12 tapijpianij

Israelitas kiskej itech tepet Sinaí. Ojtokakej itech taluakyan tein poui Parán hasta ajsikej kampa motatokaytiaya Cadés. Ompa Jiova kiluij Moisés: “Xikintitani 12 takamej, se takat akin poui itech sejse uejueyi kalyetouanij, maj tapijpiatij Canaán, tal tein nikinmakati israelitas”. Yejua ika Moisés kinixpejpenak 12 takamej uan kiniluij: “Xiyakan Canaán uan xikitakan ox onkak kuali tal kampa uelis se tatokas. No xikitakan ox taltikpakneminij chikaujkej, uan ox nemij itech takenkalmej oso itech xolalmej”. Nejon 12 tapijpianij yajkej. Omen katkaj Josué uan Caleb.

Tapijpianij mokepkej 40 tonalmej satepan. Kiualkuikej higos, granadas uan uvas, uan kijtojkej: “Canaán se kuali tal, sayoj ke taltikpakneminij chikaujkej, uan xolalmej kinyoualoua uejkapan tepamit”. Sayoj ke Caleb kijtoj: “¡Uelis tikintaniskej! Tiyouij”. ¿Keyej tiknemilia ke Caleb kijtoj nejon? Porin yejua uan Josué takuaujtamatiaj iuan Jiova. Sayoj ke okseki 10 tapijpianij kijtojkej: “Maj amo tiyakan. Taltikpakneminij akin ompa nemij tel uejkapantikej. Ininixpan, tejuan titamatij kemej chapolimej”.

Israelitas amo kinekkejok yaskej, mokuejmolojkej uan peuak moiluiaj: “Maj tikixpejpenakan okse taixyekankej uan maj timokepakan Egipto. ¿Keyej tiyaskej Canaán? ¿Tiyaskej maj techmiktikan?”. Josué uan Caleb kijtojkej: “Okachi kuali maj tiktakamatikan Jiova. Yejuatsin techmatampauis. Amo ximouikan”. Sayoj ke israelitas amo kinkakkej, ta hasta kinekiaj kinmiktiskej.

¿Uan toni kichiuak Jiova? Kiluij Moisés: “Nikchiuani miak taman tein ika nikinpaleuiani israelitas, sayoj ke yejuan kisentokaj amo nechtakamatij. Yejua ika nikinkauati nikan taluakyan 40 xiujmej hasta maj momikilikan. Sayoj ininkoneuan, uan Josué uan Caleb, nemiskej itech tal tein nimotenkauak nikinmakas israelitas”.