TAMACHTILIS 08
Tejuatsin uelis tionmouikas iuan Jiova
Jiova kineki kuali xikonixmati. ¿Keyej? Porin kimati ke kualtsin iuan tionmouikas komo tikonmati keniuj tamati, keniuj kichiua seki taman uan tein kiixtalijtok kichiuas. Sayoj ke, ¿yekmelauj uelis timouikaskej iuan Dios? (Xikonita Salmo 25:14). ¿Keniuj uelis tikonchiuas? Biblia techpaleuia maj tikmatikan nejin, no techiluia keyej Jiova yejua akin uelis okachi kuali iuan tionmouikas.
1. ¿Toni kineki Jiova xikonchiua?
“Ximotokikan iuan Dios uan Yejuatsin no motokis namouan” (Santiago 4:8). ¿Toni kijtosneki nejin? Jiova kineki kuali xionmouika iuan. Sekin kinouijmaka kineltokaskej ke uelis mouikaskej iuan aksa akin amo kiitaj uan okachiok iuan Dios. Sayoj ke, itech Biblia techiluia tein uelis techpaleuis maj tikixmatikan uan maj iuan timotokikan. Maski amo tikitaj Jiova, tein techmatiltia itech Biblia techpaleuia maj okachi kuali timouikakan iuan.
2. ¿Keyej kuali tionmouikas iuan Jiova yejua tein okachi kuali?
Jiova yejua akin okachi mitsontasojta. Yejuatsin kineki xionyolpaki uan nochipa xikontemo maj mitsonpaleui. Kemej Dios moka motekipachoua kineki xikonilui nochi tein mitsonyolkokoua (1 Pedro 5:7). Jiova nochipa kinpaleuia, kinyolchikaua uan kinkaki akin kuali iuan mouikaj (xikonita Salmo 94:18, 19).
3. ¿Toni kineki Jiova maj kichiuakan akin kuali iuan mouikaj?
Jiova kintasojta nochin, “sayoj ke semi kuali mouika iniuan akin yolmelaujkej” (Proverbios 3:32). Akin kuali iniuan mouika, Jiova kineki maj kichiuakan tein kuali uan amo tein amo kuali. Miakej kinemiliaj ke amo uelis kichiuaskej nochi tein Jiova kineki. Sayoj ke, yejuatsin kimati tein tikmachiliaj uan kinselia akin kitasojtaj uan mochikauaj kiyolpaktiskej (Salmo 147:11; Hechos 10:34, 35).
MAJ OKACHI TIMOMACHTIKAN
Maj tikitakan keniuj kuali timouikaskej iuan Jiova, uan keyej yejuatsin akin okachi techpaleuis komo kuali iuan timouikaj.
4. Abrahán kuali mouikaya iuan Jiova
Itech Biblia kampa ika tajtoua Abrahán (oso Abrán), techmatiltia keniuj uelis timouikaskej iuan Dios uan keniuj kintatiochiuia akin kuali iuan mouikaj. Xikitakan kampa ika motajtoua Abrahán itech Génesis 12:1-4 uan ika xitajtokan nejin:
¿Toni Jiova kiluij Abrahán maj kichiua?
¿Toni kiluij ke kimakaskia?
¿Toni kichiuak Abrahán ika tein Jiova kinauatij?
5. Tein Jiova kineki maj kichiuakan akin kuali iuan mouikaj
Akin iniuan kuali timouikaj tikchiaj maj kichiuakan tein techyolpaktia.
¿Toni tikonuelitaskia maj moka kichiuakan akin kuali iniuan tionmouika?
Xikitakan 1 Juan 5:3 uan ika xitajtokan nejin:
¿Toni kineki Jiova maj kichiuakan akin kuali iuan mouikaj?
Xa monekis tikpataskej tein tikchiuaj uan tein tiknemiliaj komo tiknekij tiktakamatiskej Jiova. Xikitakan Isaías 48:17, 18 uan ika xitajtokan nejin:
¿Keyej akin kuali mouikaj iuan Jiova moneki maj kichiuakan tein kinnauatia?
Se akin kuali iuan timouikaj techelnamiktia tein moneki tikchiuaskej para maj amo techpano tein amo kuali. Jiova no ijkon kichiua.
6. Keniuj Jiova kinpaleuia akin kuali iuan mouikaj
Jiova kinpaleuia akin kuali iuan mouikaj maj kixikokan ouijkayomej tein kipiaj. Xikitakan VIDEO uan ika xitajtokan nejin:
¿Keniuj Jiova kipaleuiani nejin siuat keman amo kuali momachilia?
Xikitakan Isaías 41:10, 13 uan ika xitajtokan nejin:
¿Keniuj Jiova motenkaua kinpaleuis akin kuali iuan mouikaj?
¿Ueli se mouika iuan Jiova? ¿Keyej?
Akin kuali iniuan timouikaj nochipa techpaleuiaj keman moneki, Jiova no ijkon kichiuas mouan.
7. Akin kuali mouikaj iuan Jiova moneki iuan tajtoskej uan kikakiskej
Komo nochipa titajtouaj iniuan akin kuali timouikaj tapaleuia maj nochipa kuali timouikakan. Xikitakan Salmo 86:6, 11 uan ika xitajtokan nejin:
¿Keniuj uelis titajtoskej iuan Jiova?
¿Keniuj technojnotsa Jiova?
Titajtouaj iuan Jiova keman tikchiuaj netataujtil uan yejuatsin technojnotsa ika Biblia.
TEIN SEKIN KIJTOUAJ: “Amo keman uelis timouikaskej iuan Dios”.
¿Katiyejua texto ueliskia ika tikonnextis ke uelis timouikaskej iuan Jiova?
TEIN TIKITAKEJ
Jiova kineki kuali xionmouika iuan uan mitsonpaleuis ijkon xikonchiua.
Maj tikelnamikikan
¿Keniuj kinpaleuia Jiova akin kuali iuan mouikaj?
¿Keyej Jiova kineki maj kichiuakan tein kintajtania akin kuali iuan mouikaj?
¿Tikonita ke ouij se mouikas iuan Jiova? ¿Keyej ijkon tikonnemilia?
NO XIKONITA NEJIN
¿Keniuj mitsonpaleuis kuali xionmouika iuan Dios?
“Jehová, un Dios que vale la pena conocer” (La Atalaya, 15 de febrero de 2003)
Peua kuali xionmouika iuan Dios.
Xikonita keyej se siuat kijtoua ke kimakixtij kuali mouikas iuan Jiova.
“¡Amo niknekia nimikis!” (Tanejmachtijkej, tapoual 1 xiuit 2017)
Xikonkaki keniuj ika tajtouaj Jiova seki telpochmej.