Xikneltoka ke Jehová mitstasojta

1. ¿Keyej tikixtalij nochipa tiktekitilis Jehová? (No xikita taixkopin).

¿TIKELNAMIKI keman tiktataujtij Jehová para tikiluis ke nochipa tiktekitiliskia? Tikixtalij ijkon tikchiuas porin tikixmatik uan semi tiktasojtak. Yejua ika timotenkauak ke nochipa tiktayekanaltiskia tiktekitilis uan tiktasojtas ika nochi moyolo, ika nochi monemilis, ika nochi motanemilil uan ika nochi mochikaualis (Mar. 12:30). Uan axkan okachi tiktasojta Jehová desde ke iuan timotemaktij. Hasta komo aksa mitstajtaniskia “¿Yekmelauj tiktasojta Jehová?”, niman tiknankiliskia: “¡Kemaj! Uan niktasojta okachi ke aksa oso teisa”.

2, 3. ¿Toni kineki Jehová maj tikneltokakan? (Jeremías 31:3). ¿Toni tikitaskej itech nejin tamachtilis?

² Uan toni titanankiliskia komo aksa mitstajtaniskia: “¿Tikneltoka ke Jehová mitstasojta?” Xa amo ijsiujka tikijtoskia ke kemaj porin xa tiknemilia ke amo mitsnamiki maj mitstasojta. Se tokniuj siuat akin kimachiliaya ke amo kitasojtayaj keman siuapilok katka, kijtoua: “Nejua kemaj nikmachilia ke semi niktasojta Jehová, sayoj ke kemansa nimotajtania ox yejua no nechtasojta”. Komo ijkon, ¿toni uelis mitspaleuis xikneltoka ke Jehová yekmelauj mitstasojta?

³ Jehová kineki senkis xikneltoka ke mitstasojta (xiklero Jeremías 31:3). Yejua Jehová akin kinekik xikixmati uan kuali iuan ximouika. Uan keman timotemaktij iuan uan timoauij, yejua peuak nochipa mitstasojta. Nejin kijtosneki ke amo keman mitskauas porin mitsteltasojta. Kemej Jehová semi kintasojta nochin itekitikauan kinita ke ‘iaxkauan’, uan tejua no ijkon mitsita (Mal. 3:17). Jehová kineki senkis xikneltoka ke mitstasojta ijkon kemej tatitanil Pablo kineltokaya ke Jehová kitasojtaya, yejua kijkuiloj: “Nikyekmati ke nion teyi uelis kichiuas maj Dios amo techtasojtaok: nion komo timikij, nion komo tinemij, nion ángeles, nion tekiuanij, nion tein axkan onkak, nion tein onkas satepan, nion chikaualismej, nion tein moajsi ajko, nion tein moajsi uejkatan, nion okse taman tein Dios kichijchiuak. Nion teyi uelis kichiuas maj Dios amo techtasojta” (Rom. 8:​38, 39). Itech nejin tamachtilis tikitaskej keyej moneki tikneltokaskej ke Jehová techtasojta, uan toni moneki tikchiuaskej para okachi tikneltokaskej nejon.

¿KEYEJ SEMI MONEKI MAJ TIKNELTOKAKAN KE JEHOVÁ TECHTASOJTA?

4. ¿Toni kineki Satanás maj tiknemilikan, uan keniuj uelis tikixnamikiskej?

⁴ Komo tikneltokaj ke Jehová techtasojta ‘uelis titaxikoskej keman Amokuali kitemos techuetsiltis’ (Efes. 6:11). Satanás amo kineki maj tiktekitilikanok Jehová, uan nochipa kitemos keniuj techtsakuilis. Ijkon kichiua keman kineki maj tiknemilikan ke Jehová amo techtasojta, sayoj ke nejon amo melauj. Biblia kijtoua ke Satanás tamati kemej se león (1 Ped. 5:​8, 9). Nejon tapial kiuelita kinkitskis tapialmej tein amo chikaujkej uan amo ueli mopaleuiaj. No ijkon kichiua Satanás, kineki techuetsiltis keman amo tichikaujkej, keman tisioujtokej, titayokoxtokej, tikpiaj ouijkayomej, timoyolkokojtokej porin techpanok tein amo kuali oso techtekipachoua tein panos satepan (Prov. 24:10). Para maj Satanás amo techuetsilti uan maj tiksentokakan tiktekitilikan Jehová, moneki ‘tikixnamikiskej’ uan timochikauaskej tikneltokaskej ke Jehová techtasojta (Sant. 4:7).

