Josías kipatiuita iTanauatil Dios

Josías peuak tekiuajti Judá keman kipiaya chikueyi xiuit. Itech nejon tonalmej, taltikpakneminij kitekitiltiayaj naualot uan kinueyichiuayaj tiotsitsin. Keman Josías kipiaya 16 xiujmej, kinekik kimatis keniuj kiueyichiuas Jiova kemej yejuatsin kiyolpaktia. Satepan, keman kipiaya 20 xiujmej, peuak kinixpoloua tiotsitsin uan altares itech nochi altepet. Uan keman kipiaya 26 xiujmej, kiitak maj onkani nochi tein ika kiyekchijchiuaskiaj itemplo Jiova.

Hilquías, akin kinixyekanaya tiopixkamej, kiajsik itech templo amatajkuilol tein kipiaya iTanauatil Dios. Nejon amatajkuilol xa yejua tein kijkuilojka Moisés. Safán, itajkuilojkauj tekiuaj, kiuikilij Josías nejon amatajkuilol uan peuak kiixtajtoltilia. Josías kikakik uan kiajsikamatik ke itech xolal miak xiujmejya amo kitakamattoyaj Jiova. Ompa tekiuaj Josías kiluij Hilquías: “Jiova tel kualantok touan. Iuan xitajto uan maj techilui toni moneki tikchiuaskej”. Jiova kimatiltij Huldá, siuat akin katka tanauatijkej, nejin tanauatil: “Akin nemij Judá nechkaujkej. Nikintatsakuiltiti, sayoj ke amo ijkuak tekiuajtitos Josías, porin yejua yolyemanik”.

Keman tekiuaj Josías kikakik nejon, yajki templo uan kinsentilij akin nemiaj Judá. Satepan, kinixtajtoltilij iTanauatil Jiova. Josías uan taltikpakneminij motenkaujkej kitakamatiskej Dios ika nochi ininyolo.

Akin nemiaj Judá uejkaujya amo kichiujtoyaj Pascua. Sayoj ke Josías kiixtajtoltij itech Tanauatil ke Pascua monekia mochiuas nochi xiujmej, yejua ika kiniluij taltikpakneminij: “Tikchiuatij Pascua tein ika tikiluichiuilitij Jiova”. Satepan, Josías tanauatij maj kisentilianij miak nemaktilmej uan maj moajsinij akin mokuikatiskiaj itech templo. Ompa, kichiujkej Pascua. Uan satepan, chikome tonalmej kichiujkej Iluit keman kikuayaj Pantsin tein amo Kixokoltiayaj. Kichiujkaj se Pascua kemej nejon keman Samuel yoltoyaok. Josías yekmelauj kitasojtaya iTanauatil Dios. ¿Uan tejua? ¿No tikuelita tikixmatis Jiova?