¿Toni techmachtia de Jehová uan Jesús keman toka motemakak?

1. ¿Keniuj techpaleuia maj xijxiujtika tikelnamikikan imikilis Cristo?

JEHOVÁ kemej yeskia techtayokolij teisa tein semi kipia ipatiuj porin kiualtitanik iKonetsin maj toka momikiliki (2 Cor. 9:15). Kemej Jesús toka momikilij, ueli timouikaj iuan Jehová uan satepan uelis tinemiskej nochipaya. Yejua ika semi tiktasojkamatiliaj Dios porin kinextij ke semi techtasojta keman kitemakak iKonetsin (Rom. 5:8). Para nochipa tiktasojkamatiskej uan amo keman tikelkauaskej tein kichiujkej, Jesús tanauatij maj tikelnamikikan imikilis xijxiujtika (Luc. 22:​19, 20).

2. ¿Toni tikitaskej itech nejin tamachtilis?

² Nejin xiuit tikelnamikiskej imikilis Cristo itech tonal sábado 12 de abril xiuit 2025. Amo tiknekij timopolouiliskej nejon tonal. Achto uan satepan ke tikelnamikiskej imikilis Cristo, maj tikxelokan tiempo para itech titanemiliskej tein Jehová uan iKonetsin toka kichiujkej. Itech nejin tamachtilis tikitaskej toni techmachtia de yejuan maj Jesús taxtauani para techmakixtis. Uan itech okse tamachtilis tikitaskej keniuj techpaleuia maj Jesús taxtauani uan keniuj uelis tiknextiskej ke semi tiktasojkamatij tein kichiuak.

¿TONI TECHMACHTIA DE JEHOVÁ MAJ JESÚS TAXTAUANI PARA TECHMAKIXTIS?

3. ¿Keniuj sayoj se takat ueliskia kinmakixtis nochin? (No xikonita taixkopimej).

³ Jehová kiualtitanik iKonetsin maj toka momikiliki porin nochipa kichiua tein kuali yetok (Deut. 32:4). ¿Keniuj tikmatij nejin? Kemej Adán amo kitakamatikok Dios, tinochin tiikoneuan titajtakolejkej uan timomikiliaj (Rom. 5:12). Yejua ika Jehová kiualtitanik Jesús para techmakixtis. Sayoj ke, ¿keniuj ueliskia sayoj se takat akin amo tajtakolej kinmakixtis miakej? Tatitanil Pablo kijtoj keniuj mochiuak nejin: “Ijkon kemej miakej peujkej kipiaj tajtakol porin sayoj se takat [Adán] amo tatakamatik, no ijkon Dios kinitas miakej ke yolmelaujkej porin sayoj se takat [Jesús] tatakamatik” (Rom. 5:19; 1 Tim. 2:6). Nejin kijtosneki ke ijkon kemej tinochin titajtakolejkej uan timomikiliaj porin se takat akin amo tajtakolej katka amo kitakamatikok Dios, no monekia maj techmakixtiani aksa akin amo tajtakolej uan kitakamatiskia Dios.

4. ¿Keyej Jehová amo kinkauak maj nemikan nochipaya ikoneuan Adán akin kitakamatiskiaj?

⁴ ¿Monekia momikilis Jesús para techmakixtis? ¿Keyej Jehová amo kinkauak maj nemikan nochipaya ikoneuan Adán akin kitakamatiskiaj? Xa tejuan tiknemiliskiaj ke kuali yeskia maj Jehová kichiuani nejon, sayoj ke yejua amo kuali kiitaskia. Porin moitaskia ke Adán amo tajtakolchiujka uan ke ikoneuan amo no tajtakolejkej.

5. ¿Keyej uelis tikneltokaskej ke Jehová nochipa kichiuas tein kuali yetok?

⁵ Uan no, komo Jehová amo kitemakaskia iKonetsin maj toka momikiliani uan kinkauaskia maj ikoneuan Adán nemikan nochipaya maski tajtakolejkej, amo kichiujtoskia tein yejua kiixtalij ke kuali yetok uan tein amo. Yejua ika, miakej xa kinemiliskiaj ke oksepa ijkon kichiuaskia uan amo kineltokaskiajok tein kijtoua. Miakej motajtaniskiaj ox kichiuaskiaok tein motenkaujka. Sayoj ke amo moneki timotekipachoskej, porin Jehová kichiuak tein kuali maski monekik kitemakas iKonetsin maj toka momikiliani. Yejua ika, uelis tikneltokaskej ke nochipa kichiuas tein kuali yetok.

