Tein techiluia keniuj mochiuas nechikol Tonemilis uan toTanojnotsalis

Tein kipia

1. Nikan techiluia keniuj tikpanoltiskej tataman tamachtilis itech Nechikol Tonemilis uan toTanojnotsalis. Keman timomachtiskej para tikpanoltiskej se tamachtilis, moneki tikitaskej tein kijtoua nejin amat uan no tein techiluis amaix Tein timomachtiaj itech nechikol. Moneki se kinyoleuas nochin tanojnotsanij maj kipanoltikan se tamachtilis. Akin kisentokaj mosentiliaj touan itech nechikol no uelis kipanoltiskej se tamachtilis komo kiseliaj tein Biblia tamachtia uan kitakamatij. Komo se akin ayamo tanojnotsa no kineki kipanoltis se tamachtilis, akin kiita maj kuali mochiua Nechikol Tonemilis uan toTanojnotsalis achto iuan tajtos uan satepan kimatiltis ox uelisya kipanoltis se tamachtilis. Keman tajtos iuan, yetos akin kimachtia ika Biblia (oso semej itatuan komo yejua se tokniuj). Moneki kichiujtos kemej kitajtaniaj se tanojnotskej akin ayamo moauia (od cap. 8 párr. 8).

TANEMILILMEJ TEIN MOITAS

2. Se minuto. Satepan ke tamis nekuikatil uan mochiuas se netataujtil, akin kiixyekana nechikol Tonemilis uan toTanojnotsalis kichiuas maj takakinij kinekikan kimatiskej tataman tamachtilis tein moitas. Yejua kinextis katiyejua seki tamachtilis okachi kinpaleuis tokniuan itech nechikol.

TAMACHTILIS TEIN KIPIA BIBLIA

3. Tanojnots (10 minutos). Itech amaix Tein timomachtiaj itech nechikol ixnesi itokay tamachtilis uan ome oso eyi tanemililmej tein tayekantokej. Nejin tanojnots kipanoltis se tayekankej oso se tapaleuijkej akin kuali tamachtia. Keman peuas moixtajtoltis se yankuik amatajkuilol tein kipia Biblia, moitas se video tein ika tajtoua nejon amatajkuilol. Akin kitemakas tanojnots uelis kijtos keniuj seki tanemililmej tein kipia video mouikaj iuan tanojnots, sayoj ke, moneki okachi ika tajtos tanemililmej tein kiualkui amaix Tein timomachtiaj itech nechikol. Hasta kampa ajsis tiempo, moneki kikuis taixkopimej tein kipaleuia tamachtilis. No uelis kimajxitilis okseki taman komo tapaleuia maj momelaua tamachtilis.

4. Maj tiktemokan tamachtilis ika nejmachkayot (10 minutos). Nejin mochiuas ika netajtanilmej uan tanankililmej uan amo teyi moijtos ipeujyan nion itamian. Kipanoltis se tayekankej oso se tapaleuijkej akin kuali tamachtia. Akin kipanoltis nejin tamachtilis moneki kichiuas ome netajtanilmej tein ixnesij. Yejua kiixejekos ox moixtajtoltis textos. Keman tokniuan tanankiliskej moneki maj amo pano 30 segundos.

5. Tanojnots (10 minutos). Itech amaix Tein timomachtiaj itech nechikol ixnesi itokay tamachtilis uan ome oso eyi tanemililmej tein tayekantokej. Nejin tanojnots kipanoltis se tayekankej oso se tapaleuijkej akin kuali tamachtia. Keman peuas moixtajtoltis se yankuik amatajkuilol tein kipia Biblia, moitas se video tein ika tajtoua nejon amatajkuilol. Akin kitemakas tanojnots uelis kijtos keniuj seki tanemililmej tein kipia video mouikaj iuan tanojnots, sayoj ke, moneki okachi ika tajtos tanemililmej tein kiualkui amaix Tein timomachtiaj itech nechikol. Hasta kampa ajsis tiempo, moneki kikuis taixkopimej tein kipaleuia tamachtilis. No uelis kimajxitilis okseki taman komo tapaleuia maj momelaua tamachtilis.

