TAXELOL MAKUIL

Ximokepakan iuan “nanmotajpixkauj uan nanmotayekankauj”

¿Tikonixnamiktok semej ouijkayomej tein tikitakej itech nejin amaix? Komo ijkon, amo sayoj tejuatsin, miakej itekitikauan Jiova ne uejkauj uan axkan kiixnamikinij kuejmolmej kemej nejon. Ijkon kemej yejuan, Jiova uelis mitsonpaleuis xikonixnamiki.

“Nikajsikamatik ke Jiova amo keman nechsenkauak, sayoj monekia nikajsis ojti tein oksepa iuan nechuikaskia”

JIOVA mitsonyekanas keman tionmokepas. Yejuatsin mitsonpaleuis xikonixnamiki tein mitsontekipachoua, tein mitsonyolxokolia uan xikonpia se tanemilil chipauak tein mitsonyolseuis. Keman tionmokepas, xa tikonnekis oksepa tikontekitilis Jiova iniuan tokniuan itech nechikol. Mitsonpanos ijkon kemej seki itatojtokakauan Cristo itech yekinika siglo, akin tatitanil Pedro kintajkuilouilij: “Porin namejuan, kemej ichkamej, nanpoliujtoyaj; sayoj ke axkan nanmokepkej iuan nanmotajpixkauj uan nanmotayekankauj” (1 Pedro 2:25, TNM).

Oksepa kuali tionmouikas iuan Jiova, yejua tein okachi kuali tein uelis tikonchiuas. ¿Keyej? Yekinika, porin semi tikonyolpaktis Jiova (Proverbios 27:11). Kemej tejuatsin tikonmati, tein tikchiuaj uelis kiyolpaktis Dios oso kiyolkokos. Sayoj ke, yejuatsin amo techchikaujkauia maj tiktasojtakan nion maj tiktekitilikan (Deuteronomio 30:19, 20). Se motelmachtijkej ika Biblia kijtoj ke amo akin uelis kichikaujkauiskej maj tetasojta, ta moneki kisas itech iyolo. Keman tiktekitiliaj Jiova porin tiktasojtaj, tiknextiaj ke tikchiuaj ika nochi toyolo. Uan nejon semi kiyolpaktia, porin yejuatsin kiita kemej se ueyi netetayokolil keman amo tikauaj. Amo onkak okse taman tein uelis okachi techyolpaktis ke tikueyichiuaskej Jiova kemej kinamiki (Hechos 20:35; Apocalipsis 4:11).

Ika netasojtalis, itech nechikol kuali kiseliaj se tokniuj siuat akin amo kitekitiliaok Jiova

Uan no, keman tionmokepas, tikonselis tamachtilis tein mitsonpaleuis maj mochikaua mokuali uikalis iuan Jiova (Mateo 5:3). Kemej neskayot, miakej motajtaniaj keyej tinemij uan amo kiajsij itanankilil nejin netajtanil uan okseki tein motelnekij. Jiova techchijchiuak maj tiknekikan iuan timotokikan uan kimati ke senkis tiyolpakiskej sayoj komo tiktekitiliaj. Yejua ika, nion teyi okachi mitsonyolpaktis ke tikonueyichiuas Jiova porin tikontasojta (Salmo 63:1-5).

Jiova kineki xionmokepa itech ixolal. Uan kinextia ika nejin amaix tein tikonpia momako. Moijkuiloj ika miak nejmachkayot uan tiktajtanijkej Jiova maj techixyekana. Satepan, xa se tayekankej oso okse tokniuj mitsonmakak uan tejuatsin tikonixtalij tikonixtajtoltis. Tein melauj, tein tikonixtajtoltij xa ajsik itech moyolo. Nochi nejon kinextia ke Jiova amo mitsonelkauani uan ke mitsonselis ika netasojtalis (Juan 6:44).

Techyolseuia tikmatiskej ke Jiova amo kinelkaua iichkauan tein poliujtokej. Yejua nejon tein kimatik se tokniuj akin itokay Donna. Yejua kimelaua: “Yolik nikaujtiyajki tamachtilis tein melauak, sayoj ke miakpa nitanemiliaya itech Salmo 139:23, 24, tein kijtoua: ‘Xinechita, noDios, uan xikixmati noyolo. Xinechita, uan xikixmati notanemililuan tein tetekipachoua, uan xikita ox onkak notech se ojti tein teyolkokoj, uan xinechyekana itech ojti tein amo keman tami’. Amo nikmachiliaya ke nipouia itech nejin taltikpak kampa taixyekantok Satanás; tein melauj, amo keman niyolpakik ompa. Nikmatia ke monekia niyetos itech inechikol Jiova. Nikajsikamatik ke Jiova amo keman nechsenkauak, sayoj monekia nikajsis ojti tein oksepa iuan nechuikaskia. ¡Semi niyolpaki maj nimokepani!”.

Jiova mitsonyekanas keman tionmokepas

Tiktataujtiaj Jiova oksepa xikonmachili yolpakilis tein yejuatsin kitemaka (Nehemías 8:10). Uan xikonyekmati ke amo keman mitsonyolkokos oksepa tikonpias se kuali uikalis iuan moTajtsin Jiova.

Tein xa tionmotajtanijtok

¿TONI MONEKI YEKINIKA NIKCHIUAS?