6. ¿Keyej Jehová kiualtitanik iKonetsin maj toka momikiliki? (1 Juan 4:​9, 10).

⁶ Kemej Jehová taxtauak para techmakixtis, kinextia ke nochipa kichiua tein kuali yetok sayoj ke okachi kinextia ke semi techtasojta (Juan 3:16; xikonlero 1 Juan 4:​9, 10). Jehová kiualtitanik iKonetsin maj toka momikiliki porin kineki maj tinemikan nochipaya uan maj tipouikan iniuan ichankauan. Keman Adán tajtakoj amo pouikok iniuan ichankauan Jehová, yejua ika keman tiyolij amo no tipouij iniuan ichankauan. Sayoj ke, kemej Jesús toka momikilij Jehová ueli techtapojpoluilia totajtakoluan uan miakej akin iuan takuaujtamatij uan kitakamatij uelis pouiskej iniuan ichankauan. Uan tejuan no ueli timouikaj iuan Jehová uan iniuan tokniuan. ¡Jehová semi techtasojta! (Rom. 5:​10, 11).

7. ¿Keyej keman tikmatij ke Jesús semi tajyouij techpaleuia maj tikajsikamatikan ke Jehová techtasojta?

⁷ Ueli tikajsikamatij ke Jehová techteltasojta keman tiknemiliaj keniuj semi kiyolkokoj keman kiitak ke iKonetsin tajyouij. Satanás kijtoua ke nion se itekitikauj Dios uelis kitakamatis keman tajyouijtos. Yejua ika, Jehová kikauak maj Jesús tajyouiani uan maj momikiliani, ijkon kinextij ke Satanás se xolopij (Job 2:​1-5; 1 Ped. 2:21). Keman miakej kikejkelojkej Jesús uan keman soldados kiuijuitekkej uan kikoujpampilojkej, Jehová kiitstoya nochi desde iluikak. No kiitak keman kimiktijkej iKonetsin (Mat. 27:​28-31, 39). Jehová ueliskia kintsakuilis komo kinekiskia. Ueliskia ijkon kichiuas keman kijtojkej: “Axkan maj Dios kimakixti komo yekmelauj kitasojta” (Mat. 27:​42, 43). Sayoj ke komo ijkon kichiuaskia, Jesús amo ueliskia toka momikilis uan tejuan amo ueliskia tikseliskej nion teyi. Yejua ika, Jehová kikauak iKonetsin maj tajyouiani uan momikiliani.

8. ¿Keniuj tikmatij ke Jehová moyolkokoj keman kiitak ke iKonetsin tajyouijtoya? (No xikonita taixkopin).

⁸ Jehová amo kikuik ichikaualis para kitsakuilis maj amo kitajyouiltianij iKonetsin, sayoj ke nejon amo kijtosneki ke amo kitasojtaya. Jehová techchijchiuak kemej uelis tikmachiliskej itech toyolo miak taman, uan kemej techchijchiuak ijkon kemej yejua, kijtosneki ke no kimachilia miak taman. Biblia kijtoua ke “miakej miakpa kiyolkokojkej” (Sal. 78:​40, 41). Maj inintech titanemilikan Abrahán uan Isaac. Jehová kiluij Abrahán maj kimaktiliani ikonetsin (Gén. 22:​9-12; Heb. 11:​17-19). Abrahán xa semi motekipachouaya uan tayokoxtoya keman yaya kimiktitia iokichpil. ¿Uan keniuj momachilij Jehová keman kiitak ke kitajyouiltijtoyaj iKonetsin uan hasta kimiktijkej? Jehová xa semi motayokoltij uan moyolkokoj. (Xikonita itech jw.org, video Maj titakuaujtamatikan kemej yejuan: Abrahán [taxelol 2]).

9. ¿Keniuj Romanos 8:​32, 38, 39 kinextia ke Jehová semi techtasojta?