MAJ OKACHI KUALI TITAMACHTIKAN

6. Quince minutos. Nejin taxelol kinpaleuia nochin maj momachtikan keniuj okachi kuali tajtoskej, tanojnotsaskej uan tamachtiskej. Komo moneki, tayekananij no uelis kinmakaskej se tamachtilis tein kipanoltiaj kemej momachtianij. Itech amaix Tein timomachtiaj itech nechikol ixnesi ika paréntesis katiyejua tamachtis de folleto Titamachtikan oso Maj tikintasojtakan moneki kiitaskej keman kipanoltiskej se tamachtilis. Kemansa ixnesis maj kipanoltikan tamachtilis iniuan takakinij. Nejin kipanoltis se tayekankej oso se tapaleuijkej akin kuali tamachtia (xikonita párrafo 15 kampa kimelaua keniuj kipanoltiskej se tamachtilis iniuan takakinij).

7. Xionpeua xikinnojnotsa oksekin. Nejin uelis kipanoltis se tokniuj takat oso siuat. Komo kipanoltia se tokniuj takat, itapaleuijkauj yeski okse tokniuj takat oso semej ichankauan. Komo kipanoltia se tokniuj siuat, itapaleuijkauj yeski okse tokniuj siuat oso semej ichankauan. Nochin omen uelis ijkatoskej oso tokotsyetoskej (okachi momelaua keniuj mopanoltis nejin tamachtilis itech párrafo 12 uan 13).

8. Oksepa xikinkalpano. Nejin kipanoltis se tokniuj takat oso siuat. Komo kipanoltia se tokniuj takat, itapaleuijkauj moneki yeski se tokniuj takat. Komo kipanoltia se tokniuj siuat, itapaleuijkauj moneki yeski se tokniuj siuat (km-S 5/97 pág. 2). Nochin omen uelis ijkatoskej oso tokotsyetoskej. Akin kipanoltis tamachtilis moneki kinextis toni uelis se kijtos keman oksepa se kikalpanos aksa (okachi momelaua keniuj se kipanoltis nejin tamachtilis itech párrafo 12 uan 13).

9. Xikinpaleui maj kitojtokakan Cristo. Nejin kipanoltis se tokniuj takat oso siuat. Komo kipanoltia se tokniuj takat, itapaleuijkauj moneki yeski se tokniuj takat. Komo kipanoltia se tokniuj siuat, itapaleuijkauj moneki yeski se tokniuj siuat (km-S 5/97 pág. 2). Nochin omen uelis ijkatoskej oso tokotsyetoskej. Nikan monextis keniuj se tamachtia ika Biblia tein mopeualtijya. Amo moneki nesis keniuj peua oso tami keman tamachtia, komo momachtijkej amo tekititok itech nejon taman. Amo no moneki moixtajtoltis ika tajtol chikauak nochi párrafos tein ixyetok moitas, maski kemaj uelis mochiuas.

10 Xikonmelaua tein tikonneltoka. Kipanoltis se tokniuj takat komo ixnesi maj kipanolti kemej se tanojnots. Komo moneki maj monexti keniuj se tanankilis itech tanojnotsalis, uelis kipanoltis se tokniuj takat oso siuat. Komo kipanoltia se tokniuj takat, itapaleuijkauj moneki yeski se tokniuj takat. Komo kipanoltia se tokniuj siuat, itapaleuijkauj moneki yeski se tokniuj siuat. Itech amaix Tein timomachtiaj itech nechikol ixnesi netajtanil tein kichiuiliskej uan kinankilis kemej amo kiyolxokolis kemej momelaua itech referencia tein motemaka. Uelis kijtos referencia kampa kikixtia tanankilil oso amo.

