TAMACHTILIS 14

Xikonnexti tanemililmej tein tayekantokej

Hebreos 8:1

TEIN MONEKI TIKONCHIUAS: Xikonpaleui akin mitsonkaktokej maj kitojtokakan motanojnots. Senkis xikonnexti keniuj tanemililmej tein tayekantokej mouikaj iuan tamachtilis uan iuan tein tikontemoua ika motamachtilis.

KENIUJ TIKONCHIUAS:

Xikonixtali toni tikontemoua ika motamachtilis. Keman tionmomachtis motanojnots xikonnemili toni tikontemoua ika motamachtilis: tikonneki tikontematiltis teisa, tiontetaneltoktis oso tionteolinis maj kichiuakan teisa akin mitsonkakij. Kuali xikonita maj nochi tanemililmej tein tayekantokej mitsonpaleuikan xikonchiua tein tikontemoua ika motamachtilis.

Xionmotajtani: “¿Toni amo kiseliskiaj oso katiyejua netajtanilmej kichiuaskiaj akin kikaktokej tamachtilis? ¿Uan katiyejua yekinika kichiuaskiaj?”. Satepan, xikontekpana tanemililmej ijkon kemej tajtaniskiaj akin mitsonkaktokej. Nejon tapaleuis maj kitojtokakan tamachtilis, maj kiajsikamatikan uan maj kiselikan.
Xikonyeknexti itokay tamachtilis. Miakpa xikonijto itokay tamachtilis keman tikontemakatos motanojnots.
Xikonmelaua tanemililmej tein tayekantokej kemej amo ouij moajsikamatis. Xikonixpejpena sayoj tanemililmej tein mouikaj iuan tamachtilis uan tein uelis tikonmelauas itech tiempo tein ixyetok. Xikonixpejpena sayoj seki tanemililmej tein tayekantokej uan xikonmelaua kemej kuali moajsikamatis. Achto ke tikonijtos okse tanemilil, xionmotsakuili tepitsin uan xikontemo maj amo ouij moajsikamati ke tiontajtoti ika okse tanemilil.

Ipeujyan motanojnots uelis tikonijtos tanemililmej tein tayekantokej, nejon tapaleuis maj akin mitsonkaktokej kitojtokatiyakan motamachtilis. Uan keman tionmatantiyas oksepa xikonijto, nejon tapaleuis maj amo kielkauakan.