Se tajpixkej mochiua itatojtokakauj Cristo

Ompa Filipos, nemia se ichpoch akin tetekitiliaya uan kimatia tein panoskia satepan porin itech moajsia se amokuali ejekat. Ichpoch kintomintiaya itekouan. Keman Pablo uan Silas ajsikej Filipos, ichpoch miak tonalmej kintojtokatinemik. Amokuali ejekat kichiuaya maj tsajtsini: “Nejin takamej itekitikauan Dios akin Okachi Ueyichiujkej”. Ika tamik, Pablo kiluij amokuali ejekat: “¡Nimitsnauatia itokaykopa Jesús xikisa itech nejin ichpoch!”. Uan amokuali ejekat kisak.

Keman itekouan ichpoch kiitakej ke amo kintomintiskiaok, tel kualankej. Kintitilatskej Pablo uan Silas hasta ininixpan tekiuanij uan kiniluijkej: “¡Nejin takamej amo kitakamatij tanauatil uan takuejmolojtinemij itech nochi xolal!”. Tekiuanij tanauatijkej maj kinuijuitekikan Pablo uan Silas uan maj kintsakuakan. Akin tajpiaya kampa kintsakkej kinkalakito hasta taijtik, kampa okachi tayouayan. Uan no, kinmetstsikoj itech seki uapal.

Ompa, Pablo uan Silas peuak kiueyichiuaj Jiova ika nekuikatilmej uan oksekin akin no tsaktoyaj kinkaktoyaj. Ompa, tajkoyouan, peuak chikauak talolini itech nejon kali. Tatapouik uan kojkopinkej cadenas uan uapal kampa kinmetstsikojkaj akin tsaktoyaj. Tajpixkej niman kalakito hasta taijtik uan kiitak ke tatapotoya. Kemej kinemilij ke nochin cholojkaj, yaya momiktiti ika se espada.

Ijkuak, Pablo kitsajtsilij: “¡Amo ximokoko! ¡Tinochin nikan tiyetokej!”. Tajpixkej ijsiujka kinajsito Pablo uan Silas uan moixpiloj ininixpan. Kintajtanij: “¿Keniuj uelis nimakisas?”. Yejuan kinankilijkej: “Tejua uan akin nemij mochan moneki nankineltokaskej Jesús”. Ompa, Pablo uan Silas peuak kinmachtiaj itajtol Jiova, uan tajpixkej uan nochin akin nemiaj ichan moauijkej.