11. Tanojnots. Nejin kipanoltis se tokniuj takat uan kitemakas kemej se tanojnots. Keman mokixtis itech folleto Maj tikintasojtakan tamajsikayot 1, tokniuj kinextis keniuj uelis tikuiskej versículos itech tanojnotsalis. Uelis kinextis toni kijtosneki se versículo, kemanian uelis tikuiskej oso keniuj ika nejon uelis tikpaleuiskej aksa maj kiajsikamati toni yekmelauj tamachtia Biblia. Keman tanojnots monekis mokixtis itech semej tamachtilis den folleto Maj tikintasojtakan, moneki kinextis keniuj tikuiskej itech tanojnotsalis. Komo kiita ke tapaleuis, ueliskia kikuis neskayot tein ika motajtoua itech punto 1 de nejon tamachtilis oso kikuis semej versículos tein ompa ixnesi.

12. Tein techmatiltiaj. Nejin párrafo uan okse párrafo kinextia keniuj tokniuan kipanoltiskej tamachtilis “Xionpeua xikinnojnotsa oksekin” uan “Oksepa xikinkalpano”. Komo amo moijtoua okse taman, tokniuj kitapouis se taman de Biblia tein kiuelitas akin kinojnotsa uan kichiuas kemej uelis oksepa tajtos iuan satepan. Moneki kiixpejpenas tajtos ika se taman tein semi tapaleuis kampa tanojnotsaj tokniuan. Yejua kiixejekos ox kitemakas se amaix oso kinextis se video tein yetok itech nepaleuilmej tein ika titamachtiaj. Keman kinextis keniuj uelis se tanojnotsas, maj amo kijto de memoria, ta maj tajto kemej ipa tajtoua oso maj ika motekipacho akin kinojnotsa oso maj kinexti okse taman tein tepaleuia maj tekakikan.

13. Keniuj mopanoltis. Momachtijkej uelis kipanoltis kemej nikan moijtoua:

1) Kajkalpan. Nejin kijtosneki keman titanojnotsaj kajkalpan (keman tikajsij ichan, ika teléfono oso ika carta) ijkon kemej ijkuak oksepa titajtouaj iuan aksa akin yekinika tikajsikej ikalijtik.

2) Kampa yeski. Nejin kijtosneki keman tiktapouiaj itajtol Dios akin iuan titajtouaj komo tikitaj ke uelis. Xa tiknextiliaj se texto akin iuan titekitij, itech escuela, iuan tovecino oso keman tiouij itech autobús oso okseko timoajsij.

3) Kampa miakej panouaj. Nejin kijtosneki keman titanojnotsaj ika carritos, kampa tanamakaj, itech ojti, parques, estacionamientos uan okseko kampa miakej panouaj.

14. Videos uan amaixmej. Momachtijkej kiixejekos ox kinamiki kitemakas se amaix oso kinextis video. Komo ixnesi maj kikui se video oso momachtijkej kiixtalia kikuis, kinextis uan ika tajtos video, sayoj ke amo kitalis.

TONEMILIS KEMEJ ITATOJTOKAKAUAN CRISTO

15. Nejin taxelol mopeualtis ika se nekuikatil. Itech yekinika 15 minutos motemakas se oso ome tamachtilis tein kinpaleuis takakinij maj kimatikan keniuj kichiuaskej tein kijtoua iTajtol Dios. Komo amo moijtoua okse taman, nejin kipanoltis se tayekankej oso se tapaleuijkej akin kuali tamachtia. Tamachtilis “Tein moneki tikchiuaskej kemej nechikol” nochipa moneki kipanoltis se tayekankej. Keman ixnesis maj kipanolti tamachtilis iniuan takakinij, uelis kichiuas netajtanilmej tein ixnesis itech tamachtilis uan no oksekiok tein kinamikis. Amo kijtos miak tajtolmej ipeujyan uan ijkon ajsis tiempo para kimelauas tanemililmej tein tayekantokej uan uelis tanankiliskej takakinij. Keman ixnesis maj kichiuili netajtanilmej se tokniuj, moneki maj tanankili itech plataforma uan amo itech asiento, komo ueli.

