¿Akoni katka Juan akin teauiaya?
Tein Biblia kijtoua
Juan akin teauiaya katka itanauatijkauj Dios (Lucas 1:76). Yolik itech xiuit 2 achto ke ualaskia Cristo uan momikilij itech xiuit 32 satepan ke yolik Cristo. Dios kiixtalij maj kichiuani tein tapaleuiskia maj kiixmatinij Mesías oso Cristo keman ejkoskia. Yejua ika, Juan kiniluij okseki judíos tein Dios kinekia maj kichiuanij para ueliskia oksepa kuali mouikaskej iuan (Marcos 1:1-4; Lucas 1:13, 16, 17).
Tein Juan kitematiltij kinpaleuij judíos akin yolkualmej katkaj maj kimatinij ke Jesús kayot Nazaret katka Mesías akin moijtojka ke ualaskia (Mateo 11:10). Juan kiniluij ke monekia amo tajtakolchiuaskejok uan moauiskej para kinextiskej ke moyolpatakajya (Lucas 3:3-6). Kemej miakej kinauij, moixmati kemej Juan akin teauiaya. Akin okachi ueyichiujkej akin kiauij yejua Jesús (Marcos 1:9).a
Itech nejin tamachtilis tiknankiliskej nejin netajtanilmej:
¿Keyej amo akin katka kemej Juan akin teauiaya?
Porin Biblia achtook kijtojka toni tekit kichiuaskia: Itech Biblia moijtojka ke Jehová kititaniskia aksa akin kiuikaskia itanauatil, uan keman Juan tanojnotsak kichiuak nejon tein achto moijtojka (Malaquías 3:1; Mateo 3:1-3). Yejua kichiuak “maj senpouikan itech sayoj se xolal akin kitekitiliskej Jehová”. Nejin kijtosneki ke kinpaleuij okseki judíos para maj kikakinij tein kiteixmatiltiskia Jesús, akin Jehová kiualtitanka (Lucas 1:17).
Porin tein kichiuak motelneki: Jesús kijtoj: “Amo yolini se akin okachi ueyichiujkej ke Juan akin teauia. Sayoj ke, akin okachi amo ueyichiujkej itech iTaixyekanalis Dios tein moajsi iluikak, okachi ueyichiujkej ke yejua” (Mateo 11:11). Nion semej itekitikauan Dios akin nenkej achto ke Juan katka okachi ueyichiujkej ke yejua, porin Juan amo sayoj katka itanauatijkauj Jehová, ta no katka akin Jehová kititanka maj kiteixmatilti itanauatil. Uan no, tein Jesús kijtoj kinextia ke Juan amo iuan tekiuajtiskia ompa iluikak.b ¿Keyej amo? Porin Juan momikilij achto ke Cristo kichiuaskia tein tapaleuiskia maj sekin yakan iluikak (Hebreos 10:19, 20). Sayoj ke Juan akin teauiaya oksepa nemis nikan taltikpak keman tekiuajtis itaixyekanalis Dios uan uelis nemis nochipaya itech se Xochital (Salmo 37:29; Lucas 23:43).
¿Akonimej katkaj itatuan Juan akin teauiaya?
Itatuan Juan motokaytiayaj Zacarías uan Elisabet. Zacarías katka se tiopixkat judío. Elisabet amo uelia kinpiaya konemej, uan no, yejua uan itakatsin “xiuejkejya katkaj”, yejua ika mochiuak se milagro para maj yolini Juan (Lucas 1:5-7, 13).
¿Akoni itajtakol maj kimiktianij Juan akin teauiaya?
Tekiuaj Herodes Antipas tanauatij maj kikechkotonanij Juan. Kichiuak porin inamik, Herodías, kiluij isiuapil maj kitajtaniani. Juan kiluijka Herodes, akin kijtouaya ke katka judío, ke inintanauatil judíos kinextiaya ke amo kuali tein kichiuak keman monamiktij iuan Herodías, yejua ika Herodías kitauelitaya (Mateo 14:1-12; Marcos 6:16-19).
¿Motauelitayaj Juan akin teauiaya uan Jesús?
Biblia amo tamachtia ke Juan uan Jesús motauelitayaj (Juan 3:25-30). Tein melauj, Juan kijtoj senteixtenoj ke kichiuako tein tapaleuiskia para keman ejkoskia Mesías, amo para iuan motataniskia. Juan kijtoj: “Niteauijtiualaj itech at para maj itech xolal Israel kimatikan akoni yejua”. Uan no kijtoj: “Yejua nejin iKoneuj Dios” (Juan 1:26-34). Juan semi kiyolpaktiaya maj kuali kikakinij Jesús keman tanojnotsaya.
a Jesús “amo kichiuak nion se tajtakol” (1 Pedro 2:21, 22). Yejua ika, amo moauij porin monekia moyolpatas, ta para kinextis ke motemaktiaya iuan iTajtsin para kichiuas tein yejuatsin kinekia, tein no kijtosnekia ke monekia toka momikilis (Hebreos 10:7-10).
b Xikonita tamachtilis “¿Quiénes van al cielo?”.