Jiova kimatampauia Jesús

Itonalkisayampa Israel moajsia se tal kampa kinemiliayaj ke sitalimej tenextiliayaj ojti. Se youak, seki takamej akin ualeuayaj tonalkisayampa kiitakej itech iluikak milintoya tein tamatia kemej se sitalij uan mooliniaya, uan kitojtokakej. Nejon tein tamatia kemej sitalij kinyekanak hasta Jerusalén. Takamej tajtantiyayaj: “¿Kani yetok okichpil akin mochiuati inintekiuaj judíos? Tiknekij timoixpiloskej iixpan”.

Keman Herodes, akin tekiuajtia Jerusalén, kitekakilij ke yolka se akin mochiuaskia tekiuaj, semi motekipachoj. Yejua kintajtanij tiopixkamej akin taixyekanayaj: “¿Kani yoliskia nejon tekiuaj?”. Yejuan kinankilijkej: “Tanauatianij kijtojkej ke yoliskia Belén”. Yejua ika Herodes kintatitauij takamej akin ualeuayaj tonalkisayampa uan kiniluij: “Xiyakan Belén uan xiktemokan okichpil. Satepan, ximokepakan uan xinechiluikan kani moajsi, porin no nikneki nimoixpilos iixpan”. Sayoj ke nejon amo melauak katka.

Nejon tein tamatia kemej sitalij oksepa peuak moolinia, uan takamej kitojtokakej hasta Belén. Ompa motsakuilij ikuapan se kali, takamej kalakkej uan kiajsikej Jesús iuan imomaj, María. Yejuan moixpilojkej iixpan okichpiltsin uan kimakakej netetayokolilmej: oro, kopal uan mirra. Sayoj ke ¿yekmelauj Jiova kintitanka nejon takamej kampa moajsia Jesús? Amo.

Nejon youak, Jiova kiluij José itech se takochitalis: “Herodes kineki kimiktis Jesús. Xikinkixti monamik uan mokonetsin, uan xicholokan Egipto. Ompa ximokauakan uan amo ximokepakan hasta keman nejua namechiluis ke uelisya nanmokepaskej”. Yejua ika José niman kinuikak inamik uan Jesús hasta Egipto.

Uan no, Jiova kiniluij takamej akin ualeuayaj tonalkisayampa maj amo mokepanij kampa moajsia Herodes. Keman Herodes kiitak ke amo mokepaskiaj, tel kualanik. Uan kemej amo uelik kiajsik Jesús, tanauatij maj kinmiktikan nochin okichpipil akin nemiaj Belén akin iuampoyuan Jesús. Sayoj ke Jesús amo teyi kipanok porin uejka moajsia, ompa Egipto.

Satepan, Herodes momikilij. Yejua ika Jiova kiluij José: “Axkan uelis nanmokepaskejya”. José, María uan Jesús mokepkej Israel uan mokaltalijkej itech xolal Nazaret.