16. Nemachtil ika Biblia itech nechikol (30 minutos). Kipanoltis se tayekankej akin kuali tamachtia (komo amo yetokej miakej tayekananij, uelis kipanoltiskej tapaleuianij akin kuali tamachtiaj). Oloch tayekananij kiixejekoskej akonimej uelis kipanoltiskej nejin tamachtilis. Nejin tokniuan moneki ueliskej kitamiltiskej tamachtilis itech tiempo tein ixyetok, kinextiskej textos tein tayekantokej uan kinpaleuiskej takakinij maj kiitakan keniuj kinpaleuia tamachtilis. Semi kinpaleuis komo kiitaj keniuj techyolmajxitiaj maj tikpanoltikan tamachtilis ika netajtanilmej uan tanankililmej (w23.04 pág. 24, recuadro). Komo kuali momelauakya tamachtilis tein ixyetoya moitas, amo moneki ajsis tajko hora, ta uelis kitamiltis seki minutos achto. Komo ueli, moneki moixpatatiaskej akin kiixyekanaskej tamachtilis uan akin kiixtajtoltiskej párrafos itech sejse semana. Komo akin kiixyekana nechikol kitajtania akin kipanoltia nejin tamachtilis maj matami seki minutos achto, akin kiixyekana nemachtil kiixejekos keniuj kichiuas. Xa uelis maj amo moixtajtolti seki párrafos.

TANEMILILMEJ TEIN IKA TAMIS NECHIKOL

17. Eyi minutos. Akin kiixyekana nechikol kijtos seki taman tein timomachtijkej tein semi tapaleuia. No kinextis seki taman tein tikitaskej okse semana. Komo ajsi tiempo, uelis kijtos akonimej panoskej okse semana. Komo amo moijtoua okse taman, keman monekis motemakas se tanauatil oso moixtajtoltis se carta, akin kiixyekana nechikol kichiuas keman kijtos tanemililmej tein ika tamis nechikol. Tanauatilmej tein ipa motemakaj, kemej tein mouika ika tanojnotsalis uan tachipaualis, amo motemakas sentaixpan, ta motalis itech tablero. Komo amo ajsi tiempo para moixtajtoltis se carta oso motemakas se tanauatil tein semi moneki, akin kiixyekana nechikol kiniluis tokniuan maj kitokotsokan tamachtilismej itech taxelol “Tonemilis kemej itatojtokakauan Cristo” (xikonita párrafo 16 uan 19). Nechikol tamis ika nekuikatil uan netataujtil.

KEMAN MOTAYOLMAJXITIS

18. Satepan ke se tokniuj matamis itamachtilis, akin kiixyekana nechikol kijtos kemej itech se minuto tein kuali kichiuak uan kiyolmajxitis ika tamachtilis tein ixyetok kiitas. Keman kijtos akoni kipanoltis tamachtilis, amo kijtos itech katiyejua tamachtilis tekititok. Keman tokniuj matamis itamachtilis uan akin kiixyekana nechikol kiluis toni kuali kichiuak, no uelis kijtos itech katiyejua tamachtilis tekititoya uan keyej kuali kichiuak, oso kinextis kemej amo kiyolxokolis keyej moneki okachi kuali kichiuas uan keniuj. No uelis ika tajtos seki taman tein kipaleuis tokniuj oso takakinij. Keman tamis nechikol oso okse tonal, uelis kiyolmajxitis tokniuj ika folleto Maj tikintasojtakan, Titamachtikan oso ika libro Benefíciese, ika tamachtilis tein itech tekititoya oso okse (itech párrafos 19, 24 uan 25 kimelaua tein moneki kichiuas akin kiixyekana nechikol Tonemilis uan toTanojnotsalis uan no ojpatika tayolmajxitijkej).

TIEMPO

19. Akin kipanoltiskej tataman tamachtilis uan akin kiixyekana nechikol moneki maj amo kinpanaui tiempo. Itech amaix Tein timomachtiaj itech nechikol ixnesi kanachi minutos moneki uejkauas se tamachtilis. Komo kuali momelauakya tamachtilis maski ayamo ajsia tiempo tein ixyetoya, uelis ijkon kitamiltis itamachtilis. Komo semej kipanauia tiempo, akin kiixyekana nechikol oso ojpatika tayolmajxitijkej kinnojnotsas iselti (xikonita párrafo 24 uan 25). Nochi nechikol ika nekuikatil uan netataujtil, moneki uejkauas 1 hora uan 45 minutos.

