Yekinika eyi chauismej

Israelitas katkaj takeualmej, uan egipcios kinteltekitiltiayaj. Jiova kintitanik Moisés uan Aarón maj kiluitij faraón: “Xikaua noxolal maj nechueyichiuati taluakyan”. Faraón motelueyinekia uan tanankilij: “Amo notekiuj tein kijtos Jiova. Amo nikinkauas israelitas maj yakan”. Satepan, faraón kichiuak maj okachi kintekitiltikan. Sayoj ke Jiova kitakakiltij. ¿Toni kichiuak? Kititanik majtakti chauismej itech altepet Egipto. Jiova kiluij Moisés: “Faraón amo nechkaki. Kualkampa yejua yetos itech ueyiat Nilo. Xikiluiti ke nochi at itech ueyiat mokepas esti porin amo kikaua noxolal maj youi”. Moisés tatakamatik uan kiitato faraón. Faraón kiitak keman Aarón kiuitekik ueyiat Nilo ika itopil, uan at mokepak esti. Ueyiat peuak tsojyaya, amo ueliaj ompa tayiaj at, uan amichimej mikkej. Sayoj ke faraón ayamo kinekia kinkauas maj yakan.

Chikome tonal satepan, Jiova oksepa kititanik Moisés maj kiluiti faraón: “Komo amo tikaua noxolal maj youi, itech nochi Egipto onkaskej tel miakej kalamej”. Kemej faraón amo kikakik, Aarón kiajokuik itopil, uan itech nochi altepet peuak tel onkaj miak kalamej. Onkayaj kalamej kalijtik, kampa kochiaj uan kampa takuayaj. ¡Noyampa moajsiaj! Faraón kiluij Moisés: “Xikilui Jiova maj tami chauis. Ompa, nikinkauas israelitas maj yakan”. Yejua ika Jiova kitsakuilij chauis, uan egipcios miakkan kinnepanojkej kalamej tein mikkej. Itech altepet peuak tel tatsojyaya, sayoj ke oksepa, faraón amo kinkauak israelitas maj yakan.

Satepan, Jiova kiluij Moisés: “Maj Aarón kiuiteki tal ika itopil, uan talnex mokepas pisilmoyomej”. Uan ijkon mochiuak, noyampa neskej pisilmoyomej tein kintijtipiniayaj taltikpakneminij. Seki egipcios kiluijkej faraón: “¡Nejin chauis kiualtitanik Dios!”. Sayoj ke, maski ijkon, faraón amo kinkauak israelitas maj yakan.