¿Keniuj Jehová techpaleuia maj titaxikokan?

1. ¿Keyej moneki titaxikoskej, uan akoni uelis techpaleuis? (1 Pedro 5:10).

TINOCHIN tikpiaj tataman ouijkayomej uan yejua ika xa tikmachiliskej ke amo uelis titaxikoskejok. Sekin miak xiujmejya mokokouaj. Sekin semi tajyouiaj porin momikilij aksa akin kitasojtaj, uan oksekin kinixnamikij ininchankauan oso tekiuanij (Mat. 10:​18, 36, 37). Sayoj ke maski tikpiaskej tein yeski ouijkayot uelis tikneltokaskej ke Jehová techpaleuis maj tiksentokakan tiktekitilikan (xikonlero 1 Pedro 5:10).

2. ¿Keyej ueli titaxikouaj?

² Se taxikos kijtosneki tiksentokaskej tiktekitiliskej Jehová maski tikpiaskej ouijkayomej, techtajyouiltiskej, oso timochikauaskej amo titajtakolchiuaskej. Para uelis titaxikoskej moneki tikneltokaskej ke tamis tein techtajyouiltia. Uan sayoj ueli titaxikouaj porin Jehová techmaka “chikaualis tein toselti amo ueli tikpiaj” (2 Cor. 4:7). Itech nejin tamachtilis tikitaskej naui taman kemej Jehová techpaleuia maj titaxikokan uan toni uelis tikchiuaskej para maj techpaleui tein kichiua.

MAJ TIKTATAUJTIKAN JEHOVÁ

3. ¿Keyej tel kualtsin maj ueli tiktataujtikan Jehová?

³ Jehová techpaleuiani maj titaxikokan ika se taman tein tel kualtsin. Maski titajtakolejkej kichiua maj ueli tiknojnotsakan (Heb. 4:16). Ueli tiktataujtiaj Jehová tein yeski hora, ueli tikiluiaj tein yeski, ueli tiknojnotsaj itech tein yeski tajtol uan kampa yeski timoajsiskej, hasta maski titsaktoskej oso tel uejka tietoskej (Jon. 2:​1, 2; Hech. 16:​25, 26). Jehová ueli techajsikamati hasta keman timoteltekipachouaj uan amo tikmatij toni tikiluiskej (Rom. 8:​26, 27). Tel kualtsin maj ueli tiktataujtikan Jehová.

4. ¿Keniuj tikmatij ke uelis tiktajtaniskej Jehová maj techpaleui maj titaxikokan?

⁴ Itech Biblia, Jehová techiluia ‘ke uelis tiktajtaniskej nochi, uan komo yejua tein kineki, techkakis’ (1 Juan 5:14). Komo ijkon, ¿uelis tiktajtaniskej maj techpaleui maj titaxikokan? Kemaj, porin yejua tein Jehová kineki. ¿Keniuj tikmatij? Biblia kijtoua ke keman titaxikouaj, Jehová uelis kinextis ke amo melauj tein Satanás kijtouilia (Prov. 27:11). Biblia no kijtoua ke Dios kineki ‘kinextis ke semi chikauak uan kinpaleuis akin sayoj yejua kitekitiliaj’ (2 Crón. 16:9). Yejua ika, uelis tikneltokaskej ke Jehová kineki uan uelis techpaleuis maj titaxikokan (Is. 30:18; 41:10; Luc. 11:13).

5. ¿Keniuj netataujtil techpaleuia maj tiyolseujtokan? (Isaías 26:3).

⁵ Biblia techyolchikaua maj tikiluikan Jehová tein techtekipachoua, ijkon yejua ‘techyolseuis kemej amo akin ueli kiajsikamati, uan nejon kiyekpias toyolo uan totanemilil’ (Filip. 4:7). Semi tiktasojkamatij nejin. Miakej akin amo kitekitiliaj Jehová no kipiaj miak ouijkayomej, uan kichiuaj miak taman para kielkauaskej tein kinpanoua oso yolseuiskej. Sekin mochikauaj amo kinemiliskej nion teyi para uelis yolseujtoskej, sayoj ke nejon amo kuali yetok porin amo kuali ejekamej uelis kinchiualtiskej tein yejuan kinekiskej (no xikonita Mateo 12:​43-45). Uan maski xa tepitsin yolseuij keman kichiuaj nejon, amo senkis momachiliaj kemej tejuan keman tiktataujtiaj Jehová uan techyolseuia. Tejuan iuan titakuaujtamatij Jehová, yejua ika tiktataujtiaj uan tiktajtaniaj maj techyolseui, uan yejua kichiua tein motenkaua porin ‘techpaleuia maj nochipa tiyolseujtokan’ (xikonlero Isaías 26:3). Jehová no techyolseuia keman techpaleuia maj tikelnamikikan textos tein timomachtianij itech Biblia, nejon textos techelnamiktiaj ke yejua techtasojta uan ke kineki techpaleuis (Sal. 62:​1, 2).

