Amo ouij xiontamachti

Tein Jesús kichiuak

VIDEO: Jesús tamachtia ika se neskayot ke Jehová techyekpia

1. Xikonita VIDEO oso xikonlero Mateo 6:​25-27. Ompa xiontanemili itech nejin netajtanilmej:

1. 1). ¿Toni ika tajtoj Jesús para tamachtis ke Jehová techyekpia?

2. 2). Maski Jesús ueliskia kijtos miak taman de totomej, ¿toni sayoj kijtoj uan keyej kuali kemej tamachti?

¿Toni techmachtia tein kichiuak Jesús?

2. Komo amo ouij kemej titamachtiaj, akin techkakij kiajsikamatiskej uan kielnamikiskej tein tikinmachtijkej.

Xikonchiua kemej Jesús

3. Amo semi xiontajto. Amo xikonilui akin tikonmachtia nochi tein tikonmati de se tamachtilis. Ta sayoj ika xiontajto tein kijtoua amaix tein nanmomachtijtokej. Keman tikontajtanis teisa akin tikonmachtia, xikonchia maj mitsonnankili. Sayoj ke, ¿komo amo kimati tanankilil oso kijtoua teisa tein Biblia amo tamachtia? Xikonchiuili okseki netajtanilmej tein kipaleuiskej maj kiajsikamati tamachtilis. Komo akin tikonmachtia kiajsikamatikia tamachtilis, xipanokan itech okse.

4. Xikonpaleui akin tikonmachtia maj kiajsikamati okseki tamachtilismej ika tein kimatia. Kemej neskayot, komo peuas tiontamachtis ke mikemej oksepa nemiskej, uelis tepitsin nankielnamikiskej tein kimatia akin tikonmachtia de toni panoua keman aksa momikilia.

5. Kuali xikonnemili neskayomej tein ika tiontamachtis. Achto ke tikonijtos se neskayot, xionmotajtani:

1. 1). “¿Amo ouij neskayot tein nikuis?”.

2. 2). “¿Niman kiajsikamatis akin nikmachtia?”.

3. 3). “¿Akin nikmachtia kielnamikis tamachtilis oso sayoj neskayot?”.