Dios kinmakixtij israelitas

MIAK xiujmej satepan, israelitas kisentokayaj kipiayaj kuali nemilis ompa Egipto uan motelmiakilijkajya. Ompa, okse yankuik faraón tein nion tepitsin teikneliaya peuak tekiuajti. Yejua amo kiixmatia José. Kemej kiitaya ke israelitas motelmiakilijkajya, tanauatij maj kinteltekitiltikan, uan maj kinpantamotakan itech ueyiat Nilo nochin konetsitsin okichpipil tein yoliskiaj. Se siuat israelita yolchikauak kikalakij ikonetsin itech se chikiuit uan ­kitatij axiujtsalan. Iichpoch faraón kiajsik ne­jin konetsin, kitokaytij Moisés uan kiskaltij ichan tekiuaj.

Keman Moisés kipiaya 40 xiujmej, mokuejmolkalakij porin kimakixtij se israelita keman se tayekankej egipcio kitajyouiltijtoya. Keman kipiaya 80 xiujmej, Dios kinauatij maj mokepani Egipto uan maj kiiluiani faraón maj kinkauani israelitas maj kisakan.

Kemej faraón senkis amo kinekik, Dios kintatsakuiltij egipcios ika majtakti chauismej. Achto ke ualaskia sejse chauis, Moisés kinejmachtiaya faraón, ta ijkon ueliskia moyolpataskia uan amo kiseliskia chauismej. Sayoj ke faraón nochipa moueyimatia uan kiixnamikia Moisés uan Jiova. Itech majtaktika chauis, Jiova kititanik se ángel maj kinmiktiti nochin tayekankakonemej itech nejon altepet. Sayoj kinkauak kalyetouanij tein kitakamatkej Jiova uan kikuijkuiltijkej imin kajkaltenkouj iesyo se ichkat tein kimiktijkaj. Israelitas kielnamikiaj xijxiujtika nejon nemakixtilis ika se talnamikilis tein moixmati kemej Pascua.

Keman faraón kiitak ke kimiktijkej itayekankakonetsin, kinnauatij Moisés uan israe­litas maj kisanij Egipto. Ijsiujka kinsentilijkej israelitas uan kiskej. Sayoj ke satepan faraón kipatak itanemilil. Yejika yejua uan itateuijkauan ika imin carros tein ika tateuiayaj, kinikantokakej israelitas. Keman ajsikej ueyiatenoj Chichiltik, moitaya ke yejuan nion seko ueliskiaj choloskiaj. Sayoj ke Jiova kitapoj ueyiat uan israelitas panokej itech tal uakik. Keman egipcios peuak kinikantokaj, Dios kitsakuak at tein motsakuilijtoya uan faraón uan itateuijkauan moaeltsimijkej.

Satepan, israelitas kitalijkej imin takenkaluan achka itech tepet Sinaí, uan ompa Jiova kichiuak se netenkaualis imiuan. Itechkopa Moisés, kinmakak tanauatilmej tein kinyekanaskia uan kinpaleuiskia itech miak taman tein kichiuaskiaj itech imin nemilis. Komo amo kikauaskiaj Dios uan nochipa kitakamatiskiaj, yejuatsin nochipa yetoskia imiuan uan imin techkopa kiseliskiaj tatiochiualismej okseki altepemej.

Sayoj ke tel miakej kinextijkej ke amo takuaujtamatiaj iuan Jiova. Yejika kinkauak maj nentinemikan itech taluakyan 40 xiujmej. Ompa, Moisés kiixpejpenak se takat tatakamatkej kemej iixpatka. Motokaytij Josué. Amo uejkaua, israelitas yaya kalakitij itech tal tein Dios motenkaujka iuan imin uejkaujtat Abrahán.

​(Motaksaltia itech Éxodo, Levítico, Números, Deuteronomio, Salmo 136:​10-​15 uan Hechos 7:​17-​36.)