Jehová “kinpajtia akin tayokoxtokej”

1. ¿Keniuj momachilia Jehová keman kinita itekitikauan?

JEHOVÁ kiita nochi tein kinpanoua itekitikauan. Kiita keman tiyolpakij uan keman timotayokoltiaj (Sal. 37:18). Semi tikyolpaktiaj keman kiita ke timochikauaj tiktekitiliskej maski semi timotekipachojtokej. Uan amo sayoj nejon, ta no kineki techyolseuis uan techpaleuis.

2. ¿Keniuj Jehová kinpaleuia akin tayokoxtokej, uan toni moneki tikchiuaskej para techyekpias?

² Keman Salmo 147:3 ininka tajtoua “akin tayokoxtokej”, kijtoua ke Jehová “kitetsiloua ika tasal kampa takojkokolmej”. Nejin texto kijtoua keniuj Jehová kualtsin kemej kinyekpia akin motayokoltijtokej. ¿Toni moneki tikchiuaskej para maj techpaleui nochi tein Jehová toka kichiua? Maj tiknemilikan nejin: komo aksa motelkokoj, uelis kiitatiuj se kuali tapajtijkej. Sayoj ke para pajtis moneki kichiuas nochi tein kiluia tapajtijkej. Itech nejin tamachtilis tikitaskej toni kiniluia Jehová akin moyolkokojtokej uan keniuj uelis kichiuaskej tein yejuatsin kinyolmajxitia itech iTajtol.

JEHOVÁ TECHELNAMIKTIA KE SEMI TECHPATIUITA

3. ¿Keyej miakej kimachiliaj ke amo teyi chiuanimej?

³ Tinemij kampa miakej amo motasojtajok. Miakej kinchiuiliaj tein amo kuali oksekin uan kichiuaj maj momachilikan ke amo teyi chiuanimej. Se tokniuj siuat akin monotsa Helen,a kijtoua: “Keman nimoskaltij, notatuan amo nechnextiliayaj ke nechtasojtayaj. Nopaj semi tateuiaya uan nochipa nechiluiaya ke amo teyi nichiujkej”. ¿No ijkon mitspanok? Xa mitschiuiliayaj tein amo kuali, semi mitsijijtouayaj oso kichiuayaj ximomachili ke amo akin mitstasojta. Komo ijkon mitspanok, xa amo niman tikneltokas ke aksa mitstasojta.

4. ¿Toni techiluia Jehová itech Salmo 34:18?

⁴ Maski sekin mitschiuilijkej tein amo kuali, uelis tikmatis ke Jehová mitstasojta uan mitspatiuita. Yejuatsin “iniuan yetok akin tajyouijtokej” (xikixtajtolti Salmo 34:18). Komo tejua no ‘semi titayokoxtok’, xikelnamiki ke Jehová kiitak ke tiyolkuali uan kinekik xiktekitili (Juan 6:44). Uan nochipa mitspaleuis porin semi mitstasojta.

5. ¿ Toni techmachtia kemej Jesús kinitaya akin kinixtopeuayaj?

⁵ Tein Jesús kichiuak keman yetoya nikan taltikpak, techpaleuia maj tikajsikamatikan keniuj momachilia Jehová. Jesús kuali kinselij uan kiniknelij akin kinixtopeuayaj (Mat. 9:​9-12). Keman se siuatsin akin semi mokokouaya kimatokilij itasal porin kimatia ke ijkon pajtiskia, Jesús kiyolseuij uan kiluij ke kuali tein kichiuak porin kinextij ke takuaujtamatia (Mar. 5:​25-34). Jesús senkis kichiua kemej iTajtsin (Juan 14:9). Yejua ika senkis xikmati ke Jehová mitspatiuita uan kiita tein kuali tein tikchiua, kimati ke iuan titakuaujtamati uan ke tiktasojta.

6. ¿Toni uelis tikchiuaskej komo tikmachiliaj ke amo teyi tichiuanimej?