6. ¿Toni uelis tikiluiskej Jehová keman tiktataujtiskej? (No xikonita taixkopin).

⁶ ¿Toni uelis tikchiuaskej? Keman tikpiaskej se ueyi ouijkayot, maj tikiluikan Jehová toni tikmachiliaj, maj tikauilikan tein techtekipachoua uan maj tikiluikan maj techyolseui uan maj techpaleui maj tikmatikan toni tikchiuaskej (Sal. 55:22; Prov. 2:​10, 11). Uan keman tiktataujtiskej maj no tiktasojkamatilikan tein kichiua por tejuan (Filip. 4:6). Maj itech titanemilikan keniuj techpaleuiani maj titaxikokan uan maj tiktasojkamatilikan nochi tein techmaka. Maski titajyouijtokej porin techpanotok tein amo kuali, maj amo tikelkauakan nochi tein Jehová kichiua para techpaleuis (Sal. 16:​5, 6).

JEHOVÁ TECHMAKATOK BIBLIA

7. ¿Keniuj techpaleuis maj titaxikokan komo timomachtiaj Biblia?

⁷ Jehová techpaleuia ika iTajtol para maj titaxikokan. Itech Biblia tikajsij miak textos tein technextilia ke Dios techpaleuia. Maj itech titanemilikan tein kijtoua Mateo 6:​8, ompa kijtoua: “NamoTajtsin kimattokya tein namechpoloua hasta achto ke nankitajtaniskej”. Nejin tajtolmej kijtoj Jesús, uan yejua akin okachi kuali kiixmati Jehová. Yejua ika tikneltokaj ke keman titajyouiaj, Jehová kimati toni techpanoua uan techpaleuia. Biblia kijtoua miak taman tein Jehová motenkaujtok kichiuas tein uelis techpaleuis maj titaxikokan keman titajyouiaj (Sal. 94:19).

8. 1) Xikonijto keniuj techpaleuia maj titaxikokan tein techyolmajxitia Biblia. 2) ¿Toni moneki tikchiuaskej para kuali titaixpejpenaskej oso komo tikpiaj se ouijkayot?

⁸ Biblia techyolmajxitia toni uelis techpaleuis maj titaxikokan keman tikpiaj ouijkayomej. Tein kijtoua techpaleuia maj tikmatikan keniuj kuali titaixpejpenaskej (Prov. 2:​6, 7). Uan se taman tein techyolmajxitia yejua ke amo moneki ika timotekipachojtoskej tein panos satepan, ta maj titakuaujtamatikan ke Jehová techpaleuis mojmostaj (Mat. 6:34). Komo mojmostaj tiklerouaj Biblia uan itech titanemiliaj, okachi ijsiujka tikelnamikiskej tein techyolmajxitia keman monekis titaixpejpenaskej oso tiknekiskej tikmatiskej keniuj tikxikoskej se ouijkayot.

9. ¿Keniuj techyolchikaua keman tiklerouaj itech Biblia ke Jehová kinpaleuij itekitikauan?

⁹ Itech Biblia no ininka tajtoua sekin akin katkaj kemej tejuan akin takuaujtamatkej iuan Jehová uan yejua kinpaleuij (Heb. 11:​32-34; Sant. 5:17). Keman itech titanemiliskej keniuj kinpaleuij, okachi tikneltokaskej ke Jehová no ‘techyekpias uan techchikauas uan ke nochipa uelis techpaleuis keman tikpiaskej ouijkayomej’ (Sal. 46:1). Uan keman itech titanemiliaj keniuj takuaujtamatkej iuan Jehová uan kisentokakej kitekitilijkej maski kipiakej ouijkayomej, techyolchikaua maj tikchiuakan kemej yejuan (Sant. 5:​10, 11).

10. ¿Toni moneki tikchiuaskej para maj techpaleui Biblia?

