TAMACHTILIS 11

Xiontajto ika yolpakilis

Hechos 18:24, 25

TEIN MONEKI TIKONCHIUAS: Xiontajto kemej kinolinis akin mitsonkakij maj kichiuakan tein tikonijtoua.

Xikonchiua maj tamachtilis ajsi itech moyolo. Keman tionmomachtis, xiontanemili keyej motelneki nejon tamachtilis. Kuali xionmomachti tein tikonpanoltis, ijkon uelis tikonnextis ke tikonneltoka tamachtilis.
Inintech xiontanemili akin mitsonkakij. Xiontanemili keniuj kinpaleuis oksekin tein tikonijtos oso tikonixtajtoltis. Xikonnemili keniuj uelis tikonchiuas maj akin mitsonkakij okachi kuali kiajsikamatikan uan maj kipatiuitakan tamachtilis.
Xikonchiua maj teyolnotsa motamachtilis. Xiontajto ika yolpakilis. Xikonnexti ika moixko tein yekmelauj tikonmachilia uan xionmomaolini kemej kinamikis.

Xikonpapata tein tikonnextia ika momauan uan ika moixko porin ijkon amo tikontapololtis akin mitsonkakij. Tein tikonchiuas ika momauan uan ika moixko moneki mouikas iuan tein tikonijtojtok. Xikonnexti yolpakilis okachiok keman ika tiontajtos tanemililmej tein tayekantokej oso keman tikonnekis maj kichiuakan teisa. Komo nochipa tikonnextijtok yolpakilis kemej amo kinamikiok, tikonsioujtis akin mitsonkakij.