¿Tikonchixtokya tonal keman tikelnamikiskej imikilis Cristo?

1. ¿Keyej tikitaj ke tonal keman tikelnamikij imikilis Cristo semi moneki? (Lucas 22:​19, 20).

TIITEKITIKAUAN Jehová tikitaj ke tonal keman tikelnamikij imikilis Cristo motelneki. Sayoj yejua nejin tein Jesús technauatij maj tikchiuakan (xikonixtajtolti Lucas 22:​19, 20). ¡Tiktelnekijya maj ejko nejon tonal! ¿Keyej? Maj tikitakan.

2. ¿Keyej tiktelnekijya maj ejko tonal keman tikelnamikiskej imikilis Cristo?

² Tonal keman tikelnamikij imikilis Cristo techpaleuia maj tikitakan keyej semi monekik maj Jesús toka momikiliani. Nejon tonal no ueli itech titanemiliaj tatiochiualismej tein tikpiaskej. Techelnamiktia keniuj uelis tiktasojkamatiskej tein Jesús toka kichiuak (2 Cor. 5:​14, 15). No ueli tietokej iniuan tokniuan uan timosenyolchikauaj (Rom. 1:12). Nochi xiujmej miakej akin amo tanojnotsajok nion monechikouajok, touan mosentiliaj para kielnamikiskej imikilis Cristo. Kemej tokniuan kualtsin kinseliaj, sekin kinekij oksepa kitekitiliskej Jehová. Uan no, miakej semi kiuelitaj tein ompa kikakij uan kiitaj, yejua ika peua momachtiaj Biblia. Nochi nejin kichiua maj semi tiyolpakikan keman tikelnamikij imikilis Cristo.

3. ¿Keyej keman tikelnamikij imikilis Cristo ueli tikitaj ke tinochin akin tiktekitiliaj Jehová kuali timouikaj? (No xikonita taixkopin).

³ No tiknekij maj ejkoya nejon tonal porin tikmatij ke tokniuan itech nochi taltikpak no ijkuak mosentiliaj. Noyampa taltikpak, itaixpantijkauan Jehová monechikouaj keman tonaltsin pankalaki. Tinochin tikakij se tanojnots kampa momelaua keyej semi monekia maj Jesús toka motemaktiani, timokuikatiaj ome nekuikatilmej, tikpanoltiaj pan uan vino, uan tikijtouaj “maj ijkon mochiua” keman kichiuaj naui netataujtilmej. Nochi nechikolmej ijkon kichiuaskej achto ke panos 24 horas. Tikmatij ke Jehová uan Jesús semi yolpakij keman techitaj ke noyampa taltikpak tikinueyitaliaj.

4. ¿Toni tikitaskej itech nejin tamachtilis?

⁴ Itech nejin tamachtilis tiknankiliskej nejin netajtanilmej: ¿toni moneki tikchiuaskej tisejsemej achto ke tikelnamikiskej imikilis Cristo?, ¿toni uelis tikchiuaskej para maj oksekin no kinpaleui nejon nechikol? uan ¿keniuj uelis tikinpaleuiskej akin amo tanojnotsajok nion monechikouajok? Keman tiknankiliskej nejin netajtanilmej, techpaleuis maj desde axkanya tikchiuakan tein moneki para tikchixtoskej nejon tonal tein semi moneki.

¿KENIUJ UELIS TIKCHIXTOSKEJYA TONAL KEMAN TIKELNAMIKIJ IMIKILIS CRISTO?

5. 1) ¿Keyej moneki itech titanemiliskej tein kichiuak Jesús keman techmakixtij? (Salmo 49:​7, 8). 2) Xikonijto toni mitsonmachtij video ¿Keyej momikilij Jesús?

⁵ Achto ke tikelnamikiskej imikilis Cristo moneki itech titanemiliskej tein Jesús toka kichiuak tein semi kipia ipatiuj. Tejuan toselti amo ueliskia timokixtiliskej tajtakol uan mikilis (xikonixtajtolti Salmo 49:​7, 8; no xikonita video ¿Keyej momikilij Jesús?).a Yejua ika Jehová kiixtalij maj iKonetsin toka motemaktiani, uan maski katka semi ouij para Jehová uan Jesús, ipa kichiujkej (Rom. 6:23). Keman okachi itech titanemiliskej tein Jehová uan Jesús toka kichiujkej, okachi tikpatiuitaskej. Tikitatij seki taman tein yejuan monekik toka kichiuaskej. Sayoj ke achto maj tikitakan toni monekik mochiuas keman techmakixtijkej.

