Jiova semi mitsontasojta

1. ¿Toni kiita Jiova keman kinita itekitikauan?

¡SEMI techyolpaktia tikmatiskej ke “Jiova yolpaki ika ixolal”! (Sal. 149:4). Yejuatsin kiita tokualneskayouan, tein ueli tikchiuaj uan techpaleuia maj ueli iuan timouikakan. Komo nochipa tiktakamatij, amo keman techkauas (Juan 6:44).

2. ¿Keyej seki tokniuan ouij kinkisa kineltokaskej ke Jiova kintasojta?

² Xa se tokniuj kijtos: “Nikmati ke Jiova kintasojta nochin itekitikauan, sayoj ke ¿no nechtasojta nejua?”. ¿Keyej seki tokniuan xa motajtaniaj nejin? Maj tikitakan tein kijtoua Oksana,b akin semi tajyouij keman konetok katka: “Semi niyolpakia keman nimoauij uan nimochiuak precursora. Sayoj ke 15 xiujmej satepan peuak nikelnamiki tein amo kuali tein nikpanoka. Niknemilij ke amo nikyolpaktiayaok Jiova uan ke amo nechnamikia maj nechtasojta”. Se precursora akin monotsa Yua, akin no semi tajyouij keman konetok katka, kijtoua: “Nimotemaktij iuan Jiova porin niknekia nikyolpaktis, sayoj ke niknemiliaya ke yejuatsin amo keman nechtasojtaskia”.

3. ¿Toni tikitaskej itech nejin tamachtilis?

³ Tejuan xa no semi tiktasojtaj Jiova ijkon kemej nejin ome tokniuan siuamej, sayoj ke xa ouij techkisa tikneltokaskej ke techtasojta. Itech nejin tamachtilis tiknankiliskej nejin ome netajtanilmej: ¿keyej moneki tikneltokaskej ke Jiova yekmelauj techtasojta? Uan ¿toni uelis tikchiuaskej keman tiknemiliskej ke amo techtasojta?

PANOS TEIN AMO KUALI KOMO TIKNEMILIAJ KE JIOVA AMO TECHTASOJTA

4. ¿Toni uelis panos komo tiknemiliaj ke Jiova amo techtasojta?

⁴ Komo tikneltokaj ke Jiova techtasojta, timochikauaskej okachi tiktekitiliskej maski tikpanoskej uejueyi ouijkayomej. Sayoj ke komo tiknemiliaj ke amo techtasojta, ‘amo tikpiaskej chikaualis’ (Prov. 24:10). Uan komo timotayokoltiaj uan peua tiknemiliaj ke Jiova amo techtasojta, amo uelis tikixnamikiskej Satanás (Efes. 6:16).

5. ¿Toni panok keman seki tokniuan kinemilijkej ke Dios amo kintasojta?

⁵ Seki tokniuan kinemilianij ke Jiova amo kintasojta uan ke amo ininka motekipachoua, yejua ika amo semi takuaujtamatijok iuan. Se tokniuj tayekankej akin monotsa James, kijtoua: “Maski nietok Betel uan nitapaleuijtok itech se nechikol kampa motajtoua okse tajtol, nimotajtaniaya ox Jiova kiyolpaktiaya tein nikchiujtoya. Hasta niknemilij ke amo nechkakia keman niktataujtiaya”. Eva, akin no yetok Betel, kijtoua: “Nikitak ke amo kuali yetok maj se kinemili ke Jiova amo tetasojta porin kichiua maj amo semi se mochikauaok se kitekitilis uan maj amo teyolpaktiok”. Uan Michael, akin precursor regular uan tayekankej, kijtoua: “Komo amo tikneltoka ke Dios moka motekipachoua, yolik tikaujtias”.

6. ¿Toni moneki tikchiuaskej komo peua tiknemiliaj ke Jiova amo techtasojta?