KEMAN TOKNIUJ TAKALPANOJKEJ YETOK ITECH NECHIKOL

20. Itech semana keman yetos tokniuj takalpanojkej itech nechikol, mopanoltis tein ixnesi itech amaix Tein timomachtiaj itech nechikol. Uan sayoj “Nemachtil ika Biblia itech nechikol” moixpatas ika se tanojnots tein uejkauas 30 minutos tein kitemakas tokniuj takalpanojkej. Achto ke peuas tanojnots, akin kiixyekana nechikol kijtos tanemililmej tein tikitakej itech nechikol, kijtos seki taman tein tikitaskej okse semana, kitemakas tanauatilmej tein monekis, kiixtajtoltis cartas tein monekis, uan ompa kijtos ke tikakiskej tanojnots. Tokniuj takalpanojkej kitamiltis nechikol ika nekuikatil tein kiixpejpenas. Yejua no uelis kiluis okse tokniuj maj kichiua netataujtil. Itech nejon semana, amo kipanoltiskej tamachtilismej itech ojpatika oso expatika nechikol. Grupos akin kipiaj nechikol itech okse tajtol, uelis kipiaskej ininnechikol kemej ipa kichiuaj. Sayoj ke, moneki motalitiuij kampa yetokej nochi tokniuan keman tokniuj takalpanojkej kitemakas itanojnots.

SEMANA KEMAN MOCHIUA UEYI NECHIKOL

21. Itech semana keman mochiuas ueyi nechikol, amo mochiuas nion se nechikol. Moneki kinelnamiktiskej tokniuan maj momachtikan tein ixyetok moitas nejon semana ininselti oso kemej kalyetonij.

SEMANA KEMAN MOELNAMIKI IMIKILIS JESÚS

22. Keman moelnamikis imikilis Jesús itajkotian semana amo mochiuas nechikol Tonemilis uan toTanojnotsalis.

AKIN KIITA MAJ KUALI MOCHIUA NECHIKOL TONEMILIS UAN TOTANOJNOTSALIS

23. Oloch tayekananij kiixpejpenaj se tayekankej akin kiitas maj kuali mochiua nechikol, kemej moneki uan kemej ixnesi itech nejin amat. Yejua uan ojpatika tayolmajxitijkej moneki kuali monojnotsaskej. Niman keman yetosya se yankuik amaix Tein timomachtiaj itech nechikol, kiixtalis akonimej kipanoltiskej tamachtilismej kemej momachtianij, tein kipanoltiskej tayekananij oso tapaleuianij uan akonimej kiixyekanaskej nechikol akin tayekananij kinixpejpenkej (xikonita párrafos 3-16 uan 24). Keman kinixtalis akonimej kipanoltiskej tataman tamachtilis, moneki kiitas xiujmej tein kipiaj, tein kimatij kichiuaskej uan ox amo kinouijmakas ika tajtoskej tamachtilis tein motemakas. Nochin akin kipanoltiskej se tamachtilis moneki kinmatiltiskej eyi semanas achto oso okachi achto. Akin kipanoltiskej kemej momachtianij kinmakaskej amatsin Tein se kipanoltis itech nechikol Tonemilis uan toTanojnotsalis (S-89). Uan kiitas maj yeto itech tablero amat kampa ixnesij nochin akin kipanoltiskej tataman tamachtilis. Tayekananij uelis kiixtaliskej maj kipaleui okse tayekankej oso tapaleuijkej. Komo ijkon mochiua, moneki kielnamikis ke sayoj tayekananij uelis kiixtaliskej katiyejua tamachtilis kipanoltiskej tayekananij oso tapaleuianij.