⁹ Kemej Jehová taxtauak para techmakixtis kinextia ke yejua semi techtasojta, okachiok ke se totasojikniuj oso se tochankauj (xikonlero Romanos 8:​32, 38, 39). Tejuan ipa timotasojtaj sayoj ke Jehová okachiok techtasojta. Xikonnemili nejin: ¿tikonneki tionnemis nochipaya? Jehová okachiok kineki xionnemi nochipaya. ¿Tikonneki maj Jehová mitsontapojpoluili motajtakoluan? Yejua okachiok kineki mitsontapojpoluis. Yejua sayoj kineki maj tiktasojkamatilikan tein toka kichiuak, maj tiktakamatikan uan maj iuan titakuaujtamatikan. Kemej Jehová taxtauak para techmakixtis kinextia ke semi techtasojta. Uan itech xochital okachiok tikitaskej keniuj semi techtasojta (Ecl. 3:11).

¿TONI TECHMACHTIA DE JESÚS MAJ TAXTAUANI PARA TECHMAKIXTIS?

10. 1) ¿Toni okachi kitekipachouaya Jesús achto ke momikiliskia? 2) ¿Keniuj Jesús kiueyitalij iTajtsin? (No xikonita recuadro “Jesús kiueyitalij iTajtsin ika tein kichiuak”).

¹⁰ Jesús amo kineki maj kinemilikan tein amo kuali de iTajtsin (Juan 14:31). Yejua moteltekipachouaya porin yaya kimiktitij kemej aksa akin amo kipoujkaitaya Dios uan kemej se temiktijkej. Yejua ika kiluij iTajtsin: “NoTajtsin, komo ueli, xinechajchiuili nejin copa” (Mat. 26:39). Sayoj ke kemej Jesús amo keman kikauak Jehová hasta ke momikilij, kinextij ke tein Satanás kijtouilij iTajtsin amo melauj katka.

11. ¿Keniuj Jesús kinextij ke semi tetasojtaya? (Juan 13:1).

¹¹ Keman Jesús taxtauak para techmakixtis kinextij ke ininka motekipachoua nochin, uan okachiok ininka imomachtijkauan (Prov. 8:31; xikonlero Juan 13:1). Jesús kimatia ke keman yetoskia nikan taltikpak, kipiaskia miak ouijkayomej uan semi tajyouiskia keman kimiktiskiaj. Yejua amo sayoj kichiuak miak taman tein ouij porin Jehová ijkon kinauatijka, ta porin semi tetasojta. Nejin kinextij keman tanojnotsak, tamachtij uan keman kinpaleuij oksekin. Uan se youak achto ke kimiktiskiaj, kixeloj tiempo para kinmetspajpakas itatitaniluan, kinyolchikauas uan kinmachtis (Juan 13:​12-15). Uan keman kikoujpampilojkej, kiyolchikauak tachtekkej akin yetoya inakastan, uan no kinextij ke ika motekipachouaya imomaj keman kiluij Juan maj kiyekpiani (Luc. 23:​42, 43; Juan 19:​26, 27). Jesús amo sayoj kinextij ke tetasojta keman toka momikilij, ta no ika tein kichiuaya keman yetoya nikan taltikpak.

12. ¿Toni kisentoka kichiua Jesús para techpaleuis?

¹² Cristo “sayoj sepa momikilij [...] uan amo kemanok monekis momikilis”, sayoj ke yejua kisentokani techpaleuiani hasta axkan (Rom. 6:10). Uan kisentoka tekiti para techmakas miak taman tein kuali porin toka momikilij. Xikonnemili nochi tein kichiua kemej Tekiuaj, Tayekankatiopixkat uan kemej taixyekankej itech nechikol (1 Cor. 15:25; Efes. 5:23; Heb. 2:17). Yejua moneki kinsentilis nochin taijitalmej uan no akin nemiskej nikan taltikpak, uan nejin kichiuas achto ke tamis tetsaujkatajyouilis (Mat. 25:32; Mar. 13:27).a Jesús no techmaka nochi tein moneki para tiksentokaskej tiktekitiliskej Jehová itech nejin tonalmej keman tatamitiya (Mat. 24:45). Uan keman tekiuajtitos mil xiujmej kisentokas techpaleuis. Keman Jehová kitemakak iKonetsin, amo sayoj kichiuak para maj toka momikiliani, ta no para techpaleuis ika okseki taman.

