TAMACHTILIS 59
Tejuatsin uelis tiontaxikos keman mitsontajyouiltiskej
Miakej ipa kitemoskej maj amo tiktekitilikanok Jiova uan hasta techtajyouiltiskej porin amo uelis techtsakuiliskej. ¿Monekiskia techmoujtis nejon?
1. ¿Keyej amo tikmoujkaitaj maj techtajyouiltikan?
Biblia kijtoua ke “nochi naken kinekiske yek chipaukanemiske ika ne chikaualis de Cristo Jesús, yejuan nojonkes tajyouijtiyaske” (2 Timoteo 3:12). Jesús kiixnamikkej uan kitajyouiltijkej porin amo pouik itech nejin taltikpak kampa Satanás taixyekana. Uan kemej tejuan amo no tipouij nikan taltikpak, amo tikmoujkaitaj maj tekiuanij uan akin taixyekanaj itech taneltokalismej techtajyouiltikan (Juan 15:18, 19).
2. ¿Toni uelis tikchiuaskej achto ke peuas techtajyouiltiskej?
Axkan moneki tikchiuaskej tein techpaleuis maj okachi titakuaujtamatikan iuan Jiova. ¿Keniuj uelis tikchiuaskej? Moneki tikxeloskej tiempo mojmostaj para tikchiuaskej netataujtil, tikleroskej iTajtol Dios uan tiaskej nochi nechikolmej. Nejin mitsonpaleuis xiontaxiko keman mitsontajyouiltiskej ika tein yeski, hasta komo mochankauan mitsonixnamikij. Tatitanil Pablo, akin miakpa kitajyouiltijkej, kijtoj: Jiova “nechpaleuijtinemi. Ika ya nojon amo nimoyolmoutis” (Hebreos 13:6).
Komo nochipa ika titanojnotsaj Biblia no techpaleuis maj tiyolchikaujkej. Komo titanojnotsaj no techpaleuis maj titakuaujtamatikan iuan Jiova uan maj amo tikinmouilikan oksekin (Proverbios 29:25). Komo axkan tionmoyolchikaua, tikonsentokas tiontanojnotsas keman tekiuanij kinekiskej techixnamikiskej (1 Tesalonicenses 2:2).
3. ¿Techpaleuia maj titaxikokan keman techtajyouiltiaj?
Amo tikuelitaj maj techtajyouiltikan. Sayoj ke keman titaxikouaj, techpaleuia maj okachi titakuaujtamatikan iuan Jiova. No tikmachiliaj ke Jiova touan yetok porin tikitaj keniuj techpaleuia keman tiknemiliaj ke amo titaxikoskejok toselti (xikonita Santiago 1:2-4). Jiova kiyolkokoua kiitas ke titajyouiaj, sayoj ke yolpaki keman kiita ke amo timosenkauaj. Biblia kijtoua: “Takan nantajyouijtinemij porin nantachiutinemij ika ten kuali, [...] ijkuakon iixpantsinko Dios ixnesitiu ke kuali tekit nankichiutokke” (1 Pedro 2:20). Komo titaxikouaj uan amo keman tikauaj Jiova, yejuatsin techtatiochiuis porin kichiuas maj tinemikan nochipaya nikan taltikpak, kampa amo akin kiixnamikis taueyichiualis tein chipauak (Mateo 24:13).
MAJ OKACHI TIMOMACHTIKAN
Xikonita keyej uelis tikonsentokas tikontekitilis Jiova keman techtajyouiltiskej uan keniuj yejuatsin techtatiochiuis.
4. Tejuatsin uelis tiontaxikos keman mochankauan mitsonixnamikiskej
Jesús kimatia ke seki tochankauan amo kinekiskej maj tiktekitilikan Jiova. Xikitakan Mateo 10:34-36 uan ika xitajtokan nejin:
Keman aksa kiixtalia kitekitilis Jiova, ¿toni uelis kiluiskej oso kichiuaskej ichankauan?
Para tikonitas akin ijkon kinpanok, xikitakan VIDEO uan ika xitajtokan nejin:
¿Toni tikonchiuaskia komo se mochankauj oso akin kuali iuan tionmouika kitemoua amo xikontekitiliok Jiova?
Xikitakan Salmo 27:10 uan Marcos 10:29, 30. Keman nankiitaskej sejse texto ika xitajtokan nejin:
¿Keniuj nejin tein kijtoua Jiova mitsonpaleuis xiontaxiko keman mochankauan oso akin kuali iniuan tionmouika mitsonixnamikiskej?
5. Xikonsentoka xikontekitili Jiova maski mitsontajyouiltiskej
Moneki maj tiyolchikaujkej keman oksekin amo techkauaskej maj tiktekitilikan Jiova. Xikitakan VIDEO uan ika xitajtokan nejin:
¿Toni tein tikonitak itech video kichiua xionyolchikauak?
Xikitakan Hechos 5:27-29 uan Hebreos 10:24, 25. Keman nankiitaskej sejse texto ika xitajtokan nejin:
¿Keyej semi moneki tiksentokaskej tiktekitiliskej Jiova maski tekiuanij amo techkauaskej maj titanojnotsakan oso maj timonechikokan?
6. Jiova mitsonpaleuis xiontaxiko
Itaixpantijkauan Jiova akin seseko kayomej uan tataman xiujmej kipiaj amo kikauanij Jiova maski kintajyouiltianij. Para tikonmatis keniuj kichiuanij, xikitakan VIDEO uan ika xitajtokan nejin:
¿Toni kinpaleuij nejin tokniuan maj taxikokan keman kintajyouiltijkej?
Xikitakan Romanos 8:35, 37-39 uan Filipenses 4:13. Keman nankiitaskej sejse texto ika xitajtokan nejin:
¿Keniuj mitsonmatiltiaj nejin textos ke uelis tikonxikos tein yeski?
Xikitakan Mateo 5:10-12 uan ika xitajtokan nejin:
¿Keyej uelis tionyolpakis maski mitsontajyouiltiskej?
Millones itekitikauan Jiova taxikouanij keman kintajyouiltiaj. ¡Tejuatsin no uelis tiontaxikos!
TEIN SEKIN KIJTOUAJ: “Nejua amo nitaxikos komo nechtajyouiltiaj”.
¿Katiyejua textos ueliskia kinyolchikauas akin ijkon kinemiliaj?
TEIN TIKITAKEJ
Jiova semi kipatiuita keman tiktekitiliaj maski techtajyouiltiaj, ¡yejuatsin techpaleuis maj titaxikokan!
Maj tikelnamikikan
¿Keyej amo tikmoujkaitaj maj techtajyouiltikan?
¿Toni uelis peuas tikonchiuas axkan achto ke peuas techtajyouiltiskej?
¿Keyej tikonneltoka tejuatsin ke uelis tikontekitilis Jiova maski tein yeski panos?
NO XIKONITA NEJIN
Xikonita keniuj Jiova kipaleuij se tokniuj telpoch keman tsaktoya porin amo kinekik pouis iniuan tateuianij.
Xikonita toni kinpaleuij se takat uan isiuatsin maj kisentokakan kitekitilikan Jiova maski kinixnamikkej.
Xikonita keniuj uelis yeski tionyolchikauak keman mitsontajyouiltiskej.
¿Keniuj moneki tikitaskej keman tochankauan techixnamikij, keniuj amo timotajtolteuiskej iniuan uan amo tikauaskej Jiova?