TAMACHTILIS 52
Caballos uan carros tein xotatokej
Ben-Hadad, akin tekiuajtia Siria, miakpa kinteuito akin nemiaj Israel. Sayoj ke tanauatijkej Eliseo nochipa kinejmachtiaya akin tekiuajtia Israel uan ijkon uelia cholouaya. Yejua ika Ben-Hadad kiixtalij kikitskis Eliseo. Kimatik ke yetoya itech xolal Dotán uan kintitanik tateuianij maj kikitskitij.
Tateuianij youak ajsikej Dotán. Mostika kualkan, itapaleuijkauj Eliseo kisak uan kinitak tel miakej tateuianij kiyoualojtoyaj xolal. Tel mouik uan kijtoj chikauak: “Eliseo, ¿toni tikchiuatij?”. Eliseo kinankilij: “Moajsij okachi tateuianij touan ke iniuan”. Ijkuak, Jiova kichiuak maj itapaleuijkauj Eliseo kinitani itech tepemej tein kiyoualouayaj xolal miak caballos uan carros tein ika tateuiayaj tein xotatoyaj.
Keman tateuianij akin ualeuayaj Siria kinekkej kikitskiskej Eliseo, yejua kitataujtij Dios: “Jiova, ika kualtakayot, xikchiua maj amo tachiakan”. Ompa, maski ueliajok tachiayaj, tateuianij amo kimatiaj kani yetoyaj. Eliseo kiniluij: “Nanmopolojkej. Xinechtojtokakan, namechuikas kampa yetok takat akin nankitemouaj”. Yejuan kitojtokakej Eliseo uan ajsikej Samaria. Ompa nemia akin tekiuajtia Israel.
Tateuianij kayomej Siria kiitakej kani yetoyaj, sayoj ke amo teyi ueliajok kichiuayaj. Akin tekiuajtia Israel kitajtanij Eliseo: “¿Maj nikinmikti?”. Tateuianij akin kayomej Siria kitemouayaj kijtakoskej Eliseo, ¿momakepaskia Eliseo axkan ke uelia? Amo. Yejua kinankilij tekiuaj: “Amo xikinmikti. Xikintamaka uan xikinkaua maj yakan”. Yejua ika tekiuaj kinchijchiuilij miak takual uan satepan kinkauak maj mokepanij ininchan.
“Tikpiaj ya se ueyi yoltakuautamatilis iuan Dios porin tikmatij ya ke komo tiktajtaniliaj Dios tensa ijkon keme yejua in itanejnekilis [...,] techkakilia.” (1 Juan 5:14)