Tein tikseliaj porin Jehová techtasojta

1. ¿Keniuj uelis tikyolpaktiskej Jehová?

MAJ tiknemilikan ke tiktayokoliaj aksa teisa tein semi kualtsin uan kipaleuis. ¿Keniuj timomachiliskiaj komo tikitaskiaj ke kieua uan amo kikui? Xa semi titayokoyaskiaj, sayoj ke semi tiyolpakiskiaj komo tikitaskiaj ke kikui tein tiktayokolijkej. ¿Toni techmachtia nejin? Jehová kitemakak iKonetsin maj toka momikili. Yejua ika semi yolpaki keman tiktasojkamatij maj Jesús taxtauani para techmakixtis uan porin kinextij ke techtasojta (Juan 3:16; Rom. 5:​7, 8).

2. ¿Toni tikitaskej itech nejin tamachtilis?

² Xa ijkon kemej panos tiempo, amo semi tiktasojkamatiliskejok Jehová porin Jesús taxtauak para techmakixtis. Komo ijkon tikchiuaskiaj, kemej yeskia tiktalijtoskiaj tein techtayokolij kampa amo tikitaj uan nion no tikelnamikij. Para maj amo techpano nejon moneki maj nochipa tikintasojkamatilikan Jehová uan Jesús tein toka kichiuanij. Nejin tamachtilis techpaleuis maj ijkon tikchiuakan. Ika titajtoskej keniuj tein Jehová techtayokolij techpaleuia axkan uan keniuj techpaleuis satepan. No tikitaskej toni uelis tikchiuaskej para nochipa tiknextiliskej Jehová ke tiktasojkamatiliaj porin techtasojta, uan okachiok seki tonalmej achto uan satepan ke tikelnamikiskej imikilis Cristo.

¿KENIUJ TECHPALEUIA AXKAN?

3. ¿Keniuj techpaleuia maj Jesús toka momikiliani?

³ Desde axkanya techpaleuijtok maj Cristo toka momikiliani, porin ika nejon Jehová techtapojpoluilia totajtakoluan. Yejua techtapojpoluia porin kineki ijkon kichiuas uan amo porin aksa kichikaujkauia maj techtapojpolui. Itech se nekuikatil David kijtoj keniuj motasojkamatia porin Jehová kitapojpoluiaya, yejua kijtoj: “Tejua, Jehová, tiyolkuali uan tikneki titetapojpoluis” (Sal. 86:5; 103:​3, 10-13).

4. ¿Akonimej Jehová kinekia kinpaleuis keman kitemakak iKonetsin? (Lucas 5:32; 1 Timoteo 1:15).

⁴ Sekin kimachiliaj ke amo kinnamiki maj Jehová kintapojpolui. Sayoj ke tein melauj nion akin kinamiki maj kitapojpoluikan. Tatitanil Pablo kijtoj: “Amo nechnamiki maj nechnotsakan tatitanil”. Uan satepan kijtoj: “Kemej Dios nechnextilij itatiochiualis tein amo technamiki, ueli nikchiua nejin tekit” (1 Cor. 15:​9, 10). Keman timoyolpataj porin titajtakolchiujkej, Jehová techtapojpoluia. ¿Keyej? Amo porin technamiki ta kichiua porin techtasojta. Yejua ika komo titayokoyaj porin tiknemiliaj ke amo technamiki maj Jehová techtapojpolui, maj tikelnamikikan ke kitemakak iKonetsin para kiixtauas inintajtakoluan akin moyolpataj (xikonlero Lucas 5:32; 1 Timoteo 1:15).

5. ¿Keyej amo akin moneki kijtos ke kinamiki maj Jehová kitapojpolui?