6. ¿Keyej Jesús uelik kiixtauak tein Adán kipoloj?

⁶ Jehová kitemakak iKonetsin Jesús para kiixtauas tein Adán kipoloj. Keman kichijchiujkej yekinika takat amo katka tajtakolej. Sayoj ke keman tajtakoj amo uelikok nemik nochipaya uan ikoneuan no ijkon kinpanok. Para moixtauas tein Adán kipoloj monekik maj toka momikili Jesús akin amo tajtakolej. Nochi xiujmej keman nemik nikan taltikpak, Jesús “amo kichiuak nion se tajtakol, uan amo keman takajkayauak” (1 Ped. 2:22). Keman Jesús momikilij, amo katka tajtakolej, yejua ika uelik kiixtauak tein kipolojka Adán akin achto amo no katka tajtakolej (1 Cor. 15:45; 1 Tim. 2:6).

7. Xikonijto seki taman tein Jesús monekik kiixnamikis.

⁷ Keman yetoya nikan taltikpak, Jesús nochipa kitakamatik Jehová hasta keman semi tajyouij. Keman katka piliok, nochipa kintakamatik itatuan akin katkaj tajtakolejkej maski yejua amo katka tajtakolej (Luc. 2:51). Keman katka telpoch, xa kichikaujkauiayaj maj amo kintakamati itatuan oso maj kikaua Jehová. Uan keman Jesús katka ueyiya, monekik kiixtopeuas Satanás, akin kitemoj maj tajtako uan hasta kiluij maj kikaua Jehová (Mat. 4:​1-11). Satanás kitelnekia maj Jesús tajtako para maj amo uelini techmakixti.

8. ¿Toni okseki ouijkayomej kixikoj Jesús?

⁸ Keman Jesús yetoya nikan taltikpak kixikoj okseki ouijkayomej. Akin kitauelitayaj kitajyouiltijkej uan kiluijkej ke kimiktiskiaj (Luc. 4:​28, 29; 13:31). Monekik amo niman kualanis keman imomachtijkauan mopolouayaj (Mar. 9:​33, 34). Keman yetoya ininixpan uejueyi tamelauanij kampa kiixtalijkej ke kimiktiskiaj, semi kitajyouiltijkej uan ika mokejkelojkej. Satepan kimiktijkej kemej se tachtekkej uan semi tajyouij (Heb. 12:​1-3). Uan keman yaya momikilitiya monekik iselti taxikos porin Jehová amo kipaleuijtoyaok (Mat. 27:46).b

9. ¿Keniuj timomachiliaj keman itech titanemiliaj tein Jesús kichiuak para techmakixtis? (1 Pedro 1:8).

⁹ Jesús semi tajyouij para techmakixtis. Uan keman itech titanemiliaj nochi tein monekik toka kichiuas, techpaleuia maj semi tiktasojtakan (xikonixtajtolti 1 Pedro 1:8).

10. ¿Toni kinekik kitemakas Jehová para techmakixtis?

¹⁰ ¿Toni monekik kichiuas Jehová para maj Jesús techmakixtiani? Tikmatij ke nion se tetat tel kuali mouika iuan ikonetsin ijkon kemej Jehová uan Jesús tel kuali mouikaj (Prov. 8:30). Yejua ika maj tiknemilikan keniuj momachilij Jehová keman kiitak ke Jesús tel tajyouijtoya nikan taltikpak. Tikmatij ke Jehová semi kiyolkokoj keman kiitak ke iKonetsin kitajyouiltiayaj, kiixtopeuayaj uan kichiuiliayaj tein amo kuali.

11. Xikonijto se neskayot tein techpaleuia maj tikajsikamatikan keniuj momachilij Jehová keman kimiktijkej Jesús.

¹¹ Tetatmej akin momikiliani se ininkonetsin kimatij keniuj se tajyouia keman ijkon tepanoua. Maski tikneltokaj ke oksepa nemiskej akin momikilijkejya, ipa titajyouiaj keman momikilia aksa akin tiktasojtaj. Nejin techpaleuia maj tikajsikamatikan keniuj momachilij Jehová itech xiuit 33 keman kiitak ke iKonetsin tajyouij uan momikilij (Mat. 3:17).c

12. ¿Toni moneki tikchiuaskej seki semanas achto ke tikelnamikiskej imikilis Cristo?