⁶ ¿Toni uelis tikchiuas komo nochipa tiknemilijtok ke amo teyi tichiujkej? Xikixtajtolti textos tein mitsmatiltiaj ke Jehová mitspatiuita uan itech xitanemili (Sal. 94:19).b Komo amo tiuelik tikchiuak tein tikixtalijka oso amo ueli tikchiua tein oksekin kichiuaj, amo ximosenkaua nion itech xitanemili tein amo ueli tikchiua. Jehová amo kichia xikchiua tein amo tiueli (Sal. 103:​13, 14). Komo mitschiuilijkaj tein amo kuali oso moka mauiltijkaj, amo xiknemili ke motajtakol tein mitspanok. Amo tejua motajtakol uan amo monekia maj ijkon mitschiuilikan. Xikelnamiki ke Jehová kinmelauas akin kinchiuiliaj tein amo kuali oksekin. Sayoj ke kinpaleuia akin ininka mauiltiaj (1 Ped. 3:12). Sandra, akin kichiuilijkej miak taman tein amo kuali keman katka siuapil, kijtoua: “Jehová nochipa kiita tein kuali tein nikchiua, yejua ika niktataujtia maj nechpaleui maj no ijkon nikita”.

7. ¿Keniuj ouijkayomej tein tikpanokej techpaleuia keman tiktekitiliaj Jehová?

⁷ Xikelnamiki ke Jehová uelis kichiuas xikinpaleui oksekin. Yejuatsin mitskaua iuan xitekiti keman titanojnotsa (1 Cor. 3:9). Kemej tikpiani ouijkayomej uelis okachi tikinajsikamatis akin tajyouijtokej. Tokniuan kipaleuijkej Helen akin ika titajtojkej itech párrafo 3 uan axkan okachi kimati keniuj kinpaleuis oksekin. Yejua kijtoua: “Nochipa nikmachiliaya ke amo teyi nichiujkej, sayoj ke Jehová nechpaleuij maj nikmachili ke nechtasojta uan kichiua maj nikinpaleui oksekin”. Helen tapaleuia kemej precursora regular uan semi yolpaki.

JEHOVÁ KINEKI MAJ TIKNELTOKAKAN KE TECHTAPOJPOLUIJYA

8. ¿Toni techiluia Jehová itech Isaías 1:18?

⁸ Sekin itekitikauan Jehová kisentokaj tel amo kuali momachiliaj porin tajtakolchiujkaj achto ke moauiskiaj oso satepan ke moauijkej. Sayoj ke maj tikelnamikikan ke Jehová kitemakak iKonetsin maj toka momikili porin semi techtasojta. Yejua ika uelis tikneltokaskej ke yejuatsin kineki maj tikselikan tein kitemakak. Jehová techiluia: “Xiualakan uan maj tikyektalikan kuejmolmej”.c Uan techmatiltia ke keman tikchiuajya nejon senkis techtapojpoluia totajtakoluan (xikixtajtolti Isaías 1:18). Semi tiktasojkamatij maj toTajtsin akin semi techtasojta kielkaua tein amo kuali tein tikchiujkaj uan maj nochipa kielnamikto tein kuali tein tikchiuanij (Sal. 103:​9, 12; Heb. 6:10).

9. ¿Keyej semi kuali maj itech titanemilikan tein tikchiuaj axkan uan tein tikpiaskej satepan, uan amo itech tein panokya?

⁹ ¿Toni uelis mitspaleuis komo semi mitsyolkokoua tein achto tikchiujka? Okachi kuali itech xitanemili tein tikchiujtok axkan uan tein uelis tikchiuas satepan. Itech xitanemili tein kichiujka tatitanil Pablo. Yejua moyolkokouaya porin kintajyouiltijka akin kitojtokayaj Cristo, sayoj ke kimatia ke Jehová kitapojpoluijkaya (1 Tim. 1:​12-15). Yejua ika amo kisentokaya itech tanemiliaya tein amo kuali tein kichiujka nion keniuj mochiujka se fariseo akin semi kitakachiuayaj (Filip. 3:​4-8, 13-15). Ta semi yolpakia keman tanojnotsaya uan itech tanemiliaya tein kiseliskia satepan. Ijkon kemej Pablo, amo uelis tikpatas tein panokya, sayoj ke uelis itech titanemilis keniuj tinemis amo uejkaua uan keniuj uelis tikueyitalis uan tikyolpaktis Jehová axkan.

10. ¿Toni uelis tikchiuaskej komo tikinyolkokojkej oksekin?

¹⁰ Xa semi timotekipachoua porin tein tikchiujka kinyolkokoj oksekin. ¿Toni uelis tikchiuas? Xikinilui maj mitstapojpoluikan uan xikchiua tein mitspaleuis oksepa kuali ximouika iniuan (2 Cor. 7:11). Xikilui Jehová maj kinpaleui akin tikinyolkokoj. Yejuatsin uelis namechpaleuis xiksentokakan xiktekitilikan uan oksepa xiyolseujtokan.