¹⁰ ¿Toni uelis tikchiuaskej? Maj mojmostaj tiklerokan Biblia uan maj tikijkuilokan versículos tein tikitaskej ke uelis techpaleuis. Miakej tokniuan kilerouaj texto tein ixyetok tikleroskej sejse tonal, nejin kinpaleuia porin kinyolchikaua uan ueli itech tanemiliaj nochi tonal. Yejua nejon tein kipanok Marie,a se tokniuj siuat akin kinyekpiaya itatuan porin kinajxilijkej cáncer uan momikilijtoyajya. Yejua kijtoua: “Mojmostaj kualkan niklerouaya texto itech amaix Maj timomachtikan iTajtol Dios uan itech nitanemiliaya. Nejon nechpaleuiaya maj itech nitanemili tein kijtoua Biblia para maj amo sayoj nechtekipachojtoni tein amo kuali tein nechpanotoya” (Sal. 61:2).

MAJ TIETOKAN INIUAN TOKNIUAN

11. ¿Keyej techyolchikaua keman tikitaj ke tokniuan taxikouaj?

¹¹ Jehová kichiua maj tokniuan itech nochi taltikpak techpaleuikan para maj titaxikokan. Kemej tikmatij ke ‘yejuan no kipanotokej tein tejuan tikijyouijtokej’, technextilia ke amo tietokej toselti (1 Ped. 5:9). ¿Keyej? Porin keman tikitaj ke tokniuan no kipiaj ouijkayomej kemej tejuan uan taxikouaj, ueli tikneltokaj ke tejuan no uelis titaxikoskej (Hech. 14:22).

12. ¿Keniuj tokniuan uelis techpaleuiskej, uan keniuj tejuan no uelis tikinpaleuiskej? (2 Corintios 1:​3, 4).

¹² Tein tokniuan kijtoskej oso kichiuaskej uelis techpaleuis maj titaxikokan. Yejua nejon tein kichiujkej tokniuan para kipaleuiskej tatitanil Pablo. Keman amo kikauayaj maj kisa de ichan, miakej tokniuan kiyolchikaujkej uan kimakakej tein kipolouaya. Uan keman kintajkuilouilij, itech icartas kintokaytij uan kintasojkamatilij porin kipaleuijkej (Filip. 2:​25, 29, 30; Col. 4:​10, 11). Axkan tokniuan no uelis techyolchikauaskej uan techpaleuiskej maj titaxikokan keman titajyouijtoskej, uan tejuan no uelis tikinpaleuiskej keman monekis (xikonlero 2 Corintios 1:​3, 4).

13. ¿Toni kipaleuij maj taxiko se tokniuj akin monotsa Maya?

¹³ Maj tikitakan tein kipanok Maya, se tokniuj siuat de Rusia. Itech xiuit 2020, seki policías kalakkej ichan uan kitatemolijkej. Satepan, kiuikakej ininixpan jueces porin tanojnotsaya ika Biblia. ¿Keniuj kipaleuijkej tokniuan? Yejua kijtoua: “Keman nechpanotoya nejon, nimoteltekipachouaya, nimoteltayokoltiaya uan nikmachiliaya ke nisioujtoya. Sayoj ke tokniuan nechnotsayaj ika teléfono, uan sekin nechtajkuilouiliayaj uan nechiluiayaj ke semi nechtasojtaj”. Uan no kijtoj: “Ipa nikmatiaya ke tokniuan kemej yeskia nochankauan uan nechtasojtaj, sayoj ke okachi nikneltokak keman nikitak nochi tein kichiujkej para nechpaleuiskej”.

14. ¿Toni uelis tikchiuaskej para maj tokniuan ueli techpaleuikan? (No xikonita taixkopin).

¹⁴ ¿Toni uelis tikchiuaskej? Keman tikpiaskej se ouijkayot, maj iniuan titajtokan tokniuan uan maj iniuan tietokan. Maj nochipa tikiniluikan tayekananij maj techpaleuikan porin yejuan tamatij kemej ‘kampa se motatia keman taejeka uan kampa se mopaleuia keman kiouaejeka’ (Is. 32:2). Uan maj tikelnamikikan ke nochin tokniuan no kipiaj ouijkayomej. Yejua ika, komo tikchiuaj teisa para tikinpaleuiskej okachi tiyolpakiskej uan titaxikoskej (Hech. 20:35).

TEIN TIKCHIAJ MAJ MOCHIUA

15. ¿Keniuj tein kichiaya Jesús kipaleuij maj taxiko, uan keniuj tejuan no techpaleuia tein tikchiaj? (Hebreos 12:2).

