¿Toni iTekiuajyo Dios?

1. ¿Toni iTekiuajyo Dios?

ITekiuajyo Dios se taixyekanalis tein moajsi ne iluikak. Nejin kinixpolos nochi tekiuajyomej tein moajsij nikan taltikpak uan kichiuas maj itanejnekilis Dios mochiua nikan taltikpak ijkon kemej ne iluikak. ITekiuajyo Dios yejua taixyekanalis tein moneki itech taltikpak uan kichiuas maj moyekuikakan nochin taltikpakneminij. ¿Melauj ke nejin kuali tanauatilmej? Xikonixtajtolti Daniel 2:44; Mateo 6:9, 10, TNM, uan 24:14.

Kemej itech se tekiuajyot moneki se taixyekankej, Jiova kiixtalij iKonetsin, Jesucristo, maj yejua Tekiuaj itech iTekiuajyo. Xikonixtajtolti Apocalipsis 11:15.

Xikonita video ¿Toni iTekiuajyo Dios?

2. ¿Keyej Jesús okachi kuali tekiuaj?

IKonetsin Dios yejua okachi kuali tekiuaj porin kualtakat uan nochipa kichiua tein melauak (Mateo 11:28-30). Uan no, kipia chikaualis uan uelilis tein ika kinpaleuis taltikpakneminij uan kitekitiltis keman taixyekantos nikan taltikpak. Satepan ijkuak moajokuik, Jesús yajki iluikak uan mochiak iyekmakopa Dios hasta maj kimakani tanauatil kemej Tekiuaj (Hebreos 10:12, 13). Satepan, Dios kimakak tanauatil maj peua taixyekana. Xikonixtajtolti Lucas 1:32, 33.

3. ¿Akonimej taixyekanaskej iuan Jesús?

Seki oloch “taixpejpenalmej” taixyekanaskej iuan Jesús ne iluikak (Daniel 7:27). Yekinika taixpejpenalmej yejuan itatitaniluan Jesús akin amo kikaujkej. Jiova kisentoka kinixpejpentok takamej uan siuamej akin kinextiaj ueyi takuaujtamatilis. Ijkon kemej Jesús, yejuan no youij iluikak uan nemitij kemej ángeles. Xikonixtajtolti Juan 14:1-3 uan 1 Corintios 15:42-44.

¿Kanachimej yaskej iluikak? Jesús kintokaytij “amo ueyi oloch ichkamej” (Lucas 12:32, TNM). Nochin yeskij 144,000. Yejuan taixyekanaskej ne iluikak ipan taltikpak iuan Jesús. Xikonixtajtolti Apocalipsis 14:1.

4. ¿Toni mochiuak keman Jesús peuak taixyekana?

Jesús kiselij tanauatil itech xiuit 1914, uan niman kikalankixtij Satanás iuan iamo kuali ejekauan uan kinualpantamotak nikan taltikpak.a Ika miak kualanyot, Amokuali peuak takuejmolchiua itech nochi taltikpak (Apocalipsis 12:7-10, 12). Ijkuak, peuak okachi momiakiliaj ininkuejmoluan taltikpakneminij. Neteuilismej, mayan, kokolismej uan talolinilis kisennextiaj se neskayot uan kijtosneki ke iTekiuajyo Dios amo uejkaua kiixyekanas nochi tein mochiuas itech taltikpak. Xikonixtajtolti Lucas 21:7, 10, 11, 31, TNM.

5. ¿Toni kichiujtok iTekiuajyo Dios axkan, uan toni kichiuas satepan?

Ika tanojnotsalis tein mochiujtok semanauak taltikpak, iTekiuajyo Dios kinsentilijtokya taltikpakneminij akin pouij itech nochi tataman altepemej. Tel miakej takamej uan siuamej akin yolyemankej mokauaj maj Jesús kinixyekana. ITekiuajyo Dios kinmatampauis keman kiixpolos nochi tein amo kuali tein mochiujtok itech taltikpak. Yejua ika, komo tiknekij tikseliskej nepaleuil tein temaka nejin Tekiuajyot, moneki tiktakamatiskej Jesús. Xikonixtajtolti Apocalipsis 7:9, 14, 16, 17.

Itech mil xiujmej, iTekiuajyo Dios kichiuas tein Dios yekinika kinekia maj kiselikan taltikpakneminij. Taltikpak yeski se xochital. Satepan, Jesús kimaktilis iPopaj nejin Tekiuajyot (1 Corintios 15:24-26). ¿Tikonuelitaskia tikontapouis aksa ika iTekiuajyo Dios? Xikonixtajtolti Salmo 37:10, 11, 29.