¿Toni iTekiuajyo Dios?

ITekiuajyo Dios oso iTaixyekanalis Dios, yejua tein okachi ika tajtoua Biblia. Itechkopa nejon Tekiuajyot, Jiova kichiuas tein yekinika kinekia maj mochiua nikan taltikpak. ¿Toni iTekiuajyo Dios? ¿Keniuj tikmatij ke taixyekantokya? ¿Toni kichiuani hasta axkan uan toni kichiuatiok? Nejin netajtanilmej monankiliskej itech nejin tamachtilis uan itech okseki ome tein tikitaskejok.

1. ¿Toni iTekiuajyo Dios uan akoni Tekiuaj?

ITekiuajyo Dios se taixyekanalis tein Jiova kiixtalij. Tekiuaj yejua Jesucristo uan taixyekana ompa iluikak (Mateo 4:17; Juan 18:36). Biblia kijtoua ke Jesús “kinyekantinemis in pueblojuani [...] sen nachipa” (Lucas 1:32, 33). Kemej yejua Tekiuaj itech iTekiuajyo Dios, kinixyekanas nochin akin nemiskej taltikpak.

2. ¿Akonimej taixyekanaj iuan Jesús?

Jesús amo iselti taixyekana, ta “de nochi tataman tagayot, uan [...] nochi tataman tajtolisme, uan no [...] pueblojme uan paísme” iuan taixyekanaskej nikan taltikpak (Apocalipsis 5:9, 10). ¿Kanachimej iuan tekiuajtiskej Cristo? Keman Jesús yetoya nikan taltikpak uan hasta axkan millones kiixtaliaj kichiuaskej kemej yejua. Sayoj ke, yaskej iluikak sayoj 144,000 akin iuan tekiuajtiskej (xikonita Apocalipsis 14:1-4). Okseki itatojtokakauan Cristo kinixyekanaskej nikan taltikpak (Salmo 37:29).

3. ¿Keyej iTekiuajyo Dios okachi kuali ke tekiuanij itech taltikpak?

Maski miakej tekiuanij kinekij kichiuaskej tein kuali, amo ueli kichiuaj nochi tein kiixtaliaj. Uan ompa, kinixpataj oksekin akin amo semi ininka motekipachouaj akin kinixyekanaj. Sayoj ke Jesús, akin Tekiuaj itech iTekiuajyo Dios, amo akin kiixpatas. Dios kiixtalij “se tekiuajyot tein amo keman ixpoliuis” (Daniel 2:44). Jesús taixyekanas itech nochi taltikpak uan amo techikotasojtas. Yejua tetasojta, kualtakat uan yolmelauak, uan kinmachtis nochin maj no ijkon kichiuakan, maj tetasojtakan, maj kualtakamej uan maj yolmelaujkej (xikonita Isaías 11:9).

4. Se Tekiuajyot tein kipia chikaualis taixyekanas itech nochi taltikpak

Jesús kipia okachi chikaualis uan kimati keniuj taixyekanas ke okseki tekiuanij akin taixyekananij. Xikitakan Mateo 28:18 uan ika xitajtokan nejin:

• ¿Keyej tanauatil tein kiselij Jesús amo kemej tein kipiaj tekiuanij?

Tekiuanij itech taltikpak amo noyampa taixyekanaj uan amo nochipa taixyekantokej. ¿No ijkon yeski iTekiuajyo Dios? Xikitakan Daniel 7:14 uan ika xitajtokan nejin:

• ¿Keniuj tapaleuis maj iTekiuajyo Dios amo keman ixpoliui?

• ¿Keniuj tapaleuis maj iTekiuajyo Dios taixyekana itech nochi taltikpak?

5. Tekiuanij itech taltikpak moneki maj kinixpatakan

¿Keyej moneki maj iTekiuajyo Dios kinixpata tekiuanij itech taltikpak? Xikitakan VIDEO uan ika xitajtokan nejin:

VIDEO: ¿Toni iTekiuajyo Dios? (taxelol) (1:41)

• ¿Toni mochiuani porin taixyekanaj akin nemij nikan taltikpak?

Xikitakan Eclesiastés 8:9 uan ika xitajtokan nejin:

• ¿Moneki maj iTekiuajyo Dios kinixpata tekiuanij? ¿Keyej?

6. Akin taixyekanaskej itech iTekiuajyo Dios kimatij tein tikpanouaj

Kemej toTekiuaj Jesús no nemik nikan taltikpak, ueli techiknelia porin kimati ke “uelis tikuetautiuetsiske de totakuautamatilis” (Hebreos 4:15). Jiova kinixpejpenak 144,000 takamej uan siuamej akin tekiuajtiskej iuan Jesús “de nochi tataman tagayot, [...] nochi tataman tajtolisme, [...] nochi tataman pueblojme uan paísme” (Apocalipsis 5:9).

• ¿Mitsonyolchikaua tikonmatis ke Jesús uan nochin akin iuan tekiuajtiskej kimatij tein tikpanouaj? ¿Keyej?

7. Itanauatiluan iTekiuajyo Dios okachi tapaleuiaj

Tekiuanij kiixtaliaj tanauatilmej porin kinekij maj kuali yetokan akin kinixyekanaj. ITekiuajyo Dios no kipia tanauatilmej uan moneki kitakamatiskej akin kinixyekana. Xikitakan 1 Corintios 6:9-11 uan ika xitajtokan nejin:

• ¿Keniuj tikonnemilia ke yeski taltikpak keman nochin nemiskej kemej Dios kiixtalia?a

• Akin kinixyekana iTekiuajyo Dios, ¿kinamiki maj Jiova kinilui maj kitakamatikan nejin tanauatilmej? ¿Keyej ijkon tikonnemilia?

• ¿Keyej tikmatij ke akin amo kitakamatij nejin tanauatilmej uelis mopataskejok? (Xikitakan versículo 11).

TEIN TIKITAKEJ

ITekiuajyo Dios se taixyekanalis tein moajsi ompa iluikak uan taixyekanas itech nochi taltikpak.

Maj tikelnamikikan

• ¿Akonimej taixyekanaskej itech iTekiuajyo Dios?

• ¿Keyej iTekiuajyo Dios okachi kuali ke tekiuanij?

• ¿Toni kinnauatia Jiova akin kinixyekana iTekiuajyo Dios?

NO XIKONITA NEJIN

Kemej Jesús tamachtij, ¿kani yetoskia iTekiuajyo Dios?

“¿Es el Reino de Dios algo que se lleva en el corazón?” (Artículo de jw.org)

¿Keyej itaixpantijkauan Jiova kiitaj ke nochipa moneki kitakamatiskej iTekiuajyo Dios achto ke tekiuanij nikan taltikpak?

Senkis tiktakamatij iTekiuajyo Dios (1:43)

Xikonita keniuj Biblia ininka tajtoua 144,000 akin Jiova kinixpejpena maj tekiuajtikan iuan Jesús.

“¿Quiénes van al cielo?” (Artículo de jw.org)

¿Toni kipaleuij se siuatsin maj kineltoka ke sayoj Dios uelis kichiuas maj onka melaujkayot itech taltikpak?

“Aprendí cómo se solucionarán las injusticias” (¡Despertad!, noviembre de 2011)