¹² Achto ke tikelnamikiskej imikilis Cristo, ¿keyej amo tionmomachtia moselti oso iniuan mochankauan seki taman tein ika tajtoua nochi tein Jehová uan Jesús kichiujkej para techmakixtiskej? Xikonkui amaix Nepaleuil tein ika momachtiaj itaixpantijkauan Jiova oso okseki amaixmej para okachi ika tionmomachtis nejin.d Uan no, xikonixtajtolti itech Biblia tein ixyetok moixtajtoltis itech tonalmej keman moelnamiki imikilis Cristo. Nejin moajsi itech amaix Tein timomachtiaj itech nechikol Tonemilis uan toTanojnotsalis. Uan amo xikonelkaua tikonitas tamachtilis tein mopanoltia kualkampa nejon tonal. Komo tikchiuaj tein moneki achto ke tikelnamikiskej imikilis Cristo, uelis titapaleuiskej para maj nejon nechikol no kinpaleui oksekin (Esd. 7:10).

¿TONI UELIS TIKCHIUASKEJ PARA MAJ OKSEKIN NO KINPALEUI NEJON NECHIKOL?

13. ¿Toni moneki tikchiuaskej para maj oksekin kinpaleui keman tikelnamikiskej imikilis Cristo?

¹³ ¿Toni uelis tikchiuaskej para maj oksekin kinpaleui keman tikelnamikiskej imikilis Cristo? Moneki tikinyoleuaskej. Moneki tikmoyauaskej amat tein ika titayoleuaj, xa no uelis tikijkuiloskej akonimej tiknekij tikinyoleuaskej, xa tochankauan, akin iniuan titekitij, akin iniuan timomachtiaj oso oksekin akin tikinixmatij. Komo amo ajsij amamej tein ika titayoleuaj, uelis tikintitaniliskej tein ika uelis kitaposkej itech inincelular. ¡Xa miakej kinekiskej touan mosentiliskej! (Ecl. 11:6).

14. Xikonijto toni uelis panos komo tejuan tikyoleuaj aksa.

¹⁴ Keman tikonyoleua aksa maj youi keman tikelnamikij imikilis Cristo xa okachi kinekis yas. Se tokniuj siuat semi kimojkaitak keman itakauj akin amo itaixpantijkauj Jehová kiluij ke iuan yaskia keman kielnamikiskiaj imikilis Cristo. ¿Keyej semi kimojkaitak? Porin isiuatsin miakpa kiyoleujka uan amo yaya. ¿Keyej kinekik yas? Yejua kijtoj ke se tokniuj tayekankej kimakaka se amat tein ika titayoleuaj. Takatsin yajki nejon tonal uan kisentokak yaya itech okseki xiujmej.

15. ¿Toni moneki tikelnamikiskej keman tikyoleuaj aksa maj touan mosentili keman tikelnamikij imikilis Cristo?

¹⁵ Maj tikelnamikikan ke keman aksa tikyoleuaj xa uelis techtajtanis toni mochiua keman tikelnamikij imikilis Cristo, uan okachiok komo amo keman touan monechikouani. Yejua ika, maj achto tiknemilikan toni ueliskia techtajtanis uan keniuj ueliskia tiknankiliskej (Col. 4:6). Xa sekin uelis motajtaniskej: “¿Toni kichiuaj ompa? ¿Uejkaua nechikol? ¿Keniuj moneki se motasaltis? ¿Moneki se taxtauas para se kalakis? ¿Tetajtaniaj tomin?”. Yejua ika maj tiktajtanikan akin tikyoleujkej ox kineki kimatis teisa uan maj tikmelauilikan. No uelis tikuiskej videos Ijkuak tikelnamikij imikilis Jesús uan ¿Keniuj tikchiuaj tonechikoluan? Uan itech amaix Uelis tiyolpakiskej nochipaya, itech tamachtilis 28 kipia seki taman tein uelis tikiluiskej akin tikyoleujkej.

16. ¿Toni xa no motajtanis aksa akin youi keman tikelnamikij imikilis Cristo?

