Jiova amo kualani iuan Jonás

Akin nemiaj itech xolal Nínive, tein pouia Asiria, tel amo yolkualmej katkaj. Jiova kiluij itanauatijkauj, Jonás, maj yani Nínive uan maj kiniluiani taltikpakneminij ke monekia mopataskej. Sayoj ke Jonás amo yajki Nínive, ta choloj oksekopa uan tejkok itech se barco tein yaya se xolal tein motokaytiaya Tarsis.

Keman barco yetoya itech ueyiat, peuak tel chikaujkaejeka, uan akin yayaj itech barco motelmoujtijkej. Kintataujtijkej inintiotsitsin uan motajtanijkej: “¿Keyej techpanoua nejin?”. Satepan, Jonás kiniluij: “Nejua notajtakol. Nicholojtok porin amo nikneki nikchiuas tein Jiova nechnauatij. Xinechpantamotakan aijtik uan ijkon motamatilis chikaujkaejekat”. Takamej amo kinekiaj kipantamotaskej, sayoj ke Jonás kinteliluij maj kichiuanij. Yejua ika kipantamotkej, uan chikaujkaejekat motamatilij.

Jonás kinemilij ke mikiskia. Ijkon kemej okachi pankalakia, kitataujtij Jiova. Ompa Jiova kititanik se ueyi amichij tein kitoloj Jonás, sayoj ke amo kimiktij. Keman yetoya iijtik amichij, Jonás kitataujtij Jiova: “Nimotenkaua ke nochipa nimitstakamatis”. Jiova kichiuak maj Jonás amo momikiliani keman eyi tonal yetoya iijtik amichij. Satepan kichiuak maj amichij kikixtiani Jonás atenoj.

Jiova kimakixtij Jonás, sayoj ke ¿kijtosnekia nejon ke amo monekiaok yas Nínive? Amo. Jiova oksepa kititanik, uan axkan Jonás kemaj kitakamatik. Yajki uan kiniluij akin ompa nemiaj: “Poliui omepoual tonal uan Jiova kiixpoloti xolal”. Ompa panok se taman tein amo kichiaya. Akin nemiaj Nínive mopatakej. Akin tekiuajtia Nínive kiniluij taltikpakneminij: “Xiktataujtikan Dios uan ximoyolnonotsakan, xa ijkon amo techixpolos”. Keman Jiova kiitak ke taltikpakneminij moyolnonotskaj, amo kinixpoloj.

Jonás kualanik porin Jiova amo kinixpoloj. Xiknemili nejin: Jiova amo kualanik iuan Jonás uan kiiknelij. Sayoj ke Jonás amo kiniknelij akin nemiaj Nínive, ta motalij kalampa itech xolal itampa se xikalkomekat uan ixkualantoya. Satepan xikalkomekat uakik, uan Jonás okachiok kualanik. Yejua ika Jiova kiluij: “Okachi ika timotekipachoua nejon xikalkomekat ke ininka akin nemij Nínive. Nejua nikiniknelij, uan yejua ika amo nikinixpoloj”. ¿Toni kinekia kimachtis Jonás? Ke akin nemiaj Nínive okachi kipiayaj ipatiuj ke se tatok.