¿Toni iTekiuajyo Dios?

TEIN KIJTOUA BIBLIA

“Dios akin nemi iluikak kitalis se tekiuajyot tein amo keman ixpoliuis.” (Daniel 2:44, Traducción del Nuevo Mundo.)

“[Jesús] kinyekantinemis in pueblojuani [...] sen nachipa. Uan in chikaukauelilis de Jesús Temakixtijke amo keman kuetauis.” (Lucas 1:32, 33, El Nuevo Testamento en Náhuatl de la Sierra de Puebla.)

KENIUJ TECHPALEUIA

• Se taixyekanalis melauak tein uelis techpaleuis tisejsemej (Isaías 48:17, 18).

• Amo uejkaua, itech se yankuik taltikpak, kichiuas maj tinemikan ika yolpakilis uan maj amo onkaok kokolismej (Apocalipsis [Revelación] 21:3, 4).

¿ONKAK KEYEJ TIKNELTOKASKEJ TEIN KIJTOUA BIBLIA?

Kemaj, maj tikitakan ome:

• Jesús kinextij tein kichiuas itaixyekanalis Dios. Yejua kinmachtij itatojtokakauan maj motataujtikan maj taixyekana toTajtsin uan maj mochiua itanejnekilis nikan taltikpak (Mateo 6:9, 10). No kinextij keniuj mochiuas nejon tein tajtanik.

  Keman nemia nikan taltikpak, Jesús kintamakak akin mayantoyaj, kinpajtij akin mokokouayaj uan hasta kichiuak maj oksepa nemikan akin momikilijkajya (Mateo 15:29-38; Juan 11:38-44). Kemej Jesús yeski taixyekankej akin Dios kiixtalij, uelik tepitsin kinextij kualtsitsin tatiochiualismej tein kiseliskej akin mokauaskej maj kinixyekana (Apocalipsis 11:15).

• Tein mochiujtok semanauak taltikpak kinextia ke amo uejkaua Dios peuas taixyekanas. Jesús kijtoj ke achto ke itaixyekanalis Dios kiualkuiskia yolseuilis nikan taltikpak, senkis moitaskia neteuilismej, mayan uan talolinilis (Mateo 24:3, 7).

  Axkan tikitstokej nochi nejon kuejmolmej. Yejua ika, uelis tikyekmatiskej ke amo uejkaua itaixyekanalis Dios tayektalis.