5. ¿Keyej semi moneki maj tikneltokakan ke Jehová techtasojta uan techpatiuita?

⁵ Komo tikneltokaj ke Jehová techtasojta, okachi kuali iuan timouikaskej. ¿Keyej? Porin Jehová techchijchiuak maj tiknekikan titetasojtaskej uan maj no techtasojtakan. Keman aksa techtasojta, tejuan no ijkon tikchiuaj. Yejua ika keman tikmachiliaj ke Jehová techtasojta uan techpatiuita no okachi tiktasojtaj (1 Juan 4:19). Uan komo tejuan okachi tiktasojtaj, yejua okachiok kichiuas, porin Biblia kijtoua: “Ximotokikan iuan Dios uan yejua motokis namouan” (Sant. 4:8). Maj tikitakan toni techpaleuis maj senkis tikneltokakan ke Jehová techtasojta.

¿TONI MITSPALEUIS XIKNELTOKA KE JEHOVÁ MITSTASOJTA?

6. ¿Toni uelis tikchiuas komo amo semi tikneltoka ke Jehová mitstasojta?

⁶ Xiksentoka xiktajtani Jehová maj mitspaleui xikajsikamati keyej mitstasojta (Luc. 18:1; Rom. 12:12). Xa miakpa monekis tiktataujtis maj mitspaleui xikmati ke yekmelauj mitstasojta. Komo tiknemilia ke Jehová amo ijkon kichiua, xikelnamiki ke Dios okachi ueyi ke moyolo (1 Juan 3:​19, 20). Jehová kiita nochi kualtsitsin taman tein tiknextia maski tejua amo tikita nejon (1 Sam. 16:7; 2 Crón. 6:30). Yejua ika xiktapoui keniuj timomachilia uan xikilui maj mitspaleui xikneltoka ke mitstasojta (Sal. 62:8). Satepan ke tiktataujtis Jehová semi moneki xikchiua nejin tein tikitatij.

7, 8. ¿Keniuj tein kijtoua Salmos techpaleuia maj tikneltokakan ke Jehová techtasojta?

⁷ Xikneltoka tein Jehová kijtoua. Dios kinixyekanak ika ichikaualis takamej akin kijkuilojkej Biblia, yejua ika melauj tein yejuan kijtojkej de Jehová. David kijtoj nejin tajtolmej tein kualtsitsin: “Jehová iniuan yetok akin tajyouijtokej; kinmakixtia akin semi tayokoxtokej” (Sal. 34:18). Komo semi titayokoxtok, xa tiknemilis ke amo akin mitsajsikamati oso ke amo akin uelis mitspaleuis. Sayoj ke Jehová motenkaua ke mouan yetos porin kimati ke semi moneki maj aksa mitspaleui. David kijkuiloj nejin itech okse salmo: “Xiksentili noixayo itech mokuetaxbolsa” (Sal. 56:8). Jehová kiita keman titayokoxtok uan timoyolkokojtok, yejua ika motekipachoua por tejua uan kiyolkokoua keman titajyouia. Kemej yeskia kisentilia moixayo uan kieua ijkon kemej mopialiayaj at itech se kuetaxbolsa keman ojtokayaj taluakyan. David no kiluij Jehová: “Kuali tikixmati noojuan” (Sal. 139:3). Jehová kiita nochi tein tikchiua, sayoj ke okachi kiita tein kuali tein tikchiua (Heb. 6:10). ¿Keyej? Porin semi kipatiuita nochi tein timochikaua tikchiuas para tikyolpaktis.a

⁸ Jehová kikui textos kemej nejin para mitsiluis ke motekipachoua por tejua uan ke semi mitstasojta. Sayoj ke kemej tikitakejya, Satanás kineki xiknemili ke Jehová amo mitstasojta. Yejua ika komo kemansa amo semi tikneltoka ke Jehová mitstasojta, ximotajtani nejin: “¿Akoni nikneltokilis: ‘inintat akin takajkayauaj’ oso ‘Dios akin kijtoua tein melauak’?” (Juan 8:​44, nota; Sal. 31:5).

9. ¿Toni motenkaua Jehová iniuan akin kitasojtaj? (Éxodo 20:6).