Satepan keman aksa kipiak se kokolis, moneki panos seki tonalmej tein kipaleuis maj mochikaua uan ijkon yolik kichiujtiyas tein mojmostaj kichiuaya. No ijkon, amo moneki ijsiujka xikonchiua nochi tein mitsonpaleuis xikonchikaua mokuali uikalis iuan Jiova. Ta, xikontemo tionmomachtis tepitsin iTajtol Dios mojmostaj. Xionpeua xikonixtajtolti oso xikonkaki seki tajkuilolmej itech Biblia seki minutos, xionmomachti semej toamaixuan, xikonixmati jw.org, Internet kampa timoteixmatiltiaj oso xikonita semej videos tein tikonajsis itech jw.org. Uan no, xionmochikaua tionyas se nechikol niman keman tionuelis. Sayoj ke tein okachi moneki, xikontataujti Jiova uan xikonilui maj mitsonpaleui. Biblia kijtoua: “Xikpanoltilijtiyakan Dios nochi namoyolkuejmololisuan porin Yejuatsin semi namechyolnejneki de namechyekpixtinemis” (1 Pedro 5:7).

“Satepan keman nikauak tamachtilis tein melauak, hasta nipinauaya nimotataujtis. Sayoj ke, nimoyolchikauak uan nikchiuak uan satepan se tayekankej nechkalpanoko. Nechpaleuij maj nikita ke Jiova kichixtoya maj nimokepa. Nechiluij maj mojmostaj nikixtajtolti Biblia. Ijkon nikchiuak uan nejon nechpaleuij maj oksepa niyouj nechikolmej. Satepan, oksepa peuak nitanojnotsa. Semi niyolpaki maj Jiova oksepa nechseliani.” (Eeva)

¿KENIUJ NECHSELISKEJ ITECH NECHIKOL?

Xikonyekmati ke tokniuan semi yolpakiskej keman oksepa mitsonitaskej. Amo mitsonijijtoskej. Mitsoniluiskej ke semi mitsontasojtaj uan kitemoskej mitsonyolchikauaskej (Hebreos 10:24, 25).

“Nipinauaya nimokepas itech Kali kampa tiMosentiliaj. Nechtekipachouaya toni kijtoskiaj keman nechitaskiaj. Sayoj ke semej tokniuan siuamej akin xiuejya, akin amo nikitstoya treinta xiujmej, nechiluij: ‘¡Nokonetsin, kuali ke timokepakya kalijtik!’. Nejon nechyololinij. Nikmachilij ke yekmelauj nimokepak kalijtik.” (Javier)

“Niyajki itech Kali kampa tiMosentiliaj uan kemej amo niknekia maj nechitakan, nimotalij hasta taikampa. Sayoj ke, miakej nechixmatkej porin niyaya keman katka ninojnel. Kuali nechselijkej uan nechnauajkej ika miak netasojtalis, nejon kichiuak maj semi niyolseui. Kemej yeskia nimokepak kalijtik.” (Marco)

¿KENIUJ NECHITASKEJ TAYEKANANIJ?

Tayekananij yeskij kualtakamej mouan. Mitsoniluiskej ke semi kinyolpaktia oksepa xikontemo tikontasojtas tamachtilis tein melauak (Apocalipsis 2:4). Mitsonajsikamatiskej uan mitsonpaleuiskej “ika ne yolyemanalis” xikonmelaua nepololmej tein tikonpiak (Gálatas 6:1; Proverbios 28:13). Xa kiixtaliskej maj se tokniuj mouan momachti Biblia, ika inepaleuil semej amaixmej kemej ¡Uelis tiyolpakiskej nochipaya! oso “Acerquémonos a Jehová”. Tayekananij mitsonpaleuiskej itech tein tikonchiujtiyas (Isaías 32:1, 2).

“Itech chikueyi xiuit keman amo niktekitiliayaok Jiova, tayekananij nochipa kitemojkej nechpaleuiskej. Semej tayekananij nechkalpanoto uan nechnextilij seki taixkopimej tein timosenkixtilijkaj. Nejon nechelnamiktij tein kuali tein nikpanoka, yejua ika oksepa niknekia niyolpakis kemej ijkuak niktekitiliaya Jiova. Tayekananij nechnextilijkej miak netasojtalis uan nechpaleuijkej maj oksepa nikchiua itekiyo Dios.” (Victor)

“Jiova mitsyolchikauas”

Itech amaix Maj timokuikatikan ika yolpakilis iixpan Jiova, tikonajsis nekuikatilmej tein teyololiniaj uan mitsonyolchikauaskej oksepa xikontekitili Jiova. Kemej neskayot, xiontanemili itech itajkuilol nekuikatil tapoual 38, tein mokixtia itech 1 Pedro 5:10 uan tein motokaytia “Jiova mitsyolchikauas”.

¿Keyej Jiova moDios semi mitstasojtak

uan mitsixmatiltij tein melauak?

Porin yejua kiitak ke tikyolnejnekia

tikchiuas nochi tein kiyolpaktia.

Timotenkauak tiktekitilis,

uan Dios nochipa mitsmatampauis.
Kitemakak Jesús maj mitsmakixtiki.

¡Dios kinextij ke mitsteltasojta!

Mitstiochiuas itech nochi monemilis;

kineki xiyolpaki nochipa.

MoTajtsin amo keman kielkauas

netasojtalis tein tiknextilia.

(ESTRIBILLO)

Ika Jesús iesyo, Jiova mitsmakixtij.

MoDios mitsyekpias uan mitsyolchikauas.

Amo keman mitskauas: ¡tejua tiiaxka!

Jiova mitsyekpias uan mitsyolchikauas.

Komo tikonneki tikonkakis nejin nekuikatil ika coro uan orquesta uan okseki nekuikatilmej, xikontemo itech www.jw.org/es.