TAMACHTILIS 48
Kuali xikonixpejpena akonimej iniuan tionmouikas
Akin kuali iniuan timouikaj techpaleuiaj maj tiyolpakikan uan techyolchikauaj keman tikpanouaj ouijkayomej. Sayoj ke, Biblia technejmachtia ke amo nochin uelis iniuan timouikaskej. Yejua ika, ¿keniuj uelis tikonixpejpenas akoni iuan tionmouikas? Xikonita nejin netajtanilmej.
1. ¿Mitsonpaleuiaj oso mitsonijtakouaj akin iniuan tionmouika?
Miakpa, peua titamatij kemej akin semi iniuan timouikaj uan uelis yeski sayoj itech redes sociales oso komo iniuan tietokej. Biblia kijtoua: “Akin nentinemi iniuan akin tamatinij mochiuas tamatkej, sayoj ke akin mouika iniuan akin amo tamatij [akin amo kitasojtaj Jiova] kipias ouijkayot” (Proverbios 13:20). Komo akin kuali iniuan tionmouika kitasojtaj uan kiueyichiuaj Jiova, uelis mitsonpaleuiskej xionmotoki iuan uan kuali xiontaixpejpena. Komo tionmouika iniuan akin amo kitasojtaj Jiova kichiuaskej xikonkaua. Yejua ika, Biblia techiluia maj kuali tikixpejpenakan akonimej iniuan timouikaskej. Keman akin iniuan timouikaj kitasojtaj Dios timosenpaleuiaj porin ijkon ueli tiktakamatij tein techyolmajxitia Biblia: “Ximoyolmajxitikan uan ximoyolchikauakan se uan okse” (1 Tesalonicenses 5:11).
2. ¿Kiita Jiova akonimej iniuan tionmouika?
Jiova kuali kiixpejpena akonimej iniuan mouika. Yejuatsin “semi kuali mouika iniuan akin yolmelaujkej” (Proverbios 3:32). ¿Keniuj momachiliskia Jiova komo timouikaj iniuan akin amo kitasojtaj? ¡Semi motayokoltiskia! (Xikonita Santiago 4:4). Sayoj ke, komo amo timouikaj iniuan akin techijtakoskej uan timotokiaj iuan Jiova uan iniuan akin kitasojtaj, yejuatsin yolpakis uan kuali mouikas touan (Salmo 15:1-4).
MAJ OKACHI TIMOMACHTIKAN
Maj tikitakan keyej semi moneki maj kuali tikinixpejpenakan akonimej iniuan timouikaskej uan keniuj uelis tionmouikas iniuan akin mitsonpaleuiskej.
3. Amo xionmouika iniuan akin uelis mitsonijtakoskej
Amo ueli se mouika iniuan akin amo kitasojtaj Dios nion kitakamatij. Xikitakan VIDEO uan ika xitajtokan nejin:
¿Keniuj maski amo tikmatiskej uelis timouikaskej iniuan akin uelis techijtakoskej?
Xikitakan 1 Corintios 15:33 uan ika xitajtokan nejin:
¿Akonimej tikonnemilia tejuatsin ke uelis mitsonijtakoskej? ¿Keyej?
Xikitakan Salmo 119:63 uan ika xitajtokan nejin:
¿Keniuj uelis tikonmatis ke uelis tionmouikas iuan aksa?
Se manzana tein palaktik uelis kinpalantis okseki manzanas. Uan tejuatsin, ¿toni mitsonpanos komo tionmouika iniuan akin uelis mitsonijtakoskej?
4. Uelis timouikaskej iniuan akin tatamamej
Biblia ininka tajtoua David uan Jonatán, ome takamej israelitas. Maski tataman xiujmej kipiayaj uan tataman kemej nemiaj, semi kualtsin mouikakej. Xikitakan 1 Samuel 18:1 uan ika xitajtokan nejin:
¿Keyej akin iniuan timouikaj amo sayoj moneki yeskij touampoyuan oso akin ueyichiuanimej?
Xikitakan Romanos 1:11, 12 uan ika xitajtokan nejin:
¿Keniuj mosenyolchikauaj akin kitasojtaj Jiova?
¿Keniuj se telpoch kinajsik akin kuali iniuan mouika kampa amo kinemiliaya? Xikitakan VIDEO uan ika xitajtokan nejin:
¿Keyej itatuan Akil kintekipachouaya akonimej iniuan mouikaya kaltamachtiloyan?
¿Keyej Akil yekinika kiuelitaya iniuan mouikas?
¿Toni kichiuak para amo momachilisok iselti?
5. Keniuj uelis tikinpiaskej akin iniuan kuali timouikaskej
Xikonita keniuj tikonpias akin iniuan kuali tionmouikas uan keniuj no kuali mouikaskej mouan. Xikitakan VIDEO.
Xikitakan Proverbios 18:24 uan 27:17 uan ika xitajtokan nejin:
¿Keniuj mopaleuiaj akin kuali mouikaj?
¿Tikonpia akin iniuan kuali tionmouika kemej kijtoua Proverbios? Uan komo amo, ¿toni uelis tikonchiuas?
Xikitakan Filipenses 2:4 uan ika xitajtokan nejin:
Para kuali timouikaskej iniuan oksekin, no moneki tikchiuaskej tein monekis para kuali mouikaskej touan, ¿keniuj uelis tikonchiuas?
Para kuali tionmouikas iniuan oksekin, tejuatsin no xikonchiua tein tapaleuis maj kuali mouikakan mouan.
TEIN SEKIN KIJTOUAJ: “Kemej amo nikneki nietos noselti, niksentokas kuali nimouikas iniuan akin ipa nimouikani”.
¿Toni tikonijtoskia?
TEIN TIKITAKEJ
Keman kuali tikinixpejpenaj akonimej kuali iniuan timouikaskej, techpaleuia uan tikyolpaktiaj Jiova.
Maj tikelnamikikan
¿Keyej Jiova kineki maj kuali tikinixpejpenakan akin iniuan timouikaj?
¿Akonimej iniuan amo moneki timouikaskej?
¿Keniuj tejuatsin uelis tionmouikas iniuan akin kitasojtaj Jiova?
NO XIKONITA NEJIN
Xikonita keniuj uelis techpaleuiskej akin iniuan kuali timouikaj keman tikpanoskej ouijkayomej.
Xikonita tein uelis tikonchiuas para kuali tionmouikas iniuan oksekin uan kuali mouikaskej mouan.
¿Toni moneki tikonmatis ininka akin tionmouika itech redes sociales?
Xikonita keyej se takat kipatak akin iniuan mouikaya, kampa techtapouiaj ininnemilis “Anhelaba tener un padre”.
“La Biblia les cambió la vida” (La Atalaya, 1 de abril de 2012)