AKIN KIIXYEKANA NECHIKOL TONEMILIS UAN TOTANOJNOTSALIS

24. Sejse semana se tayekankej kiixyekanas nechikol Tonemilis uan toTanojnotsalis. (Itech nechikolmej kampa amo moajsij miakej tayekananij uelis kintaliskej tokniuan tapaleuianij akin kuali tamachtiaj). Yejua kijtos seki tajtolmej tein ika peuas uan tein ika tamis nechikol. Moneki kijtojtias akoni kisentoka ika itamachtilis, uan komo amo moajsij miakej tayekananij, xa no monekis kipanoltis semej tamachtilismej, okachiok komo sayoj kijtos ke tikitaskej se video. Moneki amo miak tajtolmej kijtos keman tami se tamachtilis uan peua okse. Tayekananij kiixejekoskej akonimej tayekananij uelis kiixyekanaskej nechikol. Tokniuan akin kinixpejpenaskej mopatatiaskej sejse semana. Komo moneki, tayekankej akin kiita maj kuali mochiua nechikol Tonemilis uan toTanojnotsalis monekis maj okachi miakpa kiixyekana nechikol ke okseki tayekananij. Komo se tayekankej kiixyekana Nemachtil ika Biblia itech nechikol, no ueliskia kiixyekanas nochi nechikol. Sayoj ke maj tikelnamikikan ke akin kiixyekana nechikol moneki kimatis kijtos toni kuali kichiua akin kipanoltia tamachtilis uan komo moneki, kiyolmajxitis kemej amo kiyolxokolis. Yejua no moneki kiitas maj nechikol tami itech hora tein ixyetok (xikonita párrafo 17 uan 19). Komo takaujtok itech plataforma uan akin kiixyekana nechikol ijkon kineki, uelis motalis se micrófono uan ompa uelis kijtos itokay akin kipanoltis tamachtilis ijkuak tokniuj moyektalijtos itech atril. No uelis kitaliskej se silla uan se mesa itech plataforma uan ijkon akin kiixyekana nechikol uelis motalis ompa keman moixtajtoltijtos Biblia uan keman mopanoltis taxelol “Maj okachi kuali titamachtikan”.

OJPATIKA TAYOLMAJXITIJKEJ

25. Komo ueli, moneki yeski se tayekankej akin kimati kitemakas tanojnotsmej. Keman monekis, kinyolmajxitis tayekananij uan tapaleuianij akin kipanoltiskej tamachtilismej itech nechikol Tonemilis uan toTanojnotsalis, kitemakaskej tanojnotsmej, kiixyekanaskej Nemachtil ika amaix Tanejmachtijkej oso Nemachtil ika Biblia itech nechikol oso kiixtajtoltiskej párrafos (xikonita párrafo 19). Komo moajsij seki tayekananij akin kuali kipanoltiaj tanojnotsmej uan kuali tamachtiaj, uelis xijxiujtika moixpatatias ojpatika tayolmajxitijkej. Amo nochipa moneki tayolmajxitis keman motemakas se tamachtilis.

OJPATIKA OSO EXPATIKA NECHIKOL

26. Itech nechikolmej uelis kipiaskej ojpatika oso expatika nechikol komo moajsij miakej tokniuan momachtianij. Itech sejse nechikol, se tokniuj uelis kichiuas tekit kemej tayolmajxitijkej, komo ueli se tayekankej. Komo moneki, kiixtaliskej se tapaleuijkej akin kuali tamachtia. Tayekananij kinixpejpenaskej akonimej uelis kichiuaskej nejin tekit uan moixpatatiaskej. Tayolmajxitijkej kichiuas kemej moijtoua itech párrafo 18. Kiniluiskej akin kipanoltiskej se tamachtilis maj yakan itech ojpatika oso expatika nechikol satepan ke tamis tamachtilis “Maj tiktemokan tamachtilis ika nejmachkayot” tein moajsi itech taxelol “Tamachtilis tein kipia Biblia”. Keman tamis taxelol “Maj okachi kuali titamachtikan”, nochin mokepaskej itech yekinika nechikol.

VIDEOS

27. Itech nechikol itajkotian semana mopanoltis seki videos. Nejin moajsij itech JW Library® tein ueli se kiita itech tataman teposmej.

S-38-NHT 11/23