⁶ Tein kijtojkej nejin tokniuan techpaleuia maj tikajsikamatikan keyej amo kuali yetok maj tiknemilikan ke Jiova amo techtasojta. ¿Toni moneki tikchiuaskej komo peua tiknemiliaj ke Dios amo techtasojta? Moneki amo tiksentokaskej tiknemiliskej nejon. Maj tiktajtanikan Jiova maj techmaka iyolseuilis uan maj techpaleui maj timoajchiuilikan nejon tanemililmej (Sal. 139:23; nota; Filip. 4:6, 7). Uan maj tikelnamikikan ke amo sayoj tejuan kemansa ijkon tiknemiliaj. Hasta seki itekitikauan Jiova ne uejkauj no ijkon kinpanok. Maj tikitakan tein techmachtia ineskayo tatitanil Pablo.

TEIN TECHMACHTIA INESKAYO PABLO

7. ¿Toni ouijkayomej kipiaya Pablo?

⁷ ¿Tikpiaj miak tekit uan kemansa tiknemiliaj ke amo ueli tikchiuaj nochi tein monekiskia? Ijkon momachilij tatitanil Pablo. Kijtoj ke ininka motekipachouaya “nochi in tokniuan taneltokani”, amo sayoj sekin (2 Cor. 11:23-28). ¿Tikpiaj se kokolis tein ika tinemijya tein kemansa kichiua maj amo tiyolpakikan? Pablo kipiaya se ouijkayot tein semi kitajyouiltiaya uan kinekia moajchiuilis, yejua xa mokokouaya (2 Cor. 12:7-10). ¿Timotayokoltiaj porin ouij techkisa tikchiuaskej tein kuali? Pablo kemansa no ijkon momachilij. Kijtoj ke semi moyolkokouaya porin monekia nochipa mochikauas amo kichiuas tein amo kuali (Rom. 7:21-24).

8. ¿Toni kipaleuij Pablo maj kisentokani kitekitiliani Jiova maski kipiaya ouijkayomej?

⁸ Maski Pablo kipiaya miak ouijkayomej kisentokak kitekitilij Jiova. ¿Toni kipaleuij? Maski kielnamikia ke tajtakolej, semi takuaujtamatia itech inemilis Jesús tein kitemakak. Uan no, kimatia ke Jesús kijtojka ke nochin akin iuan takuaujtamatiskej nemiskej nochipaya (Juan 3:16; Rom. 6:23). Senkis moita ke Pablo takuaujtamatia itech inemilis Jesús tein kitemakak. Kineltokaya ke Jiova kintapojpoluia komo moyolnonotsaj hasta akin kichiujkej se ueyi tajtakol (Sal. 86:5).

9. ¿Toni techmachtia tein Pablo kijtoj itech Gálatas 2:20?

⁹ Pablo kineltokaya ke Dios semi kitasojtaya porin kimatia ke kiualtitanka Jesús maj ika momikiliki (xikonixtajtolti Gálatas 2:20, TNM). Maj tikitakan tein kijtoj itamian nejin tajkuilol tein semi techyolchikaua: “IKonetsin Dios [...] nechtasojtak uan noka momikilij”. Pablo amo kinemiliaya ke amo yolkuali katka uan ke Jiova amo kitasojtaskia. Amo kinemilij: “Nikajsikamati keyej Jiova kintasojta okseki tokniuan, sayoj ke nejua amo uelis nechtasojtas”. Hasta kinelnamiktij tokniuan akin nemiaj Roma: “Maski tejuan tech ne tonal tikatkaj semi titajtakolejke [...] Cristo momikilij toixpatka” (Rom. 5:8). Nion teyi kichiua maj Dios amo techtasojta.

10. ¿Toni techmachtia Romanos 8:38, 39?

¹⁰ (Xikonixtajtolti Romanos 8:38, 39). Pablo senkis kineltokaya ke inetasojtalis Dios kipia miak chikaualis. Kijkuiloj ke nion teyi “uelis techtsinkixtis tech in itetasojtalistsin de Dios”. Kimatia ke Jiova miakpa kintapojpoluijka israelitas. Uan no kimatia ke yejua no kiiknelijka. Pablo kemej yeskia kijtojtoya: “Komo Jiova kiualtitanik iKonetsin maj noka momikiliki, nejon kijtosneki ke nechtasojta” (Rom. 8:32).

