Josías kuali kiixpejpenak akin iuan mouikas

¿Tiknemilia ke ouij se kichiuas tein Jiova kineki?... Tel miakej kinemiliaj ke kemaj. Sayoj ke Biblia tamachtia ke amo ijkon. Techtapouia tein kipanok Josías, se telpoch akin semi mochikauak kitekitilis Jiova. Sayoj ke kuali kinixpejpenak akin iniuan mouikaskia uan yejuan kipaleuijkej. Maj tikitakan toni kichiuak Josías uan akonimej iniuan mouikaya.

Ipopaj Josías katka Amón, akin tekiuajtia Judá. Amón tel amo yolkuali katka uan kinueyichiuaya tiotsitsin. Keman Amón momikilij, Josías mochiuak tekiuaj itech xolal Judá. ¿Tikmati kanachi xiujmej kipiaya Josías keman mochiuak tekiuaj? ¡Sayoj kipiaya chikueyi xiuit! ¿Tiknemilia ke no katka amo yolkuali kemej ipopaj?... Amo.

Maski semi katka nojnelok, Josías kinekia kitakamatis Jiova. Yejua ika, kitemoj akin kuali iniuan mouikaskia. Kinixpejpenak sayoj akin kitasojtayaj Dios, uan yejuan kipaleuijkej Josías maj kitakamati Jiova. ¿Akonimej kuali iniuan mouikaya Josías?

Semej katka Sofonías. Yejua katka se itanauatijkauj Jiova, uan monekia kiniluis nejin tajtolmej akin nemiaj Judá: “Komo nankisentokaj nankinueyichiuaj tiotsitsin, nantajyouiskej”. ¿Toni kichiuak Josías? ¿Kikakik tein kijtoj Sofonías? Kemaj. Yejua ika, Josías nochipa kiueyichiuaya Jiova, uan amo tiotsitsin.

Okse akin kuali iuan mouikaya Josías katka Jeremías. Yejuan uampoymej katkaj. Josías uan Jeremías moseniskaltijkej porin ininchan amo ueuejka moajsiaj. Yejuan mosenpaleuijkej uan ijkon kichiujkej tein kuali uan kitakamatkej Jiova. Tel kuali mouikakej uan keman Josías momikilij, Jeremías kijkuiloj se nekuikatil kampa kijtouaya ke kiteltemouaya Josías.

¿Melauj ke techmachtia miak taman tein kichiuak Josías?... Keman Josías katka okichpilok, kinekia kitakamatis Dios. Yejua kimatia ke monekia mouikas iniuan akin kitasojtayaj Jiova porin yejuan kipaleuiskiaj maj kichiua tein kuali. ¿Melauj ke tejua no tikneki tiktakamatis Jiova? Yejua ika moneki tikixpejpenas timouikas sayoj iniuan akin kitasojtaj Jiova.