Motenkauaj iuan Jiova

Kemej ome metsti satepan ke israelitas kiskej Egipto, ajsikej itech tepet Sinaí uan ompa kitalijkej inintakenkaluan. Ompa Jiova kinauatij Moisés maj pankisani itech nejon tepet uan kiluij: “Nejua nikinmakixtij israelitas. Komo yejuan nechtakamatij uan kichiuaj tein nikinnauatia, yeskij noxolal”. Keman Moisés temok, kiniluij israelitas tein Jiova kijtojka. ¿Toni tanankilijkej? Yejuan kijtojkej: “Tikchiuaskej nochi tein Jiova techiluis”.

Satepan, Moisés oksepa pankisak itech tepet. Ompa Jiova kiluij: “Uipta namechnojnotsati. Xitanauati maj amo kitemokan pankisaskej itech tepet Sinaí”. Moisés temok uan kiniluij israelitas maj kichiuanij tein monekia uan ijkon ueliskiaj kikakiskej Jiova.

Uiptika, israelitas kiitakej ke tapepetania uan ke tatileuik itech tepet. No kikakkej ke chikauak tatikuinik uan ke kakistia se kuaomit. Ompa Jiova temok itech tit. Israelitas tel mouiaj. Itech nochi tepet onkaya pokti uan chikauak talolinia. Kuaomit okachi chikauak mokakia. Ompa Jiova kijtoj: “Nejua niJiova. Amo xikueyichiuakan nion se tiotsin”.

Moisés oksepa pankisak itech tepet, uan ompa Jiova kimakak tanauatilmej tein monekia kitakamatiskej. Itech nejon tanauatilmej kiniluij keniuj monekia kiueyichiuaskej uan keniuj monekia monejnemiltiskej. Moisés kijkuiloj uan satepan kinixtajtoltilij israelitas. Yejuan motenkaujkej: “Tikchiuaskej nochi tein Jiova technauatia”. Kemaj, yejuan kichiujkej se netenkaualis iuan Dios, sayoj ke ¿kichiuaskiaj kemej motenkaujkaj?