¹⁶ Satepan ke aksa touan kielnamikis imikilis Cristo, xa motajtanis seki taman. Xa motajtanis keyej amo akin kikuaj pan nion tayik vino (oso keyej sayoj sekin) kikuajkej pan uan tayikej vino. Xa no motajtanis kejkemanian tikelnamikij imikilis Cristo. Uan xa kinekis kimatis ox itech tonechikoluan nochipa tikchiuaj nejon. Maski itech tanojnots tein motemaka keman tikelnamikij imikilis Cristo monankilia seki netajtanilmej, xa monekis maj okachi tikmelauilikan. Para tiknankiliskej tein techtajtanis uelis tikuiskej tamachtilis “¿Keyej keman kielnamikij imikilis Cristo itaixpantijkauan Jiova amo kichiuaj kemej okseki taneltokalismej?”, tein moajsi itech jw.org. Achto ke tikelnamikiskej imikilis Cristo, nejon tonal uan satepan, tiknekij tikchiuaskej nochi tein tiueliskej para tikinpaleuiskej nochin akin kipiaj “tanemilil tein moneki”, ijkon no uelis kinpaleuis nejon nechikol (Hech. 13:48).

MAJ TIKINPALEUIKAN AKIN AMO TANOJNOTSAJOK NION MONECHIKOUAJOK

17. ¿Keniuj tayekananij uelis kinpaleuiskej akin amo tanojnotsajok nion monechikouajok? (Ezequiel 34:​12, 16).

¹⁷ ¿Keniuj itech tonalmej keman tikelnamikij imikilis Cristo, tayekananij uelis kinpaleuiskej akin amo tanojnotsajok nion monechikouajok? Maj kinnextilikan ke kintasojtaj uan ke ininka motekipachouaj (xikonixtajtolti Ezequiel 34:​12, 16). Tokniuan tayekananij, achto ke tikelnamikiskej imikilis Cristo xikinnotsakan nochin akin nanueliskej. Xikiniluikan ke ininka namotekipachouaj uan ke nankinekij nankinpaleuiskej. Xikinyoleuakan maj yakan keman tikelnamikiskej imikilis Cristo uan komo youij xikinnextilikan ke nankintasojtaj. Satepan ke panos nejon tonal xiksentokakan xikinkalpanokan oso xikinnotsakan nejon tokniuan uan xikinpaleuikan maj oksepa kitekitilikan Jehová (1 Ped. 2:25).

18. ¿Keniuj tinochin uelis tikinpaleuiskej akin amo tanojnotsajok nion monechikouajok? (Romanos 12:10).

¹⁸ Tinochin uelis tikinpaleuiskej akin amo tanojnotsajok nion monechikouajok keman touan kielnamikiskej imikilis Cristo. ¿Keniuj? Komo tikintasojtaj, kuali tikinseliaj uan tikinpoujkaitaj (xikonixtajtolti Romanos 12:10). Maj tikelnamikikan ke nejin tokniuan xa ouij kinkisak oksepa yaskej nechikol. Xa mouiaj maj tokniuan kinijijtokan.e Yejua ika maj amo tikintajtanikan teisa tein kinpinaujtis oso tein kinyolkokos (1 Tes. 5:11). Yejuan nojma tokniuan uan tiyolpakij tiksenueyichiuaskej Jehová iniuan (Sal. 119:176; Hech. 20:35).

19. ¿Keniuj tapaleuia keman tikelnamikij imikilis Cristo?

¹⁹ Semi tiktasojkamatiliaj Jesús porin technauatij maj xijxiujtika tikelnamikikan imikilis. Uan tikajsikamatij keyej semi moneki, porin keman timosentiliaj nejon tonal semi techpaleuia tejuan uan no oksekin (Is. 48:​17, 18). Techpaleuia maj okachi tikintasojtakan Jehová uan Jesús. Ueli tikinnextiliaj ke semi tikintasojkamatiliaj tein toka kichiujkej. No techpaleuia maj okachi kuali timouikakan iniuan tokniuan, uan ueli tikinpaleuiaj oksekin maj kimatikan toni moneki kichiuaskej para kiseliskej tatiochiualismej tein uelis kipiaskej porin Cristo toka momikilij. Yejua ika desde axkan maj tikchiuakan tein moneki para uelis tikelnamikiskej imikilis Cristo, tonal tein semi moneki maj tikelnamikikan.