¹⁵ Jehová motenkaua kichiuas teisa tein techpaleuis maj titaxikokan, uan nejin yekmelauj mochiuas (Rom. 15:13). Maj tikelnamikikan ke Jesús taxikoj keman yetoya nikan taltikpak porin kichiaya maj mochiua tein Jehová motenkaujka iuan (xikonlero Hebreos 12:2). Yejua kimatia ke komo amo kikauaya iTajtsin, kinextiskia ke nochi tein Satanás kijtouilijka Jehová amo melauj katka uan ke sayoj Jehová kinamiki maj se kiueyitali. No semi kinekia mokepas iuan iTajtsin ompa iluikak uan maj ejko tiempo para taixyekanas iniuan iikniuan taijitalmej. Tejuan no tikchiaj tinemiskej nochipaya itech xochital, nejin techpaleuia maj tikxikokan tein yeski ouijkayot tein tikpiaskej nikan taltikpak kampa Satanás taixyekantok.

16. ¿Keniuj se tokniuj kipaleuij tein kichia maj mochiua, uan toni mitsonmachtia tein kijtoj?

¹⁶ Maj tikitakan keniuj se tokniuj de Rusia akin monotsa Anna kipaleuij keman itech tanemilij keniuj tinemiskej itech xochital. Itakauj kikitskijkej uan kitsakkej uan ompa yetoskia hasta keman jueces kiitaskiaj toni kichiuiliskiaj. Keman panok nejin, yejua kijtoj toni kipaleuia: “Keman niktataujtia Jehová uan itech nitanemilia keniuj kualtsin tinemiskej itech xochital semi nechpaleuia maj amo nimosenkaua. Nikmati ke amo nochipa titajyouijtoskej porin Jehová kinixpolos akin kitauelitaj uan tejuan techtatiochiuis”.

17. ¿Keniuj tiknextiaj ke tiktasojkamatij tein Jehová motenkaujtok kichiuas? (No xikonita taixkopin).

¹⁷ ¿Toni uelis tikchiuaskej? Maj tikxelokan tiempo para tiknemiliskej keniuj tinemiskej itech xochital tein Dios motenkaujtok. Maj tiknemilikan ke tochankauan uan akin kuali iniuan timouikaj tinochin tietokejya itech xochital uan tiyolpakij. Nochi ouijkayomej tein tikpiaj ‘panotikisaskej’ uan tikitaskej ke amo uejueykej komo itech titanemiliaj keniuj tinemiskej ompa (2 Cor. 4:17). Maj timochikauakan ika tikinnojnotsaskej oksekin tein tikchiaj maj mochiua. Maj tiknemilikan keniuj nemij akin amo kitekitiliaj Jehová, yejuan kipiaj miak ouijkayomej uan amo kimatij toni motenkaua kichiuas satepan. Yejua ika maski amo tikiniluiskej miak taman, xa kinpaleuis maj kinekikan okachi kimatiskej tein Jehová motenkaujtok.

18. ¿Keyej ueli tikneltokaj ke mochiuas tein Jehová motenkaujtok?

¹⁸ Satepan ke Job kipiak miak ouijkayomej uan taxikoj, kiluij Jehová: “Axkan nikmati ke nochi ueli tikchiua uan amo teyi uelis mitstsakuilis xikchiua tein tikixtalijtok” (Job 42:2). Job kiajsikamatik ke Jehová amo kitsakuilia nion teyi maj kichiua tein motenkaua. Keman tikelnamikij ke yejua kichiuas tein motenkaujtok uan kiixpolos ouijkayomej tein tikpiaj, techpaleuia maj titaxikokan. Maj tiknemilikan ke se siuat kemanya mokokoua uan motayokoltia porin miakej tapajtianij kiitakejya, sayoj ke amo akin ueli kipajtia. Se tonal kiixmati se tapajtijkej akin kiluia toni kokolis kipia uan toni uelis kipajtis. Semi yolpaki porin kimati ke uelis pajtis maski moneki mochias se tiempo, uan yejua nejon tein kiyolchikaua maj kisentoka taxiko. Tejuan no ueli tiksentokaj titaxikouaj porin tikmatij ke yekmelauj mochiuas se xochital ijkon kemej Dios motenkaujtok.

19. ¿Toni moneki tikchiuaskej para titaxikoskej?

¹⁹ Tikitakejya ke Jehová techpaleuia ika nejin naui taman para maj titaxikokan: ueli tiktataujtiaj, techmakatok Biblia, tokniuan uan tein tikchiaj maj mochiua. Komo timochikauaj tikuiskej nochi nejin, Jehová techpaleuis maj tikxikokan tein yeski ouijkayot tein tikpiaskej. Uelis titaxikoskej hasta keman Dios kiixpolos nochi tein Satanás kiixyekana uan tein techtajyouiltia (Filip. 4:13).