NETAJTANIL 10
¿Uelis nechpaleuis Biblia?
¿TEJUA TONI TIKCHIUASKIA?
Xiknemili nejin: David nejnentok itech se xolal, uan kemej semi tayouayan amo ixmati kani moajsi. Ompa, kiita ke amo yetok kampa monekia yetos. Moixpojpoloj. Amo kimatik kemanian peuak kitoka okse ojti.
Komo tiyeskia tiDavid, ¿toni tikchiuaskia?
XIMOTSAKUILI UAN XITANEMILI
Uelis tikchiuas miak taman:
Tiktajtanis aksa maj mitsilui keniuj tiajsis kampa tikneki.
Tiktemos tein ika timotauilis.
Tiksentokas tinejnemis uan tiknemilis ke tikajsitiuj ojti tein mitsajxitis kampa tikneki tiyas.
Moyekita ke expatika taman yejua tein okachi amo mitspaleuis.
Ojpatika okachi kuali ke yekinika: tikpias tein ika timotauilis, uan ijkon tikitas kanikauin tinejnemi.
Biblia no ijkon uelis mitspaleuis.
Nejin amatajkuilol tein okachi monamaka kemej nion okse amatajkuilol uelis:
Mitsyolmajxitis keman tikpias kuejmolmej.
Mitspaleuis okachi xikmati keniuj titanemilia uan okachi kuali ximonejnemilti.
Mitsmachtis keniuj okachi tiyolpakis.
ITANANKILILUAN NETAJTANILMEJ TEIN OKACHI MONEKIJ
Keman peua ueli titajtouaj, titajtanij miak taman:
¿Kani ajsi iluikak?
¿Toni ika chijchiujtokej sitalimej?
Satepan peuak titajtanij keyej panoua seki taman:
¿Keyej techpanoua tein amo kuali?
¿Keyej timomikiliaj?
¿Tikmatia ke Biblia kinankilia nejin netajtanilmej?
Miakej kijtouaj ke Biblia kipia miak tetapouilis tein amo melauak, oso ke se amatajkuilol tein amo akin kikuiok oso ke semi ouij se kiajsikamati. Sayoj ke ¿melauak nejon? ¿Oso sayoj kijtouaj tein tekakilianij? ¿Uelis amo kimatij tein melauak?
Kemej neskayot, miakej kinemiliaj ke Biblia kijtoua ke Dios kiixyekana nochi tein mochiua nikan taltikpak. Sayoj ke ¿taixejekol nejon? Nikan taltikpak mochiua tel miak taman tein amo kuali. Noyampa tikitaj ke miakej tajyouiaj, kokolispeuaj uan momikiliaj, tatasojti uan mochiuaj tetsaujmej. ¿Se Dios akin techtasojta uelis kichiuas nochin nejin?
¿Tikuelitaskia tikmatis akoni kiixyekana tein mochiua nikan taltikpak? Tikmoujkaitas tanankilil tein kitemaka Biblia.
Xa tikitakya ke tein tayolmajxitia nejin amaix mokixtia itech Biblia. Itaixpantijkauan Jiova senkis kineltokaj ke Biblia kitemaka kuali nepaleuil porin “Dios kichiuak ika ichikaualisuan. Ika ya nojon in Tajtoltsin de Dios uelis se kuitinemis para ika se tamachtijtinemis uan no para ika se kintaneltoktijtinemis in tagayot ma kikautiyakan nintajtakoluan. Uan no in Tajtoltsin de Dios uelis se kuitiyas para ika kinyolmelautiyas” (2 Timoteo 3:16, 17). Xikixmati nejin amatajkuilol tein maski semi uejkauj kayot, kisentoka tapaleuia.