Tamachtilis 6
¿Toni iTekiuajyo Dios?
¿Kani yetok iTekiuajyo Dios? (1) ¿Akoni iUeyi Tekiuaj? (2)
¿Yetokej oksekin tein tekiuajtiskej iuan Ueyi Tekiuaj? Komo ijkon, ¿kanachimej? (3)
¿Toni kinextia ika tinentokej itamian tonalmej? (4)
Amo uejkaua, ¿toni kinchiuiliti taltikpakneminij iTekiuajyo Dios? (5-7)
1. Keman Jesús yetoya nikan Taltikpak, kinimachtij imomachtijkauan maj tajtanikan itech netataujtilis maj uiki iTekiuajyo Dios. Tajtol “tekiuajyot” kijtosneki se tekiuajyot kampa tayekana se tekiuaj. ITekiuajyo Dios amo ijkuitik kemej oksekin tekiuajyomej. Nejin yetok iluikak uan tekiuajtis ipan Taltikpak. Kiueyitalis itokay Dios, nejin kijtosneki ika kichiuas yektik. Kichiuas maj mochiua nikan Taltikpak tein Dios kiuelita ijkon kemej mochiujtok iluikak (Mateo 6:9, 10, NM).
2. Dios motenkauak ika Jesús mochiuaskia Ueyi Tekiuaj itech iTekiuajyo (Lucas 1:30-33). Keman Jesús yetoya nikan Taltikpak, kinextij ika eskia se Tekiuaj kualtakat, yolmelauak uan amo tajtakolej. Keman yajki iluikak, amo niman kimaktilijkej tanauatil kemej Ueyi Tekiuaj itech iTekiuajyo Dios (Hebreos 10:12, 13). Itech xiuit 1914, Jiova kimakak tanauatil Jesús tein motenkaujka. Itech nejon xiuit, Jesús peuak tekiuajti itech iluikak kemej Ueyi Tekiuaj tein Dios kixtalij (Filipenses 2:9).
3. Sekin takamej uan siuamej tein amo kikauaj Jiova kinijitak nikan Taltikpak maj yakan iluikak. Nejin taijitalmej kiniyekanaskej taltikpakneminij iuan Jesús kemej tekiuanij, tamelauanij, uan tiopixkamej (Lucas 22:28-30; Apocalipsis 5:9, 10). Jesús kijtoj ika tein iuan tekiuajtitij itech iTekiuajyo amo miakej. Senochimejya 144,000 (Apocalipsis 14:1-3).
4. Nimasaj keman Jesús mochiuj Ueyi Tekiuaj, kinkixtij Satanás uan iamokuali ejekauan itech iluikak uan kiniualpantamotak nikan Taltikpak. Yejika, itech xiuit 1914, okachi peuak mochiua tajyouilis nikan Taltikpak (Apocalipsis 12:9, 12). Kemej neteuilismej, mayan, tetsaujkakokolismej uan momiakilia amo kuali tachiualismej..., nochi nejin se neskayot tein kinextia ika Jesús peuaka tekiuajti uan nochi tein mochiujtok moajsi itamian tonalmej (Mateo 24:3, 7, 8, 12; Lucas 21:10, 11; 2 Timoteo 3:1-5).
5. Amo uejkaua Jesús kinixkomakas taltikpakneminij uan kinixelos kemej se tajpixkej kinixeloua ichkamej uan chivos. Jesús kinitas kemej “ichkamej” tein kinextijtoskej tatakamatilis uan amo kikauaj uan kinimakas nemilis nochipaya nikan Taltikpak. Uan “chivos” eskij tein kixtopeuaskej iTekiuajyo Dios (Mateo 25:31-34, 46). Amo uejkaua, Jesús kinixpolos nochin taltikpakneminij tein tamatij kemej chivos (2 Tesalonicenses 1:6-9). Komo tikneki timochiuas semej iichkauan Jesús, moneki tiksentokas tikaktos itanauatiluan Tekiuajyot uan tikchiuas ijkon kemej timomachtijtok (Mateo 24:14).
6. Semanauak Taltikpak onkak miak tataman tekiuajyomej. Taltikpakneminij tein pouij itech se tekiuajyot moteuiaj imiuan oksekin tein pouij itech okse tekiuajyot. Sayoj ika iTekiuajyo Dios kinixpatas nochin taltikpaktekiuajyomej. Yejuasaj itekiuajyo yetos semanauak Taltikpak (Daniel 2:44). Ijkuaka amo onkasok neteuilis, temiktilis, uan eliuisyot. Nochin taltikpakneminij senemiskej ika yekyetolis uan moyekuikaskej (Miqueas 4:3, 4, NM).
7. Keman Jesús Tekiuajtitos se Mil Xiujtika, taltikpakneminij tein amo kikauaj Dios, amo kipiaskejok tajtakol uan semanauak Taltikpak mochiuas se xochital. Keman tamisa se mil xiujtika, Jesús kichiuasa nochi tein Dios kinekia maj kichiuaskia. Ijkuaka kimaktilis Tekiuajyot iPopaj (1 Corintios 15:24). ¿Keyej amo tikinmelaujkailuia motasojikniuan uan mochankauan tein kichiuati iTekiuajyo Dios?
[Tajtolmej itech página 13]
Keman Jesús tekiuajtitos, amo onkasok netauelitalis niono tachikoitalis