11. Maski Pablo kichiujka tein amo kuali, kemej tein moijtoua itech 1 Timoteo 1:12-15, ¿keyej kineltokaya ke Jiova kitasojtaya?

¹¹ (Xikonixtajtolti 1 Timoteo 1:12-15). Pablo xa amo kuali momachiliaya kemansa porin achto kichiujka miak taman tein amo kuali. Yejua ika kijtoj: “Nejua in kachi niueyitajtakole”. Achto ke mochiuaskia itatojtokakauj Cristo, itech miak xolalmej semi kintajyouiltij tokniuan, tanauatij maj kintsakuanij sekin uan tajtanik maj kinmiktianij oksekin (Hech. 26:10, 11). Maj tiknemilikan keniuj momachiliskia Pablo komo kiixmatiskia ininokichpil se tokniuj takat uan inamik akin tajtanka maj kinmiktikan. Maski Pablo moyolnonotsaya kimatia ke amo ueliaok kiyektaliaya tein achto kichiujka. Kineltokaya ke Cristo ika momikilijka uan yejua ika kijkuiloj: “Ika ne iteiknelilis de Dios axkan nichipaukanentinemi” (1 Cor. 15:3, 10). ¿Toni techmachtia? Ke moneki tikneltokaskej ke Cristo no toka momikilij uan ke nejon techpaleuia maj kuali timouikakan iuan Jiova (Hech. 3:19). Jiova amo kiita tein amo kuali tein achto tikchiujkej maski katka tiitaixpantijkauan oso amo, ta yejuatsin kiita tein axkan tikchiuaj uan tein tikchiuaskej satepan (Is. 1:18).

12. Kemej kijtoua 1 Juan 3:19, 20, ¿toni moneki tikchiuaskej komo tiknemiliaj ke nion tepitsin titapaleuiaj oso ke amo technamiki maj techtasojtakan?

¹² Kemej titajtakolejkej, kemansa uelis tiknemiliskej ke nion tepitsin titapaleuiaj oso ke amo technamiki maj techtasojtakan (xikonixtajtolti 1 Juan 3:19, 20). Yejua ika uelis tiknemiliskej ke inemilis Jesús amo uelis techpaleuis. Keman ijkon titanemiliskej, maj tikelnamikikan ke “Totajtsin Dios ojkachi ok ueyi uan ke ne teluililis den toyolo”. Maski tiknemiliskej ke toTajtsin Dios amo techtasojta nion techtapojpoluia, tein melauj kemaj techtasojta uan kemaj techtapojpoluia. Moneki tikchiuaskej tein techpaleuis maj tikneltokakan nejin. Yejua ika, moneki mojmostaj timomachtiskej Biblia, moneki nochipa tiktataujtiskej Jiova uan moneki timosentiliskej iniuan tokniuan. Maj tikitakan keyej moneki tikchiuaskej nejin eyi taman.

KENIUJ TECHPALEUIA NEMACHTIL, NETATAUJTIL UAN TOKNIUAN

13. ¿Keniuj techpaleuia timomachtiskej iTajtol Dios? (No xikonita recuadro “Keniuj kinpaleuia iTajtol Dios”).

¹³ Maj mojmostaj timomachtikan iTajtol Dios. Komo tikchiuaj, okachi tikixmatiskej ikualneskayouan Jiova uan tikajsikamatiskej ke semi techtasojta. Komo mojmostaj itech titanemiliaj tein timomachtiaj itech Biblia, timoajchiuiliskej amo kuali tanemililmej tein tikpiaj uan okachi kuali titanemiliskej (2 Tim. 3:16). Kevin, se tokniuj tayekankej akin kemansa kinemiliaya ke Jiova amo kitasojta, kijtoua: “Nikixtajtoltis Salmo 103 uan itech nitanemilis nechpaleuiani maj nikpata notanemilil uan maj nikajsikamati keniuj nechita Jiova”. Eva, akin ika titajtojkej itech párrafo 5, kijtoua: “Mojmostaj youak itech nitanemilia toni kiita Jiova ke okachi moneki. Nejon nechyolseuia uan kichikaua notakuaujtamatilis”.

