoneuan kichiuakan nochi taltikpak se kualtsin xochital kemej Edén. Kinekia maj nochin nemikan nochipaya itech se xochital. Sayoj ke nejon amo mochiuak. ¿Keyej amo?

Porin Adán uan Eva amo kitakamatkej Dios, uan yejua ika axkan amo tinemij itech se xochital. Sayoj ke Dios kijtoj ke kichiuas maj nikan taltikpak mochiua takualtsinkan. Nochin nemiskej nochipaya uan yolpakiskej. ¿Keniuj kichiuas tein kijtoj? Tel miak xiujmej amo akin kimatik.

Sayoj ke yolik momatik. Keman Jesús ualaj nikan taltikpak, yejua okachi tamachtij tein kijtosnekia nejon tein amo momatia. Kijtoj ke nejon katka iTekiuajyo Dios. Keman tiktataujtiaj Dios, tiktajtaniaj maj uiki nejon Tekiuajyot. ¿Keyej? Porin iTekiuajyo Dios kichiuas maj taltikpak mokepa se kualtsin xochital.

¿Tikuelitaskia tinemis itech nejon xochital?... Xikelnamiki ke sayoj akin kitakamatij Dios nemiskej itech xochital. Biblia techtapouia keniuj miakej takamej uan siuamej kitakamatkej Jiova Dios. Itech nejin amaix tikitaskej akonimej katkaj uan keniuj uelis tikchiuaskej kemej yejuan. ¿Tikuelitaskia tikmatis toni kichiujkej?...