⁹ Xiknemili toni kichiua Jehová keman kiita ke tiktasojtaj. Itech xitanemili tein Jehová kiluij Moisés uan israelitas (xiklero Éxodo 20:6). Dios motenkaua ke nochipa kintasojtas akin kitasojtaj. Kemej Jehová amo tekaua, amo keman kiixtopeuas aksa akin kitasojta (Neh. 1:5). Yejua ika, komo amo semi tikneltoka ke mitstasojta, ximotajtani: “¿Niktasojta Jehová?”. Uan satepan xiknemili nejin: komo tejua tiktasojta uan timochikaua tikyolpaktis, xikneltoka ke yejua no semi mitstasojta (Dan. 9:4; 1 Cor. 8:3). Nejin kijtosneki ke komo kuali tikmati ke tiktasojta Jehová, no uelis senkis tikneltokas ke yejua nochipa mitstasojtas uan amo keman mitskauas.

10, 11. ¿Toni kineki Jehová xiknemili keman tikelnamikis ke kitemakak iKonetsin? (Gálatas 2:20).

¹⁰ Xiknemili akoni Jehová kinekia kimakixtis keman kitemakak iKoneuj. Jehová techtayokolij tein okachi kuali keman kitemakak iKonetsin Jesús para maj momikili por tejuan (Juan 3:16). Sayoj ke, ¿no kitemakak iKonetsin para mitsmakixtis? Kemaj. Maj itech titanemilikan tatitanil Pablo. Yejua kichiuak miak taman tein amo kuali achto ke kitojtokaskia Jesús, uan satepan monekik mochikauas amo kichiuasok tein amo kuali tein kinejnekia (Rom. 7:​24, 25; 1 Tim. 1:​12-14). Maski ijkon, kineltokak ke Jehová kitemakaka iKonetsin por yejua (xiklero Gálatas 2:20). Xikelnamiki ke Dios ika ichikaualis kiixyekanak Pablo para maj kijkuilo nejin versículo, uan komo ijkuiliujtok itech Biblia, kinextia ke Jehová kineki techmachtis teisa (Rom. 15:4). Jehová kineki xikneltoka ke keman kitemakak iKonetsin, tejua kinekik mitsmakixtis. Keman tikitas ke Jehová kichiuak por tejua, okachi tikneltokas ke mitstasojta.

¹¹ Semi tiktasojkamatiliaj Jehová porin kiualtitanik iKonetsin maj momikiliki por tejuan. Sayoj ke Jesús no ualaj para kichiuas okse taman. Ualaj para kiteixmatiltis tein melauak de Jehová uan tamachtis ke Dios semi techtasojta (Juan 18:37).

JESÚS TAMACHTIJ KE JEHOVÁ SEMI MITSTASOJTA

12. ¿Keyej uelis tikneltokaskej tein Jesús tamachtij de Jehová?

¹² Keman Jesús yetoya nikan taltikpak semi kiuelitaya ika kinnojnotsas oksekin keniuj tamati Jehová (Luc. 10:22). Uan uelis tikneltokaskej nochi tein tamachtij. ¿Keyej? Porin tel miak xiujmej iuan yetoya iTajtsin ompa iluikak uan okachi kuali kiixmati (Col. 1:15). Jesús kimati ke iTajtsin semi kitasojta, uan no kiitani keniuj kinnextiliani ángeles uan nochin akin kitekitilianij ke kintasojta. Maj tikitakan keniuj tein Jesús tamachtij techpaleuia maj tikneltokakan ke Jehová techtasojta.

13. ¿Keniuj kineki Jesús maj tikitakan Jehová?

¹³ Jesús kineki maj tikitakan Jehová kemej toTajtsin akin semi techtasojta ijkon kemej yejua kiita. Uan itech Evangelios, Jesús kinotsak Jehová kemej “toTajtsin” panoua 160 viajes. Uan keman kinnojnotsaya imomachtijkauan kikuia tajtolmej kemej “namoTajtsin” uan “namoTajtsin akin yetok ne iluikak” (Mat. 5:16; 6:26). Achto ke Jesús ualaskia nikan taltikpak, akin kitekitiliayaj Jehová kinotskej Dios kemej ‘akin kipia nochi chikaualis’, ‘akin okachi ueyichiujkej’, ‘akin tachijchiuak’ uan okseki taman kemej nejin. Sayoj ke Jesús miakpa kinotsak Jehová ‘toTajtsin’. Nejin tajtol kinextia ke Jehová kineki maj itekitikauan kimachilikan ke yejua amo uejka yetok, ijkon kemej momachilia se okichpiltsin akin kimati ke itat amo uejka yetok. Jesús tamachtij ke Jehová techtasojta kemej se tepopaj kintasojta ikoneuan. Maj tikitakan keman Jesús ojpa ika tajtoj Jehová uan kikuik tajtol “toTajtsin”.