14. ¿Keniuj techpaleuia netataujtil?

¹⁴ Maj nochipa tiktataujtikan Jiova (1 Tes. 5:17). Ome taltikpakneminij kuali mouikaj porin nochipa monojnotsaj uan moiluiaj tein kimachiliaj. No ijkon panoua iuan Jiova. Keman tikiluiaj tein tikmachiliaj, tein tiknemiliaj uan tein techtekipachoua, tiknextiliaj ke iuan titakuaujtamatij uan ke tikmatij ke techtasojta (Sal. 94:17-19; 1 Juan 5:14, 15). Yua, akin ika titajtojkej itech párrafo 2, kijtoua: “Keman niktataujtia Jiova, amo sayoj nikiluia tein nikchiuak nejon tonal, ta no nikiluia nochi tein niknemilia uan tein nikmachilia. Amo nikita Jiova kemej se akin taixyekana kampa miakej tekitij, ta kemej se tepopaj akin yekmelauj kintasojta ikoneuan”. (Xikonita recuadro “¿Tikonixtajtoltiani?”).

15. ¿Keniuj kinextia Jiova ke toka motekipachoua?

¹⁵ Maj iniuan timosentilikan tokniuan. Yejuan se netetayokolil tein Jiova techmaka (Sant. 1:17). ToTajtsin Jiova kinextia ke toka motekipachoua porin moajsij miakej tokniuan akin kemej yeskiaj tochankauan akin semi techtasojtaj (Prov. 17:17). Itech amat tein kintitanilij tokniuan akin nemiaj Colosas, Pablo ininka tajtoj seki tokniuan akin kipaleuijkaj uan kijtoj ke semi kiyolseuijkaj (Col. 4:10, 11). Hasta Jesucristo monekik kipaleuiskej ángeles uan taltikpakneminij akin kuali iniuan mouikaya, uan semi kitasojkamatik maj kipaleuianij (Luc. 22:28, 43).

16. ¿Keniuj tokniuan techpaleuiaj maj kuali timouikakan iuan Jiova?

¹⁶ ¿Tiktemouaj uan tikauaj maj tokniuan techpaleuikan? Keman tiktapouiaj tein techtekipachoua se tokniuj akin semi kuali mouika iuan Jiova, amo kijtosneki ke amo semi titakuaujtamatij, ta nejon uelis techpaleuis. Maj itech titanemilikan tein kijtoj James, akin ika titajtojkej itech párrafo 5: “Semi nechpaleuiani kuali nimouikas iniuan tokniuan akin semi kuali mouikaj iuan Jiova. Keman niknemilia ke Jiova amo nechtasojta, yejuan kuali nechkakij uan nechelnamiktiaj ke nechtasojtaj. Ika tein kichiuaj, nikita ke Jiova nechtasojta uan noka motekipachoua”. ¡Semi techpaleuis komo kuali timouikaj iniuan tokniuan itech nechikol!

MAJ TIKCHIUAKAN TEIN TAPALEUIS MAJ JIOVA NOCHIPA TECHTASOJTA

17, 18. ¿Akoni moneki tikakiskej, uan keyej?

¹⁷ Satanás kineki maj timosenkauakan uan maj amo tikchiuakanok tein kuali. Kineki maj tiknemilikan ke Jiova amo techtasojta uan ke kinemilia ke amo technamiki maj techmakixti. Sayoj ke kemej tikitakejya, nejon amo melauak.

¹⁸ Jiova techtasojta uan techpatiuita tisejsemej. Komo tiktakamatij, nochipa techtasojtas, ijkon kemej Jesús kitasojta (Juan 15:10). Yejua ika, maj amo tiknemilikan ke Jiova amo techtasojta nion maj tikneltokakan tein Satanás kijtoua. Okachi kuali maj tikakikan Jiova, akin kiita tokualneskayouan uan tein ueli tikchiuaj. Maj tikneltokakan ke yejuatsin “yolpaki ika ixolal”, uan ke tejuatsin no tikonyolpaktia.