XIKONSENTOKA XIONMOMACHTI OKSEKI TAMAN

13. ¿Toni uelis tikchiuaskej para okachi itech titanemiliskej keniuj Jehová uan Jesús techtasojtaj?

¹³ Uelis tikonsentokas tionmomachtis keniuj Jehová uan Jesús techtasojtaj komo itech tiontanemilia tein moka kichiuanij. Nejin xiuit xa uelis tikonleros seki Evangelios itech tonalmej keman tikelnamikiskej imikilis Cristo. Amo moneki sepasan tikonleros miak capítulos, ta yolik uelis tikonitstias keyej moneki tikintasojtaskej Jehová uan Jesús. Uan xikontapoui oksekin tein tionmomachtijtiuj.

14. ¿Keniuj uelis okachi tikajsikamatiskej tein Jesús toka kichiuak uan okseki taman tamachtilismej? (Salmo 119:97; no xikonita taixkopin).

¹⁴ Komo ne uejkaujya tionmoauij xa tionmotajtaniani ox uelisok tikonajsis okseki tamachtilismej tein kijtoua ke Dios nochipa kichiua tein kuali yetok, ke tetasojta uan ke kitemaktij iKonetsin. Sayoj ke ipa onkakok miak taman tein uelis timomachtiskej. ¿Keniuj uelis tikonsentokas tionmomachtis? Xikonlero uan xionmomachti toamaixuan. Komo tikonajsi se versículo tein amo tikonajsikamati, xikontemo tamachtilis. Uan satepan itech xiontanemili tein tikonajsik uan tein tionmomachtij de Jehová, de iKonetsin uan keniuj mitsontasojtaj (xikonlero Salmo 119:97).

15. ¿Keyej moneki tiksentokaskej tiktemoskej okseki tamachtilismej itech Biblia?

¹⁵ Amo xionmosenkaua komo keman tionmomachtia Biblia amo tikonajsi teisa tein yankuik oso tein tikonuelitaskia tikonajsis. Keman timomachtiaj Biblia kemej yeskia tiktemoskiaj oro. Akin kitemouaj oro, moneki miak horas uan tonalmej kitemojtoskej para tekit kiajsiskej. Sayoj ke amo yolijsiuij nion mosenkauaj porin maski tepitsin kiajsij semi patiyoj. Tamachtilis tein tikajsij itech Biblia okachi kipia ipatiuj ke oro (Sal. 119:127; Prov. 8:10). Yejua ika, amo xionyolijsiui uan xikonsentoka xikonlero uan xionmomachti Biblia (Sal. 1:2).

16. ¿Keniuj uelis tikchiuaskej kemej Jehová uan Jesús?

¹⁶ Xikontemo keniuj uelis tikonchiuas tein tionmomachtia. Uelis tikonchiuas kemej Jehová keman amo tiontechikoitas. Uan no tiontetasojtas kemej Jesús kitasojta iTajtsin uan oksekin, komo tikonchiua tein Jehová kineki uan keman tikonpaleuia oksekin maski kemansa semi ouij yeski. Uan komo tiontanojnotsa uelis tikonpaleuis oksekin maj kimatikan tein Jehová toka kichiuani uan maj kineltokakan ke Jesús toka momikilij.

17. ¿Toni tikitaskej itech okse tamachtilis?

¹⁷ Keman okachi tikajsikamatiskej uan tikpatiuitaskej tein Jesús toka kichiuak, okachi tikintasojtaskej Jehová uan iKonetsin. Uan yejuan no okachi techtasojtaskej (Juan 14:21; Sant. 4:8). Yejua ika maj tiksentokakan tikuikan tein Jehová techmaka para tiksentokaskej timomachtiskej tein Jesús toka kichiuak. Itech okse tamachtilis tikitaskej keniuj techpaleuia maj Jesús taxtauani para techmakixtis uan toni uelis tikchiuaskej para tiktasojkamatiliskej Jehová tein toka kichiuak porin techtasojta.