⁵ Maski miak xiujmejya tiktekitilijtokej Jehová, amo keman moneki tiknemiliskej ke technamiki maj techtapojpolui. Yejuatsin kielnamiki nochi tein kuali tein tikchiuanij para tiktekitiliskej (Heb. 6:10). Sayoj ke Jehová amo techmakak iKonetsin para ika techtaxtauis keman tiktekitiliaj, ta kichiuak porin kinekia techtayokolis. Yejua ika amo kuali yeskia komo tiknemiliskiaj ke technamiki maj Jehová techtapojpolui porin tiktekitilijkejya, komo ijkon tiknemiliskiaj kemej yeskia tikijtojtoskiaj ke amo monekia maj Cristo toka momikili (no xikonita Gálatas 2:21).

6. ¿Keyej Pablo semi mochikauak kitekitilis Jehová?

⁶ Pablo kimatia ke maski semi kitekitiliskia Jehová, nejon amo kichiuaskia maj Dios kitapojpolui. Komo ijkon, ¿keyej semi mochikauaya kitekitilis? Porin kinekia kinextilis Jehová ke semi kitasojkamatiliaya maj kiikneliani uan porin katka kualtakat iuan (Efes. 3:7). Tejuan tiksentokaj tiktekitiliaj Jehová amo porin tiknekij maj techikneli uan maj yolkuali touan, ta tiknekij tiknextiliskej ke tiktasojkamatiliaj porin techiknelia.

7. ¿Keniuj no techpaleuia maj Jesús taxtauani para techmakixtis? (Romanos 5:1; Santiago 2:23).

⁷ Maj Jesús taxtauani para techmakixtis no techpaleuia maj tel kuali timouikakan iuan Jehová.a Itech okse tamachtilis tikitakej ke keman tiyolij ayamo kuali timouikaj iuan Dios. Sayoj ke kemej Jesús taxtauak, uelis ‘kuali iuan timouikaskej’ uan iuan timotokiskej (xikonlero Romanos 5:1; Santiago 2:23).

8. ¿Keyej moneki tiktasojkamatiliskej Jehová maj ueli tiktataujtikan?

⁸ Ueli tiktataujtiaj Jehová porin kuali iuan timouikaj. Yejua amo sayoj kikaki keman tiktataujtiaj itech nechikolmej, ta no techkaki keman tiktataujtiaj toselti. Keman timotataujtiaj techpaleuia maj kualtsin timomachilikan uan maj tiyolseujtokan, sayoj ke okachi techpaleuia porin ueli okachi timouikaj iuan Dios (Sal. 65:2; Sant. 4:8; 1 Juan 5:14). Keman Jesús yetoya nikan taltikpak, nochipa motataujtiaya porin kimatia ke Jehová kikakia. No kimatia ke nejon kipaleuiaya maj kisentoka kuali iuan mouika (Luc. 5:16). Kemej Jesús toka motemakak ueli timouikaj iuan Jehová uan ueli tiktataujtiaj, yejua ika semi tiktasojkamatij.

¿KENIUJ UELIS TECHPALEUIS SATEPAN?

9. ¿Keniuj kinpaleuis itekitikauan Jehová maj Jesús taxtauani para techmakixtis?

⁹ ¿Keniuj satepan uelis kinpaleuis itekitikauan Jehová maj Jesús taxtauani para techmakixtis? Jehová kichiuas maj nemikan nochipaya. Miakej kinemiliaj ke amo keman uelis tinemiskej nochipaya porin tel miakej momikilianij desde ne uejkaujya. Sayoj ke Jehová techchijchiuak kemej uelis tinemiskej nochipaya. Uan maski sekin kimojkakakij uan amo kineltokaj nejin, tikmatij ke yekmelauj mochiuas porin Jehová taxtauak keman kitemakak iKonetsin akin semi kitasojtaya (Rom. 8:32).

10. ¿Toni semi kichiaj taijitalmej uan okseki ichkamej?

¹⁰ Maski tein Jehová motenkaujtok mochiuas satepan, yejua kineki maj desde axkanya tiyolpakikan. Taijitalmej semi kichiaj nemiskej ne iluikak uan kiixyekanaskej taltikpak iuan Cristo (Apoc. 20:6). Uan okseki ichkamej no semi kichiaj nemiskej nikan taltikpak itech se xochital kampa amo akinok tayokoyas nion tajyouis (Apoc. 21:​3, 4). ¿Tikonchia tionnemis nochipaya nikan taltikpak? Nejin no semi kipia ipatiuj kemej tein kichiaj kiseliskej akin nemiskej iluikak. Jehová techchijchiuak maj tinemikan nochipaya nikan taltikpak, yejua ika semi tiyolpakiskej nikan tinemiskej.

