Okseki chikuasen chauismej

Moisés uan Aarón kimatiltitoj faraón nejin tein Dios kijtouaya: “Komo amo tikaua noxolal maj youi, niktitanis sayolimej itech altepet”. Nejin sayolimej katkaj uejueyi moyomej tein kintipiniayaj taltikpakneminij. Tel miakej nejon moyomej kalakkej ininchan egipcios: akin tominpiayaj uan akin amo. Itech nochi altepet onkayaj sayolimej. Sayoj ke itech xolal Gosén, kampa nemiaj israelitas, amo onkaya nion se. Nejin naujpatika chauis uan okseki chikuasen amo kinijtakoj israelitas, ta sayoj egipcios. Faraón kitataujtij Moisés: “Xikilui Jiova maj kinijkuani nejin moyomej, uan satepan moxolal uelis yas”. Sayoj ke keman Jiova kinijkuanij, faraón kipatak itanemilil. ¿Tiknemilia ke faraón takakiskia se tonal?

Satepan, Jiova kijtoj: “Komo faraón amo kikaua noxolal maj youi, inintapialuan egipcios kokolispeuaskej uan mikiskej”. Mostika, mochiuak tein Jiova kijtojka, sayoj ke inintapialuan israelitas amo teyi kinpanok. Maski ijkon, faraón amo takakik, porin yoltakuauak katka.

Ompa, Jiova kinauatij Moisés maj mokepani kampa faraón uan maj kiajkopixouani koujnex. Koujnex mokepak se taman talnex tein moajsik itech ejekat uan tein uetsik kampa nemiaj egipcios. Nejon talnex kichiuak maj yejuan uan inintapialuan kipianij kokomej tein semi kinkokouaya. Sayoj ke faraón oksepa kiniluij israelitas ke amo ueliskia yaskej.

Jiova oksepa kititanik Moisés maj kiluiti faraón: “¿Ayamo tikneki tikauas noxolal maj youi? Mosta nikchiuas maj tejsiui”. Mostika, Jiova kichiuak maj tejsiui, maj tatikuini uan maj uetsi tit. Amo keman mochiujtoya se tetsauit kemej nejon ompa Egipto. Kitamij koujmej uan tatok, sayoj ke ompa Gosén amo teyi panok. Ompa faraón kijtoj: “Xikilui Jiova maj kitsakuili nejin, uan uelis nanyaskej”. Sayoj ke niman keman amo tejsiuikok nion kiouikok, faraón kipatak itanemilil.

Yejua ika Moisés kijtoj: “Axkan chapolimej kikuaskej xiuit tein amo kijtakoj kiouit”. Tel miakej chapolimej kikuajkej nochi tein mokaujka itech koujmej uan tatok. Faraón kitataujtij Moisés: “Xikilui Jiova maj kinijkuani chapolimej”. Sayoj ke satepan ke Jiova kinijkuanij chapolimej, faraón kisentokak yoltakuauak.

Ompa Jiova kiluij Moisés: “Ximomaajkoketsa”. Niman noyampa tatayouayantiak. Egipcios amo uelik kiitakej nion teyi itech eyi tonalmej. Sayoj kampa nemiaj israelitas tanestoya.

Faraón kiluij Moisés: “Tejua uan moxolal uelis nanyaskej, sayoj ke xikinkauakan nanmotapialuan”. Moisés kinankilij: “Moneki tikinuikaskej totapialuan porin tikmakaskej nemaktilmej toDios”. Faraón tel kualanik uan kitsajtsilij: “¡Xiyouj! Komo oksepa nimitsita, nimitsmiktis”.