Kinmakixtia itech ueyiat Chichiltik

Keman faraón kikakik ke israelitas kiskaj Egipto, monemilij maj amo kinkauani maj yanij. Yejua ika kinnauatij itateuijkauan: “Xikyektalikan nochi nocarros tein ika nitateuia, uan maj tikintojtokakan. Maj amo tikinkauanij maj yanij”. Ompa, yejua uan itateuijkauan peuak kintojtokaj israelitas.

Jiova kiixyekanaya ixolal, tonayan ika se mixti uan youak ika se tit. Kinajxitij itech ueyiat Chichiltik uan kiniluij maj ompa kitalianij inintakenkaluan.

Satepan, israelitas kiitakej ke faraón uan itateuijkauan kintojtokayaj. Ininixpan israelitas yetoya ueyiat uan taikan ualayaj tateuianij egipcios. Israelitas peuak kitsajtsiliaj Moisés: “¡Timikitij! ¿Keyej titechkixtij Egipto?”. Sayoj ke Moisés kinnankilij: “Amo ximouikan. Ximochiakan uan xikitakan keniuj techmakixtia Jiova”. ¿Melauj ke Moisés semi takuaujtamatia iuan Jiova?

Ompa, Jiova kiniluij israelitas maj oksepa peuanij ojtokanij. Nejon youak, Jiova kiolinij mixti uan kitalij ininixpan egipcios. Kampa ika ualayaj egipcios tatayouayan katka, sayoj ke kampa ika yayaj israelitas tanestoya.

Satepan, Jiova kiluij Moisés maj momasoua itech ueyiat. Ompa kichiuak maj chikauak taejekani nochi youal. Ueyiat moxeloj, uan tatajko mochiuak se ojti. Millones israelitas kipanauijkej ueyiat itech tal uakik keman at motsakuilijtoya tajtanakastan.

Itateuijkauan faraón kintojtokakej israelitas itech tal uakik. Sayoj ke Jiova kichiuak maj egipcios amo kimatinij toni kichiuaskej. Ruedas tein kipiayaj inincarros kojkopinkej. Ompa tateuianij tsajtsikej: “¡Maj tikisakan! Jiova tateuijtok ininka israelitas”.

Jiova kiluij Moisés: “Ximomasoua itech ueyiat”. Ompa, at tein motsakuilijtoya tajtanakastan uetsik ininpan tateuianij egipcios. Faraón uan nochin itateuijkauan momikilijkej. Nion se makisak.

Oksekopa, nochin kiueyitalijkej Dios ika se nekuikatil: “Nimokuikatis iixpan Jiova, porin semi moueyitalij. Caballo uan akin ipan yaya kintamotak itech ueyiat”. Keman israelitas mokuikatiayaj, siuamej mijtotiayaj uan kitsiliniayaj panderetas. Nochin tel yolpakiaj porin amo akinok kintajyouiltiskia.