Xikelnamiki inamik Lot

Lot nemia Canaán iuan itío, Abrahán. Sejsemej kipiayaj tel miak tapialmej uan ejkok tonal keman amo akiajok nochin. Yejua ika, Abrahán kiluij Lot: “Amo ueliok tiksentokaj tisennemij. Ika kualtakayot, xikixpejpena kanikauin tikneki tiyas, uan nejua niyas oksekopa”. ¿Melauj ke Abrahán tel yolkuali katka?

Lot kiitak ke onkaya se tal kampa tel takualtsinkan, kampa onkaya miak at uan xiuit. Yejua ika kiixpejpenak nejon tal, uan ompa mokaltalito iniuan ichankauan. Amo uejka moajsia se xolal tein motokaytiaya Sodoma.

Akin nemiaj Sodoma uan xolal Gomorra, tein ompakauin moajsia, tel amo yolkualmej katkaj. Yejua ika, Jiova kiixtalij kinixpolos. Sayoj ke Dios kinekia kimakixtis Lot uan ichankauan, yejua ika kintitanik ome ángeles maj kiniluitij: “¡Ijsiujka! ¡Xikisakan itech nejin xolal! ¡Jiova kiixpoloti!”.

Sayoj ke Lot amo niman kisak, ta uejkauak. Yejua ika ángeles kinmakitskijkej yejua, inamik uan ome iichpochuan, uan ijsiujka kinkixtijkej itech xolal. Kiniluijkej: “¡Xitsikuinikan! ¡Xicholokan uan ijkon amo nanmikiskej, uan amo xiikantachiakan! Komo nanikantachiaj, nanmikiskej”.

Keman ajsikej itech xolal Zóar, Jiova kichiuak maj uetsini tit uan azufre ompa Sodoma uan Gomorra. Nejon ome xolalmej senkis ixpoliujkej. Inamik Lot amo kitakamatik Jiova, ikantachiak uan mokepak istat uan mokauak kemej se kalikxit. Sayoj ke Lot uan iichpochuan makiskej porin tatakamatkej. Semi motayokoltijkej porin inamik Lot amo tatakamatik, sayoj ke no yolseujtoyaj porin yejuan kemaj kitakamatkej Jiova.