Juan kiteixmatiltia ke ualas Mesías

Itatuan Juan katkaj Zacarías uan Elisabet. Jiova kiixtalij kemej tanauatijkej uan kichiuak maj kitematilti ke Mesías amo uejkaua ualaskia. Sayoj ke amo tanojnotstinemik itech xolalmej oso itech inintiopan judíos, ta tanojnotstinemik taluakyan. Miakej akin nemiaj Jerusalén uan Judea yayaj kikakitij Juan. Yejua kiniluiaya ke monekia amo kichiuaskejok tein amo kuali uan ijkon ueliskia kiyolpaktiskej Dios. Yejua ika, miakej moyolnonotskej, uan Juan kinauij itech ueyiat Jordán.

Juan amo kipiaya miak taman. Motakentiaya ika tilmaj tein chijchiujtoya ika itojmiyo camello uan kikuaya chapolimej uan nekti. Taltikpakneminij kinekiaj okachi kiixmatiskej. Hasta fariseos uan saduceos akin moueyinekiaj kiitatoj. Ompa Juan kiniluij: “Moneki nanmoyolnonotsaskej uan nanmopataskej. Nanmomachiliaj ke nanueyichiuanimej porin nankijtouaj ke nanikoneuan Abrahán, sayoj ke nejon amo kijtosneki ke nanikoneuan Dios”.

Miakej kitajtaniayaj Juan: “¿Keniuj uelis tikyolpaktiskej Dios?”. Uan yejua kinnankiliaya: “Komo nankipiaj ome taken, se xikmakakan akin amo kipia”. ¿Tikmati keyej kiniluiaya nejon? Porin kinekia maj kimatinij ke komo kinekiaj kiyolpaktiskej Dios monekia kintasojtaskej oksekin.

No kiniluij akin kintaxtauiayaj impuestos: “Amo xitachtekikan uan amo akin xikajkayauakan”. Uan tateuianij kiniluij: “Amo xitakajkayauakan nion xikauakan maj namechkouakan”.

Tiopixkamej uan levitas no kiitatoj Juan uan kiluijkej: “Nochin kinekij kimatiskej tiakoni”. Juan kiniluij: “Nejua se tajtol itech taluakyan tein kinpaleuia taltikpakneminij maj motokikan iuan Jiova, ijkon kemej kijtoj tanauatijkej Isaías”.

Taltikpakneminij kinyolpaktiaya tein Juan tamachtiaya, uan miakej kinekiaj kimatiskej ox yejua katka Mesías. Yejua ika Juan kiniluij: “Se akin okachi ueyichiujkej ke nejua ualas amo uejkaua. Nion nechnamiki niktojtomilis itekakuan. Nejua namechauia ika at, sayoj ke yejua namechauis ika yektikatsin espíritu”.