Tanojnots 27
Se tekiuaj amo yolkuali taixyekanak Egipto
NEJIN takamej tein tikinita itech taixkopin, kintekitiltijtokej taltikpakneminij. ¡Xikita takat tein kiuijuitektok tekitikej ika se kuetaxtamalin! Nejin tekitinij ichankauan Jacob, uan motokaytiaj israelitas. Uan tein tatekitiltiaj kayomej Egipto. Israelitas mochiujkej imin tekitikauan egipcios. ¿Keniuj mochiuak nejin?
Nochin ichankauan Jacob kualtsin nenkej miak xiujmej itech altepet Egipto. José, takat tein kipiaya ueyi tanauatil maski amo semi kemej tekiuaj Faraón, kinitaya israelitas. Sayoj ika, satepan José momikilij. Uan okse yankuik Faraón, tein amo kinitalania israelitas, peuak tekiuajti Egipto.
Nejin Faraón amo yolkuali kinteltekitiltij israelitas. Uan takamej tein kintalij maj kinitanij, katkaj tel amo yolkualmej uan teikamauiltianij. Nejin takamej kinteltekitiltiayaj maj kichijchiuanij ialtepeuan Faraón. Sayoj ika, kemej panouayaj tonalmej israelitas kisentokayaj momiakiliayaj. Yejika egipcios kinimouiliayaj maj okachi momiakilianij uan maj se tonal inpan yanij.
¿Tikmati toni kichiuak Faraón? Kininotsak siuamej tein kinpaleuiayaj tenamej keman kipiayaj se konet, uan kiniluij: ‘Xikinimiktikan nochin okichpipil tein nemiskej’. Sayoj ika, nejin siuamej katkaj yolkualmej uan amo kinimiktiayaj konemej.
Yejika Faraón kinimakak nochin tein nemiaj itech altepet nejin tanauatil: ‘Xikinimiktikan nochin okichpipil israelitas. Sayoj xikinkauakan siuapipil’. ¿Amo timoluia ika tel amo kuali nejin tanauatil? Maj tikitakan keniuj mopaleuij se konet.