11. ¿Toni techmachtia tein kichiuak Jonás? (No xikita taixkopin).

¹¹ Maj mitsmachti teisa tein amo kuali tein tikchiuak uan xikaua maj Jehová kiita keniuj uelis okachi kuali tiktekitilis. Xikelnamiki tein kipanok tanauatijkej Jonás. Yejua amo yajki Nínive kemej Jehová kinauatijka, ta choloj uan yajki oksekopa. Jehová kimelauak uan tanauatijkej momachtij miak taman (Jon. 1:​1-4, 15-17; 2:​7-10). Jehová kisentokak kitekimakak Jonás, uan oksepa kititanik maj youi Nínive, uan Jonás niman tatakamatik. Maski semi kiyolkokouaya tein kichiujka, nejon amo kitsakuilij maj kichiua tein Jehová kinauatijka (Jon. 3:​1-3).

JEHOVÁ TECHYOLSEUIA IKA ICHIKAUALIS

12. ¿Keniuj techpaleuia Jehová keman titajyouiaj oso keman techpanoua tein tel amo kuali? (Filipenses 4:​6, 7).

¹² Keman titeltajyouiaj oso techpanoua teisa tein tel amo kuali, Jehová kikui ichikaualis para techyolseuis. Yejua nejon tein kinpanok Ron uan Carol keman ininokichpil akin ueyia katka momiktij. Yejuan kijtouaj: “Ipa tikpanouanij ouijkayomej, sayoj ke nejin yejua tein okachi techtajyouiltiani. Kemej miakpa amo uelia tikochiaj, tiktataujtiayaj Jehová uan tikmachiliayaj ke techyolseuiaya ijkon kemej kijtoua Filipenses 4:​6, 7” (xikixtajtolti). Komo semi titajyouijtok uan titayokoxtok porin mitspanotok tein amo kuali, xiktapoui Jehová nochi tein tikmachilia. Uelis iuan titajtos keman tiknekis uan tiempo tein tiknekis (Sal. 86:3; 88:1). Xiksentoka xiktajtani maj mitsmaka ichikaualis. Xikyekmati ke yejuatsin mitskakis keman tiktataujtis (Luc. 11:​9-13).

13. ¿Keniuj ichikaualis Dios techpaleuia maj tiksentokakan tiktekitilikan? (Efesios 3:16).

¹³ ¿Kemansa tikpanouani se ouijkayot uan axkan tikmachilia ke amo tichikauakok para tikchiuas teisa? Ichikaualis Jehová uelis mitspaleuis xiksentoka xiktekitili uan amo xikaua (xikixtajtolti Efesios 3:16). Maj tikitakan tein kipanok se tokniuj siuat akin monotsa Flora. Yejua uan itakatsin katkaj misioneros, sayoj ke itakauj kikajkayauak iuan okse siuat uan yejua ika mokaujkej. Flora kijtoua: “Semi nechtayokoltij tein kichiuak uan sayoj itech nitanemilijtoya. Yejua ika niktataujtiaya Jehová maj nechmaka ichikaualis para maj niksentoka niktekitili. Jehová nechyolseuij uan maski niknemiliaya ke amo niueliskia, nimoyolchikauak uan uelik nitaxikoj porin nechpaleuij”. Flora kimachilia ke Dios kipaleuij maj okachi iuan takuaujtamati, uan yejua kiyekmati ke kipaleuis maski tein yeski kipanos. Flora kijtoua ke Salmo 119:32 kualtsin kimelaua keniuj Jehová kipaleuiani. Ompa kijtoua: ‘Niksentokas nimochikauas niktojtokas ojti kampa moajsij motanauatiluan, porin tejua tikchiua maj noyolo takuaujtamati’.

14. ¿Toni uelis tikchiuaskej para tikseliskej ichikaualis Dios?