11, 12. ¿Toni tiktelnekijya maj mochiua? (No xikonita taixkopimej).

¹¹ Xikonnemili keniuj tionnemis itech xochital, amo kemanok mitsontekipachos xionkokolispeua oso hasta xionmomikili (Is. 25:8; 33:24). Jehová mitsonmakas nochi tein kuali tein tikonnekis. ¿Tikonuelitaskia okachi tikonixmatis tapialmej? ¿Tikonuelitaskia tionmomachtis keniuj tiontatsotsonas? ¿Tikonuelitaskia tionuelis tikonchijchiuas dibujos? Itech xochital monekis maj techpaleuikan akin uelij kinchijchiuaj kalmej, akin kinchijchiuaj teposmej para se tekitis, akin tatokaj, akin takualchiuaj, akin kitokaj xochimej uan kinyekpiaj (Is. 35:1; 65:21). Keman tionnemis nochipaya, tikonpias miak tiempo para tionmomachtis nochi tein tikonnekis.

¹² ¡Tel kualtsin yeski keman tikinseliskej akin oksepa nemiskej! (Hech. 24:15). Uan semi tiyolpakiskej tiksentokaskej okachi tikixmatiskej Jehová uan nochi tein kichijchiuak (Sal. 104:24; Is. 11:9). Uan okachi kualtsin yeski porin amo titajtakolchiuaskejok, yejua ika amo monekisok tiktajtaniskej Jehová maj techtapojpolui uan uelis tikueyichiuaskej. ¿Melauj ke amo tikonixtopeuaskia tionnemis itech xochital sayoj para ‘tionmoyolpaktis ika tajtakol’ tein panotikisa? (Heb. 11:25). Keman ompa tinemiskej yeski okachi kualtsin ke tein yeski taman tein uelis tikpiaskej axkan. Xikonelnamiki ke xochital amo nochipa tikchixtoskej, ta ejkos tonal keman ompa tinemiskejya. Uan nejin ueli mochiua porin Jehová semi techtasojta uan kitemakak iKonetsin maj toka momikili.

¿KENIUJ UELIS TIKONTASOJKAMATILIS JEHOVÁ PORIN MITSONTASOJTA?

13. ¿Keniuj uelis tiktasojkamatiliskej Jehová porin techtasojta? (2 Corintios 6:1).

¹³ ¿Keniuj uelis tiktasojkamatiliskej Jehová maj kitemakani iKonetsin para techmakixtis? Uelis ijkon tikchiuaskej komo nochipa tiktayekanaltiaj tiktekitiliskej (Mat. 6:33). Jesús ipa ‘momikilij ininka nochin para maj amo kichiuakan tein sayoj yejuan kinekij, ta maj kiyolpaktikan Cristo akin ininka momikilij uan oksepa nemik’ (2 Cor. 5:15). Jehová tel yolkuali uan techtapojpoluij. Keman tikchiuaj nochi tein tiuelij para tiktekitiliskej, tiknextiaj ke tikajsikamatij nochi tein kichiuani para techpaleuis uan ke semi tiktasojkamatiliaj (xikonlero 2 Corintios 6:1).

14. ¿Keniuj uelis tiknextiskej ke iuan titakuaujtamatij Jehová uan tiktakamatij?

¹⁴ No tiktasojkamatiliaj Jehová maj techtasojta keman tiknextiaj ke iuan titakuaujtamatij uan tiktakamatij tein tanauatia. ¿Keniuj uelis tikchiuaskej? Keman tikixtalitij teisa moneki tikitaskej toni kineki Jehová maj tikchiuakan, xa keman tikitaskej ox tiksentokaskej timomachtiskej escuela oso toni ika titekitiskej (1 Cor. 10:31; 2 Cor. 5:7). Keman tikixpejpenaj teisa uan tikchiuaj tein Jehová techyolmajxitia, okachi iuan titakuaujtamatij uan kuali iuan timouikaj. Uan okachi tikneltokaj ke yekmelauj uelis tinemiskej nochipaya (Rom. 5:​3-5; Sant. 2:​21, 22).

