Daniel moajsi kampa yetokej tekuanimej

Darío, kayot Media, no tekiuajtik Babilonia. Kiitak ke Daniel okachi tamatkej katka, yejua ika kiixtalij maj kinixyekana takamej akin okachi ueyichiuanimej itech altepet. Nejin takamej kinexikoluiayaj Daniel uan kinekiaj kimiktiskej. Kimatiaj ke Daniel kitataujtiaya Jiova expa tonal, yejua ika kiluijkej Darío: “Tekiuaj, monekiskia tikixtalis kemej tanauatil maj nochin sayoj tejua mitstataujtikan. Komo aksa amo kitakamati nejin tanauatil, maj kipantamotakan kampa yetokej tekuanimej”. Darío kiuelkakik uan kiixtalij tanauatil.

Keman Daniel kimatik ke moixtalijka nejon yankuik tanauatil, yajki ichan. Keman ompa yetoya, motankuaketsak uan kitataujtij Jiova iixpan se ventana tein tapotoya. Nejon takamej nexikolmej ijsiujka kalakitoj ichan uan kiajsitoj kichiujtok netataujtil. Yejuan niman kiluitoj Darío: “Daniel amo mitstakamatik. Expa tonal kitataujtia iDios”. Darío kuali kiitaya Daniel uan amo kinekia maj kimiktikan. Nochi tonal kinemilijtoya keniuj kimakixtis, sayoj ke nion yejua uelia kipataya se tanauatil tein ixyetoyaya. Yejua ika monekik tanauatis maj kipantamotakan kampa yetoyaj tekuanimej.

Nejon youak, Darío semi ika motekipachojtoya Daniel uan amo uelik kochik. Kualkampa, ijsiujka yajki kampa kipantamotkaj Daniel, pantachiak uan tsajtsik: “¡Daniel! ¿Mitsmakixtij moDios?”.

Darío kikakik se tajtol. Katka Daniel, akin kinankilij: “Iángel Jiova kintentsakuak tekuanimej, uan amo teyi nechchiuilijkej”. Darío tel yolpakik uan tanauatij maj kikixtikan. Keman kisak, amo kipanoka nion teyi. Satepan, tekiuaj tanauatij: “¡Xikinpantamotakan takamej akin kiteiluilijkej Daniel!”. Keman kinpantamotkej, tekuanimej niman kinkuajkej.

Darío kinnauatij akin nemiaj itech ixolal: “Nochin moneki kipoujkaitaskej iDios Daniel. Yejuatsin kimakixtij maj amo kikuanij tekuanimej”.

¿Uan tejua? ¿No tiktataujtia Jiova mojmostaj, kemej Daniel?