¹⁴ ¿Toni moneki tikchiuas satepan ke tiktataujtia Jehová maj mitsmaka ichikaualis? Xikchiua seki taman tein mitspaleuis xikseli ichikaualis, kemej tias nechikolmej uan titanojnotsas. Mojmostaj xikixtajtolti Biblia, ijkon tikmatis keniuj tanemilia Jehová (Filip. 4:​8, 9). Keman tikixtajtoltis, xikita akonimej ininka tajtoua uan toni ouijkayomej kipanokej uan itech xitanemili keniuj Jehová kinpaleuij maj taxikokan. Sandra, akin ika titajtojkej itech párrafo 6 kipanok miak ouijkayomej. Yejua kijtoua: “Semi nechyolchikaua kampa Biblia ika tajtoua José porin yejua kisentokak kuali mouikak iuan Jehová maski kipanok ouijkayomej uan kichiuilijkej miak taman tein amo kuali” (Gén. 39:​21-23).

JEHOVÁ KICHIUA MAJ TOKNIUAN TECHYOLSEUIKAN

15. ¿Akonimej uelis techyolseuiskej uan keniuj uelis kichiuaskej? (No xikita taixkopin).

¹⁵ Keman titajyouiaj, tokniuan semi techpaleuiaj uan techyolchikauaj (Col. 4:11). Jehová kinextia ke semi techtasojta keman kichiua maj tokniuan techpaleuikan. Tokniuan techyolseuiaj keman touan yetokej oso keman tikiniluiaj keniuj timomachiliaj uan yejuan techkakij. Xa techyolchikauaj ika se texto oso touan motataujtiaj (Rom. 15:4).d Xa se tokniuj techelnamiktia keniuj tanemilia Jehová uan nejon techpaleuia maj tiksentokakan titaxikojtokan. Tokniuan no uelis techpaleuiskej ika seki taman, xa keman techuikiliskej toni tikuaskej.

16. ¿Toni uelis tikchiuaskej para maj oksekin techpaleuikan?

¹⁶ Kemansa, xa monekis tikiniluis oksekin maj mitspaleuikan. Tokniuan mitstasojtaj uan kinekij mitspaleuiskej (Prov. 17:17). Sayoj ke xa amo kimatij keniuj timomachilia oso toni mitspoloua (Prov. 14:10). Komo amo kuali timomachilia uan semi titayokoxtok, xikinilui motasojikniuan keniuj timomachilia. Xikinilui keniuj uelis mitspaleuiskej. Uelis titajtos iuan se oso ome tayekananij akin iniuan titakuaujtamati. Kemansa, se tokniuj siuat okachi kuali momachilia komo tajtoua iuan okse tokniuj siuat akin uelis kipaleuis.

17. ¿Keyej kemansa amo ueli techyolchikauaj, uan toni uelis tikchiuaskej?

¹⁷ Amo xiktemo tietos moselti. Komo semi titayokoxtok xa amo tiknekis maj nion akin mouan yeto. Xa tokniuan amo mitsajsikamatiskej oso kijtoskej teisa tein mitsyolkokos (Sant. 3:2). Sayoj ke xiksentoka ximouika iniuan tokniuan porin Jehová uelis kichiuas maj yejuan mitsyolchikauakan. Se tokniuj tayekankej akin monotsa Gavin, akin kipia depresión kijtoua: “Miakpa, amo nikneki nietos iniuan notasojikniuan”. Maski ijkon, Gavin mochikaua yetos iniuan tokniuan uan semi kipaleuia keman ijkon kichiua. Se tokniuj siuat akin monotsa Amy, kijtoua: “Amo semi nitakuaujtamati iniuan oksekin porin nechpanouani tein amo kuali. Sayoj ke nimochikaua nikintasojtas tokniuan uan iniuan nitakuaujtamatis ijkon kemej Jehová kichiua. Nejon semi kiyolpaktia yejuatsin uan nejua no”.

TEIN JEHOVÁ MOTENKAUA KICHIUAS TECHYOLSEUIA

18. ¿Toni tein kuali tikchiaj tikseliskej, uan toni uelis tikchiuaskej axkan?

¹⁸ Semi techyolpaktia tikmatiskej ke amo uejkaua Jehová kiixpolos nochi taman tein techtekipachoua uan tein techtajyouiltia (Apoc. 21:​3, 4). Nochi tein axkan techtajyouiltia amo tikelnamikiskejok keman tietoskej itech xochital (Is. 65:17). Kemej tikitakejya, desde axkan Jehová kemej yeskia kitetsiloua ika tasal kampa titakojkokolmej. Jehová techmakani miak taman para techyolseuis uan techpaleuis porin techtasojta. ¡Ximokaua maj mitspaleui! Amo keman xikelkaua ke Jehová semi mitstasojta (1 Ped. 5:7).