15. ¿Keniuj uelis tiknextiskej ke timotasojkamatij keman tikelnamikiskej imikilis Cristo?

¹⁵ No uelis tikchiuaskej okse taman para tiknextiliskej Jehová ke tiktasojkamatiliaj maj techtasojta. Achto uan satepan ke tikelnamikiskej imikilis Cristo uelis tiknextiliskej ke tiktasojkamatiliaj maj kitemakani iKonetsin. Amo sayoj maj tikixtalikan tejuan ompa tietoskej, ta no maj tikinyoleuakan oksekin (1 Tim. 2:4). Keman tikinyoleuaskej, maj tikinmelauilikan toni tikchiuaj itech nejon nechikol. Uelis tikuiskej videos ¿Keyej momikilij Jesús? uan Ijkuak tikelnamikij imikilis Jesús, tein moajsij itech jw.org. Tayekananij kinyoleuaskej akin amo touan monechikouajok nion tanojnotsajok. Xikonnemili keniuj ne iluikak uan nikan taltikpak semi yolpakiskej keman kiitaskej ke semej iichkauan Jehová akin mopolojka kineki oksepa mokepas (Luc. 15:​4-7). Keman tikelnamikiskej imikilis Cristo, maj amo tikixtalikan sayoj tikintajpaloskej akin ipa monechikouaj, ta no akin yekinika yaskej uan akin amo monechikojtoyajok. Tiknekij titapaleuiskej maj nochin kuali momachilikan (Rom. 12:13).

16. ¿Keyej moneki okachi tiktekitiliskej Jehová itech tonalmej keman tikelnamikij imikilis Cristo?

¹⁶ ¿Uelis okachi tikontekitilis Jehová itech tonalmej keman tikelnamikij imikilis Cristo? Ijkon no uelis tiknextiskej ke tikintasojkamatiliaj Jehová uan Jesús tein toka kichiuanij. Komo okachi titanojnotsaj tikitaskej keniuj Jehová techpaleuia uan okachi iuan titakuaujtamatiskej (1 Cor. 3:9). Uan no, maj tiklerokan itech Biblia tein ixyetok tikleroskej nejon tonalmej, tein nesi itech folleto Maj timomachtikan iTajtol Dios mojmostaj uan tein nesi itech amaix Tonemilis uan toTanojnotsalis. Hasta uelis tikuiskej nejon textos para tiktemoskej okseki tamachtilis tein techpaleuis.

17. ¿Toni okachi kiyolpaktia Jehová? (No xikonita recuadro “¿Keniuj uelis tiknextiliskej Jehová ke tiktasojkamatiliaj?”).

¹⁷ Sayoj ke amo xionmotekipacho komo amo ueli tikonchiua nochi tein timomachtijkejya. Xikonelnamiki ke Jehová amo kinemilia ke oksekin okachi kitekitiliaj ke tejuatsin. Yejua kiita tein tikonpia moyolijtik uan semi yolpaki porin kimati ke semi tionmotasojkamati maj Jesús taxtauani para mitsonmakixtis (1 Sam. 16:7; Mar. 12:​41-44).

18. ¿Keyej semi tikintasojkamatiliaj Jehová uan Jesús?

¹⁸ Kemej Jesús toka momikilij, Jehová ueli techtapojpoluilia totajtakoluan, ueli kuali iuan timouikaj uan satepan uelis tinemiskej nochipaya. Maj nochipa tiknextikan ke tiktasojkamatiliaj Jehová porin techtasojta uan kineki techmakas miak taman tein kuali (1 Juan 4:19). Uan no, maj tiknextikan ke tiktasojkamatiliaj Jesús porin semi techtasojtak uan toka momikilij (Juan 15:13).