14. ¿Keniuj Jesús kinextij ke Jehová semi techpatiuita tisejsemej? (Mateo 10:​29-31; no xikita taixkopin).

¹⁴ Yekinika, maj tikitakan tein Jesús kijtoj itech Mateo 10:​29-31 (xiklero). Jesús kijtoj ke toTajtsin kimati kani yetok se tototsin, sayoj ke se tototsin amo kiueyichiua Jehová nion kitasojta. Komo Jehová semi ika motekipachoua se tototsin, uelis tikneltokaskej ke yejua okachi motekipachoua por tejuan akin tiktasojtaj uan tikueyichiuaj. Jesús no kijtoj ke toTajtsin ‘hasta kimati kanachi tsonti tikpiaj’. Kemej Jehová techitilia seki taman tein amo semi tayekantok, uelis tikneltokaskej ke semi motekipachoua por tejuan. Jesús semi kinekia maj tikneltokakan ke toTajtsin semi techpatiuita tisejsemej.

15. ¿Toni mitsmachtia de Jehová tein kijtoua Juan 6:44?

¹⁵ Axkan maj tikitakan okse viaje keman Jesús no kikuik tajtol “toTajtsin”, uan nejin tikajsij itech Juan 6:44 (xiklero). MoTajtsin Jehová mitspaleuij xikixmati uan xiktasojta, ¿keyej? Porin kiitak ke tiyolkuali (Hech. 13:48). Keman Jesús kijtoj tein ijkuiliujtok itech Juan 6:44 xa ika tajtojtoya tein Jehová kiniluij itekitikauan ijkon kemej ijkuiliujtok itech amatajkuilol Jeremías: “Yejua ika […] nikchiuak nouan ximotoki” (Jer. 31:3; no xikita Oseas 11:4). Nejin kijtosneki ke toTajtsin nochipa kiita tein kuali tein tikchiua maski tejua amo tikita.

16. 1) ¿Toni techiluia Jesús, uan keyej uelis tikneltokilis? 2) ¿Toni mitspaleuis xikneltoka ke Jehová yejua tel kuali moTajtsin? (Xikita recuadro “Amo akin kemej toTajtsin Jehová”).

¹⁶ Jesús kemej yeskia kijtoskia: “Jehová amo sayoj nejua noTajtsin, ta tejua no moTajtsin. Uan xikneltoka ke mitstasojta uan motekipachoua por tejua”. Yejua ika komo kemansa amo semi tikneltoka ke Jehová mitstasojta, xikelnamiki tein Jesús kijtoj uan xikneltokili porin yejua amo takajkayaua uan okachi kuali kiixmati iTajtsin (1 Ped. 2:22).

XIKCHIUA TEIN MITSPALEUIS XIKNELTOKA KE JEHOVÁ MITSTASOJTA

17. ¿Keyej moneki maj nochipa tikneltokakan ke Jehová techtasojta?

¹⁷ Tikitakejya ke Satanás semi kitemoua maj amo tiktekitilikanok Jehová, uan ijkon kichiua keman kineki maj tiknemilikan ke Dios amo techtasojta. Sayoj ke maj amo tikneltokakan tein Satanás kijtoua (Job 27:5). Uan maj tikchiuakan tein techpaleuis maj nochipa tikneltokakan ke Jehová techtasojta.

18. ¿Toni mitspaleuis okachi xikneltoka ke Jehová mitstasojta?

¹⁸ Itech nejin tamachtilis tikitakejya seki taman tein mitspaleuis xikneltoka ke Jehová mitstasojta. Xa uelis tiktataujtis Jehová maj mitspaleui xikmati ke yekmelauj mitstasojta uan itech xitanemili textos tein kinextiaj ke semi kintasojta itekitikauan. No mitspaleuis komo tikelnamiki ke Jehová amo keman kiixtopeuas aksa akin kitasojta. Amo no keman xikelkaua ke Jehová kitemakak iKonetsin porin tejua kinekik mitsmakixtis. Uan xikelnamiki ke Jesús kijtoj ke Jehová moTajtsin. Yejua ika keman aksa mitstajtanis “¿Tikneltoka ke Jehová mitstasojta?”, niman tiknankilis: “¡Kemaj! Uan mojmostaj nimochikaua niknextilis ke no niktasojta”.